Category Archives: سەرۆکایەتی زانکۆ

رۆژی پێنج شەممە رێکەوتی 16ـی شوباتی 2023 سەرۆکی زانکۆ پ.د. ئیدریس محمد تاهیر هەرکی پێشوازی کرد لە پ.ی.د. رعد عزام مامۆستا لە زانکۆی تکساس ستێت ئاڕلینگتۆن لە پسپۆری ئەندازیاری شارستانی – بیناکاری.

سەردانی بەرێزیان بۆ هەرێمی کوردستان و شاری هەولێر بەشداریکردن بوو وەک قسەکەری یەکەم، لە کۆنفرانسی هاوبەشی نێوان زانکۆی پۆلیتەکنیکی هەولێر و زانکۆی تیشکی نێودەوڵەتی (نۆهەمین کۆنفرانسی زانستی ئەندازیاری لە بوارەکانی ئەندازیاری شارستانی ئەندازیاری کۆمپیوتەر).

لە دیدارێکدا کە یاریدەدەری سەرۆکی زانکۆ بۆ کاروباری زانستی ئامادەیبوو گفتوگۆکرا دەربارەی دروست کردنی کەناڵێک لە نێوان زانکۆی پۆلیتەکنیکی هەولێر و زانکۆی تێکساس ستێت ئاڕلینگتۆن بۆ هاوکاری و هەماهەنگی زانستی و ڕۆشنبیری.

هەر لە دیدارەکەدا بڕیاردرا بە ئامادەکاری بۆ واژۆکردنی یاداشتی لێکگەیشتن لە نێوان هەردوو زانکۆ بۆ هاوکاری و هەماهەنگی لە بواری خوێندنی باڵا و توێژینەوەی زانستی و پەرەپێدانی زانستی بەتایبەتی لە بواری پسپۆری پەرستاری و کارگێری کار ، وە هەروەها ئاڵوگۆری ئەکادیمی و کەلتوری.

پ.د.ئیدریس محەمەد تاهیر هەرکی، سەرۆکی زانکۆی پۆلیتەکنیکی هەولێر لەگەڵ شاندێکی یاوەری کە پێکهاتبوو لە یاریدەدەری سەرۆکی زانکۆ بۆ کاروباری زانستی و خوێندنی باڵا و بەڕێوەبەری پەیوەندییە نێودەوڵەتییەکانی زانکۆ، سەردانی کۆنسوڵخانەی گشتیی تورکیای لە هەولێر کرد و لەلایەن کۆنسوڵی گشتیی، مەولوود یاقوت و بەرپرسانی کۆنسوڵخانەوە پێشوازیی لێکرا.

لە سەرەتای دیدارەکەدا، پ.د.ئیدریس محەمەد تاهیر هەرکی بەناوی خۆی و زانکۆی پۆلیتەکنیکی هەولێر سەرەخۆشی و هاوخەمی خۆی ئاراستەی مەلوود یاقوت کرد بەهۆی بوومەلەرزەکەی رۆژی شەشی شوباتی تورکیا و داوای لێخۆشبوونی لە خودا بۆ ئەو کەسانە کرد کە لەو رووداوەدا گیانیان لەدەستدا و هیوای چاکبوونەوەی خێرای بۆ برینداران خواست.

سەرۆکی زانکۆی پۆلیتەکنیکی هەولێر راشیگەیاند، لەسەر ئاستی زانکۆ و گشت کۆلێژ و پەیمانگانی سەربە زانکۆ کەمپینی کۆکردنەوەی کۆمەکیان بۆ لێقەوامان دەست پێکردووە و لە چەند رۆژی داهاتوودا لە رێگەی لایەنە پەیوەندارەکان لە حکوومەتی هەرێم کۆمەکەکان دەگەیننە لێقەوماوانی بوومەلەرزەکە.

لای خۆیەوە کۆنسوڵی گشتیی تورکیا لە هەولێر، مەولوود یاقوت سوپاسی سەرۆکی زانکۆی پۆلیتەکنیکی کرد بۆ سەردانەکەی و دەربڕینی هاوخەمییان بۆ رووداوەکە.

مەولوود یاقوت ستایشی هەڵوێستی حکوومەت و خەڵکی هەرێمی کوردستانی کرد بۆ بەهاناوەچوونی لێقەوماوانی بوومەلەرزەکەی وڵاتەکەی و جەختی لەوە کردەوە کە حکوومەتی تورکیا زۆر سوپاسی بەهاونەوەچوونی حکوومەتی هەرێم و گەلی کوردستان دەکات کە وەک یەکەم حکوومەت کۆمەک و هاوکاری و تیمی فریاگوزاری و تەندروستیی رەوانەی وڵاتەکەی کردووە.

