Blog

رۆژی سێ شەممە 24ی ئەیلوولی 2024, پ.د.ئیدریس محمەمەد تاهیر هەرکی سەرۆکی زانکۆی پۆلیتەکنیکی هەولێر لەگەڵ بەشێک لە ئەندامانی ئەنجومەنی زانکۆ و مامۆستایانی زانکۆمان بەشداریانکرد لە سیمپۆزیەمی ساڵیادی ڕیفراندۆمی سەربەخۆیی کوردستان کە لێژنەی ناوچەی ئاسۆ(ڕێکخراوی مامۆستایانی کۆلیژە مرۆڤایەتییەکانی-زانکۆی سەڵاحەدین) بە هەمەهەنگی لەگەڵ سەرۆکایەتی زانکۆی سەڵاحەدین سیمپۆزیۆمێکی ڕێکخست لە هۆڵی سەنتەری ڕۆشنبیری و کۆمەڵایەتی زانکۆی سەلاحەدین بەناونیشانی (ڕیفراندۆمی سەربەخۆیی لە چوار گۆشە نیگای ئەکادیمی)

‎سیمپۆزیۆمەکە لە دوو پانێڵ پێکهاتبوو، تەوەری یەکەم ئاسایشی هەرێمی کوردستان و بەربەستەکانی سیاسەتی نێودەوڵەتی بۆ ڕیفراندۆم، لە تەوەری دووەمدا دەرامەتە سروشتیەکان و جیۆپۆلیتیک و بڕیاری ڕیفراندۆمی سەربەخۆیی لەخۆگرتبوو، لەکۆتایی پانێڵەکەدا ناساندن بۆ کتێبی ڕەهەندە جیۆپۆلیتیکییەکانی ڕیفراندۆمی سەربەخۆیی لە هەرێمی کوردستاندا کرا.

 

پ. د. ئیدریس محەمەد تاھیر ھەرکی سەرۆکی زانکۆی پۆلیتەکنیکی ھەولێر، وانەیەکی نموونەیی پێشکەش بە بەشداربووانی راوندی دەیەمی خولی پێداگۆجی لە سەنتەری پێداگۆجی زانکۆی پۆلیتەکنیکی ھەولێر کرد.

لە وانە نموونەیەکەیدا سەرۆکی زانکۆ دوو بابەتی بەناونیشانی (مامۆستای نموونەیی سەرکەوتوو) و (سەوزکردنی خوێندنی پیشەیی و تەکنیکی و پەیوەندیی بە دابینکردنی بازاری کارەوە) پێشکەش کرد.

پ. د. ئیدریس محەمەد تاھیر ھەرکی لە ھەردوو بابەتەکەیدا ئاماژەی بە چۆنییەتی بوون بە مامۆستای نموونەیی سەرکەوتوو، ھەروەھا باسی لە بایەخدان بە خوێندنی پیشەیی و تەکنیکی و پەیوەندیی بە دابینکردنی بازاری کارەوە کرد.

 

رۆژی دووشەممە 23ی ئەیلوولی 2024, پ.د.ئیدریس محمەمەد تاهیر هەرکی سەرۆکی زانکۆی پۆلیتەکنیکی هەولێر لەگەڵ بەشێک لە ئەندامانی ئەنجومەنی زانکۆ و مامۆستایانی زانکۆمان بەشداری لە وۆرکشۆپی (ACI Codes of Practice) لەلایەن پەیمانگەی کۆنکریتی ئەمەریکی کرد،
بۆ زیاتر بەرەوپێشبردنی توانای مامۆستایانی زانکۆمان لە بواری کۆنکریت و بیناسازی.

