Category Archives: سەرۆکایەتی زانکۆ

پ.د.ئیدریس محەمەدتاهیر هەرکی، سەرۆکی زانکۆی پۆلیتەکنیکی هەولێر بەشداریی لە یەکەمین کۆنفرانسی سەرۆکایەتی شارەوانی هەولێر کرد کە ئەمڕۆ دووشەممە 2024.4.14، بە ئامادەبوونى ساسان عەونى، وەزیرى شارەوانى و د.پشتیوان سادق، وەزیرى ئەوقاف و کاروباری ئایینی و ئومێد خۆشناو، پارێزگارى هەولێر و عەبدولحەکیم خەسرۆ، سەرۆکى فەرمانگەى هەماهەنگى و بەدواداچوون و بریکارى وەزیرى شارەوانى و گەشتوگوزار و سەرۆکى ئەنجوومەنى پارێزگاى هەولێر و جێگرانى پارێزگار و نوێنەرى نووسینگەى سەرۆکوەزیرانى هەرێم و نوێنەرى سەرۆکى دیوانى ئەنجوومەنى وەزیران و قائیمقامى ناوەندى و ژمارەیەکى دیکە لە بەڕێوەبەرانى گشتیى و ڕاوێژکارانى وەزارەت و مامۆستایانی زانکۆ و ئەندازیاران و پسپۆڕان و شارەزایان، لە ژێرناونیشانى ” لە پێناو پەرەپیدانى بەردەوام بۆ شارى هەولێر ” دەستی پێکرد.

ئەم کۆنفرانسە کە بەهاوبەشی لەنێوان سەرۆکایەتى شارەوانى هەولێر و زانکۆى سەڵاحەدین، لە ژێرناونیشانى “لە پێناو پەرەپیدانى بەردەوام بۆ شارى هەولێر ” بەڕێوەچێت، ماوەى دوو ڕۆژ بەردەوام دەبێت، تێیدا ( 9 ) تەوەرى گرنگی تایبەت بە ( پڕۆژەکانى ڕیگا و بان و ڕیکخستنەوەى هاتووچۆ، نەخش و زەخرەفەى کوردى، ووزە نوێبووەکان و پیسبوونى هەوا، ڕووبەرى سەوزایی و مۆڵەت و ڕووپۆشى باڵەخانەکان، خۆڵ و خاشاک، کارگێڕى و کەمکردنەوەى ڕۆتین، ڕێکخستنەوەى تابلۆکان و لافاو، ڕوودان و ڕێگەگرتن لە ئاگرکەوتنەوە، سیستەمى ئاوەڕۆ ) لە لایەن پسپۆڕ و شارەزایان گفتوگۆى زانستى لەبارەوە دەکرێت.

لە ڕێورەسمى دەستپێکى  کۆنفرانسەکەدا وتاری هەریەک لە وەزیری شارەوانی و گەشتوگوزار و پارێزگاری هەولێر و سەرۆكی زانكۆی سەڵاحەدین پێشكەش كران و باسیان لە گرنگی كۆنفرانسەكە بۆ شاری هەولێر كرد.

دواتر تەوەرکانی کۆنفراسەکە دەستی پێکرد کە بڕیارە لە ماوەی دوو رۆژدا تەوەرەکانی ئاماژەپێکراوی سەرەوە باس بکرێن.

 

ڕۆژی یەکشەممە 13ـی نیسانی 2025، لە پێشوازی 16ـی نیسان ڕۆژی ژینگەی کوردستان، کۆلێژی تەکنیکی سۆران بە هاوبەشی فەرمانگەی ژینگەی سۆران، سیمپۆزیۆمی نێودەوڵەتی ڕۆڵی حکومەتی هەرێمی کوردستان لە کۆنفڕانسی نێودەوڵەتی گۆڕانی کەشوهەوا و دەرئەنجامی (Cop29) لە ئیدارەی سەربەخۆی سۆران لە هۆڵی کۆنفڕانسی کۆلێژی تەکنیکی سۆران سازکرا.

لە سیمپۆزیۆمەکەدا، پ.ی.د.سیروان لەتیف حاجی ڕاگری کۆلێژی تەکنیکی سۆران و هەژار ماهر بەڕێوەبەری فەرمانگەی ژینگەی سۆران، بەرپرسانی حکوومی و حزبی و مامۆستایان و قوتابییانی کۆلێژەکەمان ئامادەیبوون.