بەهێزکردنی پەیوەندییەکانی نێوان زانکۆکانی هەرێم بەگشتی و زانکۆی پۆلیتەکنیکی هەولێر بەتایبەتی لەگەڵ زانکۆکانی تورکیا تەوەرێکی دیکەی دیدارەکەبوو و لەمبارەیەوە جەخت لە کارئاسانی بۆ رەخساندنی دەرفەتی خوێندنی باڵا و بەشدارییکردن کە کۆنگرە و کۆنفرانسەکان و سەردانی زانکۆکانی تورکیا کرا.

هاوکات باس لە کێشەی دانپێدانی زانکۆی پۆلیتەکنیکی هەولێر لەلایەن دامه‌زراوه‌ی خوێندنی باڵا لە تورکیا و زانکۆکانی ئەو وڵاتە کرا کە پێشتر وەک دەستەی خوێندنی تەکنیکی دانی پێدانراوە و لەمبارەیەوە جەخت لە هەماهەنگی نزیک بۆ تەواوکردنی ئەم پرسە کرایەوە.

رۆژی چوار شەممە رێکەوتی 15ـی شوباتی 2023 بە ئامادەبوونی سەرۆکی زانکۆ پ.د. ئیدریس محمدطاهر هەرکی، یاریدەدەرانی سەرۆکی زانکۆ و ژمارەیەک لە ئەندامانی ئەنجومەنی زانکۆ و بەرێوبەرانی سەرۆکایەتی زانکۆ، بەرێوبەرایەتی دڵنیایی جۆری وێرکشۆپێکی بۆ سەرۆکی بەشە زانستییەکانی گشت کۆلێژ و پەیمانگەکان لەژێر ناونیشانی (پەرەپێدانی توانا ئەکادیمی و کارگێڕییەکان) ئەنجامدا کە ئەم بابەتانەی لەخۆ گرتبوو (زمانی جەستە، جۆرێک لە سەرکردایەتی، هەڵسەنگاندنی نووسینی ئاکادیمی ،جێبەجێکردنی ڕێنماییەکانی وەزارەتی خوێندنی باڵا لە سیستەمی بۆلۆنا، رێنماییەکانی بەرزکردنەوەی نازناوی زانستی) وە بۆ ماوەی دوو رۆژ بەردەوام بوو.

لە دەستپێکی وێرکشۆپەکەدا سەرۆکی زانکۆ وتەیەکی پێشکەش کرد تیایدا بەخێرهاتنی سەرۆک بەشەکانی کرد. لە درێژەی وتەکەیدا پ.د. ئیدریس محمدطاهر هەرکی ئەنجامدانی چالاکییەکەی بە گرنگ وەسف کرد بۆ بەرزتر کردنەوەی توانای سەرۆک بەشەکان لەرووی کارگێری و زانستی و تەکنەلۆجییەوە، تاکو لە رێگەیەوە پرۆسەی خوێندن و پەروەردەکردن بگاتە ئاستێکی بەرزتر.

لە بەشێکی دیکەی وتەکەیدا سەرۆکی زانکۆ وتی: پۆستی سەرۆک بەش ئەرکێکی پیرۆز و گرنگە، هەروەها خاڵی بەیەک بەستنەوەی قوتابی و مامۆستایە و پێشکەوتنی پرۆسەی خوێندن بەندە بە کارامەیی و لێهاتووی ئەو مامۆستایەی کە لەو ئەرکەدایە، بۆیە هیوادارم ئەم وێرکشۆپە بە دەرفەتێک ببینن و زۆرترین سوودی هەبێت بۆ باشتر بەڕێوەبردنی ئەرکەکەتان.

پاشان بابەتی یەکەم لەژێر ناونیشانی (زمانی جەستە) لە لایەن د. فاضل جاف پێشکەشکرا و بەشێوەیەکی زانستی زمانی جەستە و پەیوەندی و کۆمیۆنیکەیشنە جەستەییەکان وەک جوڵە و ئاماژەکانی چاو، و هێڵەکانی دەم و چاو بەگشتی، و جوڵەی پەل و دەستەکان دەکۆڵێتەوە لە کاتی قسەکردن و گفتۆگۆ کردندا بۆ ئامادەبووان ڕوونکردەوە.

لە دوای پشوودانێکی کورت بابەتی دووەم لەژێر ناونیشانی (جۆرێک لە سەرکردایەتی) لە لایەن د. مەهدی خالد قادر پێشکەشکرا کە تیایدا بەشێوەیەکی چڕوپڕ باسی هونەری سەرکردایەتی و تایبەتمەندییەکانی سەرکردەی سەرکەوتووی کرد.
لە کۆتاییدا دەرگای گفتوگۆ کرایەوە و ئامادەبووان پرسیارەکانیان ئاراستە کرد و لە لایەن بەڕێزان د. فاضل و د. مەهدی وەڵامدرانەوە.