 

پەیمانگەی تەکنیکی مێرگەسۆر وۆرکشۆپێکی تایبەت بەچۆنیەتی پڕکردنەوەی فۆرمی زانکۆلاین و کردنەوەی دووبەشی زانستی نوێ رێکخست

ئەمڕۆ یەکشەممە 22ی ئەیلوولی 2024، بەبەشداری ژمارەیەک لە قوتابیانی دەڤەری مێرگەسۆر و ئیدارەی سەربەخۆی سۆران، پەیمانگەی تەکنیکی مێرگەسۆر وۆرکشۆپێکی لەژێر ناونیشانی (رێنماییکردنی قوتابیان بۆ وەرگرتن لە زانکۆ: ئاشناکردن بە بەشەزانستییەکان و ستراتیج و ئامادەکاری) رێکخست.

سەرەتای وۆرکشۆپەکە د.طالب محەمەد شەریف راگری پەیمانگە وتارێکی پێشکەش کرد و تیایدا بەخێرهاتنی میوانانی کرد و گوتی: “ئەرکی زانکۆ و پەیمانگەکان تەنها فێرکردن و توێژینەوەی زانستی و داهێنان نییە، بەڵکو هاوکات ئەرکێکی دیکەشی هەیە، کە بریتییە لە خزمەتکردنی سەرجەم بوارەکانی کۆمەڵگە؛ بەو مانایەی کە چۆن تاکەکان ئامادە بکات لە پێناوی بەدیهێنانی ئاڵوگۆڕی ئەرێنی لە ژیانیان و ئامادەکردنیان بۆ رووبەڕووبوونەوەی پێشهات و رووداوە نوێیەکان. بۆیە لەم ڕووەوە، پەیمانگەی تەکنیکی مێرگەسۆر هەمیشە هەوڵدەدات سوود بە هەموو چین و توێژەکانی کومەڵگە بگەیەنێت و هەروەها بە پێچەوانەشەوە، سوود لە توانا و بیرۆکە جوانەکانی تاکەکان وەربگرێت.”

لەبەشێکی دیکەی وتارەکەیدا راگری پەیمانگە وتی، “ئامانجی ئەم وۆرکشۆپە، پێدانی هاوکاری و بەرچاوڕوونییە بە قوتابییانی دەرچووی پۆلی 12، تا بزانن چۆناو چۆن هەنگاو بنێن بەرەو زانکۆ و چۆن لەگەڵ ئەو قۆناغە گرنگەی ژیانیان هەڵسوکەوت بکەن و خۆیانی بۆ ئامادە بکەن.”

لەکۆتایی وتارەکەیدا د.طالب سوپاسی پ.ی.د. بەدر قادر سورچی کرد کە بە سیمنارێک بەشداری لە وۆرکشۆپەکە کرد، هەروەها سوپاسی تیمی راوێژکار و تەکنیکی زانکۆلاینی پەیمانگەی کرد، کە ساڵانە بە شێوەیەکی خۆبەخشانە هاوکاری قوتابیانی پۆلی 12 دەکەن، بەتایبەتی بە پێدانی راوێژ بۆ دیاریکردنی پسپۆری و پرکرنەوەی فۆرم بە شێوەیەکی دروست.

سیمناری تایبەت بە خستنەڕووی زانیاری لەبارەی هەردوو بەشی زانستی رووەکە پزیشکییەکان و پەروەردەکردنی مێش هەنگ لەلایەن پ.ی.د. بەدر قادر سوورچی پێشکەش کرا و بەوردی باسی لە پلانی بەشەکە و چۆنیەتی خوێندن و ستراتیژی کارکردنی دووبەشەکە کرد.

هەرلە سیمناری دووەمدا م. کارێزعبدولوهاب بەشێوەیەکی ورد و زانستییانە و بەپێی ئەزموونی چەند ساڵەی لەبوارەکە، قوتابییانی بەنوێترین گۆرانکاری و چۆنیەتی پڕکردنەوەی فۆرمی زانکۆلاین ئاشنا کرد و بەرچاو ڕوونی تەواوی دایە قوتابییان بۆ ئەوەی بتوانن بە بەباشترین شێوە فۆرمەکانیان پڕ بکەنەوە.