لە دەستپێکی سیمپۆزیۆمەکەدا ڕاگری کۆلێژی تەکنیکی سۆران لە وتەیەکدا بەگەرمی بەخێرهاتنی میوانەکانی کرد و سوپاسی ڕاگرایەتی کۆلێژی تەکنیکی سۆران و فەرمانگەی ژینگەی سۆرانی کرد بۆ ئەنجادانی ئەم سیمپۆزیۆمە، نـاوبـراو لە درێژەی ووتارەکەیـدا تەئکید لە هاوکاری و  هەماهەنگی سەرجەم دام و دەزگایەکان کردوە لە پاراستنی ژینگە و مانەوەی سروشتی کوردستان بەشێوەیەکی تەندروست و جوان، هەروەها تیشکی خستە سەر گرینگی و  ڕۆڵی مامۆستایانی زانکۆ لە هۆشیاکردنەوە و  بەرەوپێش چوونی تاکەکانی کۆمەڵگا لەڕێگەی ئەنجامدانی توێژینەوەی زانستی و چالاکی جۆراوجۆر بۆ زیاتر ئاشنابوونی نەوەکانی داهاتوو بە کەلتووری ژینگە دۆستی .

هەروەها لە سیمپۆزیۆمەکەدا دوو سیمینار و دوو پانێڵ بەڕێوەچوون کە تیایدا ڕۆڵی هەرێمی کوردستان لە کۆنفڕانسی نێودەوڵەتی گۆڕانی کەشوهەوا (COP29) و چارەسەرەکانی بەرەنگاربوونەوەی گۆڕانی کەشوهەوا خرایە ڕوو.

لە کۆتایی سیمپۆزیۆمەکەدا قەڵغانی ڕێزلێنان بەخشرایە غەفور ئەحمەد مەلاسوار قائیمقامی قەزای مێرگەسۆر و لیوا حەسەن حالی فەرماندەی بەتالیۆنی ژینگەپارێزی بارزان و بەنووسراوی فەرمیش پێشنیار بەرزکرایەوە بۆ سەرۆکایەتی زانکۆی پۆلیتەکنیکی هەولێر و دەستەی پاراستن و چاککردنی ژینگە، بۆ ئەوەی قەزای مێرگەسۆر وەکو پایتەختی ژینگەی کوردستان لەسەر ئاستی هەرێمی کوردستان بناسێنرێت، ئەمەش لەبەرامبەر هەوڵەکانی ئەو سنوورە بۆ پاراستنی ژینگە و پارێزگاری سەدان ساڵە و بوونی ناوچەی سروشتی بارزان و کەلتووری پاراستنی ژینگە و پارێزگاریکردن لێی، هەروەها لە هەمان کاتدا سوپاس و پێزانینی کۆلێژی تەکنیکی سۆران و فەرمانگەی ژینگەی ئیدارەی سۆران، ئاراستەی قسەکەرانی سیمپۆزیۆمەکە کرا.

ڕۆژی یەکشەممە ١٣ی نیسانی ٢٠٢٥، بە ئامادەبوونی وەزیری ئەوقاف و کاروباری ئایینی حکوومەتی هەریمی کوردستان د.پشتیوان سادق و پ.د.ئازاد حسن قادر یاریدەدەری سەرۆکی زانکۆ بەنوێنەرایەتی سەرۆکی زانکۆی پۆلیتەکنیکی هەولێر و ژمارەیەک لە مامۆستای زانکۆ، ئەکادیمست، ڕۆشنبیر و قوتابیان، دوومین  کۆڕبەندی زانستی پەیمانگای تەکنیکی مێرگەسۆر لە ژێر ناونیشانی (ڕۆڵی مێژوو، هونەر، سینەما و وەرگێران لە گواستنەوەی بەها پیرۆزەکانی کوردستان بۆ جیهان: ڕێبازی بارزان وەک نموونە) بەرێوەچوو.

لە سەرەتای کۆڕبەندەکەدا وتاری بەخێرهاتن لەلایەن راگری پەیمانگەی تەکنیکی مێرگەسۆر د.طالب محمد شریف عمر وتەیەکی پێشکەش کرا.