لە رۆژی دووەمی وێرکشۆپەکەدا سێ بابەت پێشکەش کرا کە بەشێوەیەکی زانستی و ورد هەریەک لەم بابەتانە (هەڵسەنگاندنی نووسینی ئەکادیمی) لە لایەن (پ.د.هیمداد عبدالقهار محمد)وە بابەتی دووەم بە ناونیشانی (جێبەجێکردنی ڕێنماییەکانی وەزارەتی خوێندنی باڵا لە سیستەمی بۆلۆنا (ئی.سی.تی.ئێس) لە لایەن(پ.ی.د. بۆتان مجید ئاسنگەر).
دوای پشوو بابەتێکی دیکە لەژێر ناونیشانی (ڕێنماییەکانی بەرزکردنەوەی نازناوی زانستی) لە لایەن (پ.ی.د. عەفان عثمان حسین) پێشکەش کران پاشان دەرگای گفتوگۆ کرایەوە و ئامادەبووان پرسیارەکانیان ئاراستە کرد و لە لایەن بەڕێزان د. هیمداد و د. بۆتان و د. عەفانەوە وەڵام درانەوە.

لە کۆتایی وۆرک شۆپەکە رۆژی دووەمدا بروانامەی رێزلێنان بەخشرایە پێشکەشکارەکان و سوپاسی ماندووبوونیان کرا.

وێنەکانی رۆژی یەکەم:

وێنەکانی رۆژی دووەم:

رۆژی چوار شەممە رێکەوتی 15ـی شوباتی 2023 لە هۆتێلی نێودەوڵەتی هەولێر بە ئامادەبوونی بریکاری وەزیری خوێندنی باڵا و توێژینەوەی زانستی د. عبدالفتاح عبدالرزاق، سەرۆکی ئەنجومەنی پارێزگای هەولێر د. علی رشید، جێگری پارێزگاری هەولێر مەسعود کاڕەش، ژمارەیەک لە سەرۆکی زانکۆ حکومی و ناحکومییەکان و بەرپرسی لێژنەی ناوچەی ئاسۆی پارتی دیموکراتی کوردستان لاوەند دزەیی، مەراسیمی کردنەوەی نۆهەمین کۆنفڕانسی ساڵانەى نێودەوڵەتى ئەندازیاری نێوان زانکۆی پۆلیتەکنیکی هەولێر و زانکۆی نێودەوڵەتیی تیشک بە پاڵپشتى (ئی ئی ئی تریپڵ-عێڕاق) بەرێوەچوو.

دوای گوێگرتن لە سروودی نیشتمانی عێراق و سرودی نیشتمانی کوردستان سەرۆکی زانکۆی پۆلیتەکنیکی هەولێر پ.د. ئیدریس محمد تاهیر هەرکی وتارێکی پێشکەش کرد و وتی: “میوانە بەڕێزەکان، زۆر خۆشحاڵم بە ئامادەبوونتان لە مەراسیمی نۆهەمین کۆنفڕانسی ساڵانەى نێودەوڵەتى ئەندازیاری لەژێر ناونیشانی (بەرەو ئاراستەیەکی تازە بۆ توێژینەوە و پەرەپێدان لە بواری ئەندازیاری) کە لە لایەن زانکۆی پۆلیتەکنیکی هەولێر و زانکۆی تیشکى نێودەوڵەتى و بە پاڵپشتى (ئی ئی ئی تریپڵ-عێڕاق) ئەنجام دەدرێت.

ئامادەبووانى ئازیز، ئێمە لە زانکۆی پۆلیتەکنیکى هەولێر گرنگییەکی زۆر دەدەین بە توێژینەوەی زانستی بۆ ئەو مەبەستەش کاردەکەین بۆ ئەوەی ساڵانە چەند کۆنفرانسێک ئەنجام بدەین بۆ ئەوەی مامۆستایان و توێژەرانمان بتوانن ئەنجامی توێژینەوەکانیان لەو کۆنفرانسانە پێشکەش بکەن و بڵاوی بکەنەوە خۆشبەختانە ئەمڕۆش لەگەڵ زانکۆی تیشکی نێودەوڵەتی یەکێکە لەو کۆنفرانسانە.

بەڕێزان ئەنجامدانی کۆنفرانسی زانستی چەند ئامانجێکی هەیە لەو ئەمانجانە بەیەک گەیشتنی پسپۆڕانی بوارێکی تایبەت کە بەیەکەوە توێژینەوەکانیان پێشکەش دەکەن و بیر و را دەگۆڕنەوە و لێک تێگەیشتن لە نێوانیان دروست دەبێت کە ئەوەش دەبێتە هۆی ئەوەی لە داهاتوودا توێژینەوەی هاوبەش ئەنجامبدەن و سەرپەرشتیاری قوتابیانی خوێندنی باڵا بکەن ئەمانە ئامانجی گشتی هەر کۆنفرانسێکی زانستین.

بەڕێزان بۆ ئەم کۆنفرانسەش جگە لەو ئامانجانەی باسم کرد پێویستیەکی سەردەمییە بۆ هەرێمی کوردستان بە گشتی و هەولێری پایتەخت بە تایبەت چونکە ئەمڕۆ دەبینین ئاوەدان کردنەوەیەکی بەربڵاو هەیە لە بوارەکانی بیناکاری و تەکنەلۆژیا بۆیە ئێمە وا هەست دەکەین ئەنجامدانی ئەم جۆرە کۆنفرانسانە بە تایبەتی لە بواری ئەندازیاری زۆر پێویستە، هیوادارین ئەنجامی توێژینەوەی مامۆستایانی بەشدار لە کۆنفرانس پاڵپشتییەکی دیکە بێت بۆ دەزگا پەیوەندیدارەکانی حکومەت کە بتوانن باشتر و بە تەکنیک و تەکنەلۆژیایەکی باشتر ئەو ئاوەدانیەی کە ئێستا هەیە سودی لێوەربگرن.

دووبارە دەستخۆشی لە لێژنەکانی سەرپەرشتیار و ئامادەکاری کۆنفرانس دەکەین هەروەها سوپاسی سپۆنسەرەکانی کۆنفرانس دەکەین و دووبارە بەخێربێن و زۆر سوپاس.

دواتر بریکاری وەزیری خوێندنی باڵا وتەیەکی پێشکەش کرد و وتی: کۆنفرانسە زانستیەکان لە چەندین ڕوەوە گرنگى و بایەخى خۆیان هەیە، چونکە لەگەڵ ئەوەى وێنەیەکى جوانى زانکۆکان پیشان دەدەن، لەهەمان کاتدا کاریگەرى بەرچاوى لەسەر بزاوت و چالاکى توێژینەوەى زانستى دەبێ، هەروەک ڕێگەیەکیشە بۆ کۆکردنەوەى ئەقڵەکانى کۆمەڵگە بۆ گفتوگۆکردن و خستنەڕو و دواتر چارەسەرکردنى گرفتەکانى کۆمەڵگە.

لە بەشێکى دیکەى وتارەکەیدا بریکارى وەزارەتى خوێندنى باڵا و توێژینەوەى زانستى ئاماژەى بەگرفتەکانى جیاکانى کۆمەڵگە و ئەو ئاڵنگاریانە کرد، کە ڕوبەڕوى هەرێمى کوردستان دەبنەوە، بۆ ئەوەش وتى: هەرێمەکەمان ڕوبەڕوى کۆمەڵێک گرفتى جۆراوجۆر بۆتەوە؛ لەوانە گرفتى (کارەبا، بەبیابانبون، پیسبونى ژینگە، سەرچاوەکانى ئاو، ئاوەڕۆ، ڕێگەوبان) و چەندانى دیکە، هەموو ئەمانەش لە ڕێگەى پێشنیاز و توێژینەوەى ئەندازیاران دەتوانرێ چارەسەریان بۆ بکرێ،

هەر لەو چوارچێوەیەدا ڕایگەیاند: پێویستە ئەندازیاران کەلتورێک لە کۆمەڵگە بڵاوبکەنەوە کە هاوڵاتیان و تەنانەت دامەزراوە جیاکانى حکومەتیش لەکاتى دروستکردنى خانو و باڵەخانە پشت بەو کەرەستە و پێداویستیانە ببەستن کە کەمتر لەوەرزەکان هاوڵاتیان لە ماڵەکانیان پشت بەئامێرەکانى گەرمکردنەوە و ساردکردنەوە ببەستن، هیواشى خواست لە دیزاینى خانو و باڵەخانەکاندا ئەندازیاران وردتر ڕەچاوى تایبەتمەندى شارنشینى و کەلتورى شارەکان بکەن.

شیاوی باسە ئەم کۆنفرانسە بۆ ماوەی دوو رۆژ بەردەوام دەبێت لە رۆژانی 15 و 16/2/2023، کە تیایدا لە ڕێگەى (8) پانێڵێ جیا، توێژەرانی دامەزراوە و رێکخراوی ئەکادیمی و زانکۆکانى (10) وڵاتى جیاوازی جیهان بەشدارن بە پێشکەش کردنی (53) توێژینەوەى زانستى لە بوارە جیاکانى ئەندازیارى کە گفتوگۆیان لەبارەوە دەکرێت و دوای هەڵسەنگاندن لە گۆڤارە ناوخۆیی و جیهانییەکان بڵاو دەکرێنەوە.