د.طالب محمد شریف عمر لە وتەکەیدا بە ناوی ئەنجوومەنی زانکۆی پۆلیتەکنیکی هەولێر و ڕاگرایەتی پەیمانگەی تەکنیکی مێرگەسۆرەوە بەخێرهاتنی میوانانی کرد.

راگری پەیمانگەی تەکنیکی مێرگەسۆر  گوتی مایەی شانازییە کە خۆمان بە بەرپرسیار دەزانین و پابەندین بە ئەنجامدانی چالاکییەکی ئەکادیمی لەم شێوەیە، بۆ پاراستنی کولتوور و  مێژووەکەمان؛ ئێمە باوەڕمان وایە، بەشێک لە ئەرکى سەرشانمان بۆ پاراستنى داب و نەریتى کوردەواریمان، پەیوەستە بە شڕۆڤەکردن و لێکدانەوەى ئەو چالاکییانەى، کە کار لەسەر بڵاوکردنەوەى کولتوورەکەمان دەکەن بۆ دەرەوەى سنوورەکانمان.

لەبارەی ئامانجی ئەم سیمپۆزیۆمەوە گوتی ئێمە لەو رێگەیەوە، هەم پەرە بە کارى پەرەپێدان و بڵاوکردنەوە دەدەین و، هەم رێگا خۆشدەکەین بۆ پاراستنى کولتوورەکەشمان؛ چونکە کاتێک  مێژوو و بەهاو کولتوورەکەمان بووە بەشێک لە سامانى جیهانى و,  ڕۆڵى لە بنیاتنانى ئەزموونى مرۆیى گێڕا، ئەوکاتە پێداویستییەکانى مانەوەى بۆ بەرهەڤتر دەکرێت.

راشیگەیاند، مێژووی دەوڵەمەند و کولتووری کۆنی خۆڕاگری، چیڕۆکی لەمێژینەی ئێمەیە؛ لە کۆنەوە چیرۆکەکانی قوربانیدان و خەبات وئومێد، بوونەتە پێناسمان. نموونەی باڵاش بۆ ئەمە,  گێڕانەوەی چیڕۆکەکانی بارزانن؛ بارزان سیماى شکۆمەندى خەباتێکە، کە ڕەگ و ڕیشەی لە بەهاکانی دادپەروەری، کەرامەت و ئازادیخوازییدا هەیە.

راگری پەیمانگای تەکنیکی مێرگەسۆر لە بەشێکی دیکەی وتەکەیدا رایگەیاند، ئێمە وەک دامەزراوەیەکی ئەکادیمی ، ئەرکی پاڵپشتی و بەرەوپێشبردنی ئەو بوارانەمان لەئەستۆدایە. بۆیە پێویستە , لە ڕێگەی لێکۆڵینەوە و توێژینەوەی زانستی و هاوکاری و ڕاهێنانی کردەییەوە، گەنج و قوتابییەکانمان بەهێز بکەین، تا ببنە باڵیۆزی ڕۆشنبیری کوردی.

پاشان وەزیری ئەوقاف وکاروباری ئایینی، د.پشتیوان سادق لە وتەیەکدا وێڕایی دەستخۆشی لە پەیمانگای تەکنیکی مێرگەسۆر و ڕێکخەرانی ئەم کۆڕبەندە زانستییە، باسی لە مێژووی خەبات و بەرخودان و پڕ لە سەروەری و مەرداییەتی بارزان کرد، کە هەمیشە ڕابەرایەتی و سەرکردایەتی شۆڕش و ڕاپەڕینەکانی گەلی کوردیان کردووە و بەرهەمەکەشی ئێستا خاوەن خاک و ئاڵا و قەوارەی دەستووری سەربەخۆین.

هەر لە کۆڕبەندەکە، ڕۆڵی زانکۆ و پەیمانگا و ناوەندەکانی خوێندنی، لە ناساندنی مێژووی خەباتی گەلەکەمان و نیشتیمانپەوەری و هۆشیاری تاک بۆ خۆشەویستی خاک و پێکەوەژیان و لێبوردەیی بەرزنرخاند، ئەوەشی گوت کە دەڤەری بارزان لانکەی مرۆڤدۆستی و دادپەوەری و پێکەوەژیان و ژینگەدۆستییە، بۆیە پێویستە قوتابیان و لاوانی خۆشەویستی ئەم دەڤەرە، درێژە پێدەری هەم هزر و بیری باب و باپیرانیان بن و بەردەوامبن لەسەر ئەم رێگا ڕاست و پڕ لە شانازییە.

دواتر لە پانێڵێکدا هەریەک ئاریان سەڵاحەددین بریکاری وەزارەتی رۆشنبیری و لاوان و پ.ی.د.شوان حمدامین مامۆستای زانکۆ و سەید محەمەد سەید عەبدوڵڵا دەرهێنەری فیلمی دۆکیومێنتاری و سەرۆکی رێکخراوی کاردۆخ بۆ پێکەوەژیان لە کوردستان باسیان لە ئەرک و رۆڵ و چالاكییەکانی حکوومەتی هەرێمی کوردستان بۆ گرنگیدان و پاراستنی بەها نیشتمانییەکان، مێژووی زارەکی و رۆڵی لە نووسینەوەی مێژووی کورد؛ رێبازی بارزان وەک نموونە و رۆڵی فیلم، سینەما، هونەر و وەرگێڕان لە ناساندنی مێژوو و کولتوور و پێکەوەژیان لە کوردستان کرد و پانێلەکە لەلایەن پ.د.محەمەد کاکەسوور بەڕێوەبرا.

پاشان لەلایەن د.پشتیوان سادق و پ.د.ئازاد حسن قادر و بەشێک لە ئامادەبووانەوە قەلغانی پێزانین پێشکەش بە ژمارەیەک لە مێژوونووس، هونەرمەندو شێوەکارا وەرگێر و فۆتۆگرافەر و سینەمەکاری دەڤەرەکە کرا لە پای هەول و ماندووبوونیان لە گواستنەوەی بەها جوان و پیرۆزەکانی کوردستان بۆ کۆمەلگاکانی کوردستان و دەرەوەی ولاتیش.

 

بەئامادەبوونی پ.ی.د.مراد امیر احمد ڕاگری کۆلێژی تەکنیکی تەندروستی و پزیشکی هەولێر و ژمارەیەک مامۆستایان و فەرمانبەران و قوتابیان پانێڵێک لەژێر ناونیشانی ( تاوانی ئەنفال.. جینۆسایدی کورد ) بەڕێوەچوو.

هەریەک لە پ.ی.د.مراد امیر احمد ڕاگری کۆلێژی تەکنیکی تەندروستی و پزیشکی هەولێر و فرحان جوهر قادر ئەندامی خولی پێشووی پەرلەمانی کوردستان د.احمد نوزاد حسن یاریدەدەری راگر بەجیا باسیان لەم تاوانە قێزونەوەی ڕژێمی پێشووی عێراق لە دژی گەلی کوردستان کرد کە بە چەند قۆناغێک هەوڵی لەناوبردنی گەلی کوردستانی دا بۆ ئەوەی ناسنامەی ئەو گەلە ستەمدیدەیە بسرنەوە کە دوور بوو لە هەموو بەهاکانی ئایینی و ئەخلاقی و مرۆڤایەتییەکان و بەبەرچاوی جیهان و رێکخراوەکانی نێودەوڵەتی ئەنجامدرا.

دواتر گەنگەشە و گفتوگۆ لەنێوان ئامادەبووان کرا و بابەتەکە زیاتر دەوڵەمەندتر کرا و بڕوانامەی بەشداربوون لەلایەن ڕاگری کۆلێژی تەکنیکی تەندروستی و پزیشکی هەولێر بەخشرا.

ئەنفال پرۆسەیەكی نەخشە بۆ داڕێژراوی رژێمی پێشووی عێراق بوو، ئەم پڕۆسەیە لە ٩ی شوباتی ساڵی ١٩٨٨ دەستیپێكرد ھەموو ساڵێك لە ١٤ی نیسان لە ھەرێمی كوردستان یادی ئەنفال دەکرێتەوە و بەم بۆنەیەوە چەندین چالاکی لەشارەکانی هەرێمی کوردستان بەڕێوەدەچێت.