Category Archives: سەرۆکایەتی زانکۆ

رۆژی چوارشەممە 26ـی ئۆکتۆبەری 2023، بە ئامادەبوونی پ.د. ئیدریس محەمەد تاهیر هەرکی سەرۆکی زانکۆی پۆلیتەکنیکی هەولێر، وۆرکشۆپێکی تایبەت بە بۆلۆنا پرۆسێس بۆ سەرۆکی بەشە زانستییەکانی کۆلێژ و پەیمانگەکانی زانکۆمان رێخرا.

لە وۆرکشۆپەکەدا کە یاریدەدەری سەرۆکی زانکۆ بۆ کاروباری زاستی، راگری کۆلێژی تەکنەلۆجی هەولێر پ.ی.د. بۆتان مەجید ئاسنگەر و ژمارەیەک لە ئەندامانی ئەنجومەنی زانکۆ ئامادەیبوون، سەرۆکی زانکۆ وتەیەکی پێشکەش کرد و تیایدا بەخێرهاتنی ئامادەبووانی کرد و باسی لە گرنگی بۆلۆنا پرۆسێس کرد بۆ زانکۆ و مامۆستایان و قوتابییان و گوتی: “بەڕای من سەرۆکی بەشی زانستی داینەمۆی زانکۆیە بەڕاستی، هەموو ئیش و کارەکان کەپەیوەستن بەمامۆستا و قوتابی کە هەردووکیان پێکهاتەی سەرەکی زانکۆن، ئیشەکان لای ئەوانە ، چ ئەوەی تر کە فەرمانبەرە یان بەرێوەبەرە یان سەرۆک زانکۆیە ، ئەوانە هەمووی بەس بۆ ڕێکخستنن و هەموویان لە خزمەتی مامۆستاو قوتابییە ، ئەوەی زۆر نزیکه لەمامۆستا و قوتابی سەرۆک بەشە، بۆیە ئێمە فۆکەسمان لەسەر ئەو خاڵە کردووەتەوە و زۆر گرنگیمان بەسەرۆک بەش داوە، چونکە زۆر گرنگ و پێویستە بەشداری کردنی سەرۆک بەش لەو جۆرە خول و وۆرکشۆپانە.

بەڕێزان گرنگی زانکۆی پۆلیتەکنیکی هەولێر بۆ ئەمساڵی خوێندنی ساڵی 2022 -2023 لەوەدایە ژمارەی دەرچووانی لە هەموو زانکۆکانی هەرێمی کوردستان زیاترە، کە ئەمەش وامان لێدەکات رژد بین لەسەر پرۆسەی بۆلۆنا کە ئەمڕۆ بۆی کۆبووینەتەوە نەک تەنها کوردستان بەڵکو لەسەرتاسەری عێراق تاکە زانکۆیە بەشێوەیەکی زۆر ڕێکوپێک ئەو بابەتەی دەست پێکردووە و بەردەوامە و لیڤڵی زیاتری بریوە، لە ئێستادا زانکۆکانی عێراق تازە بەنیازن هەنگاو بنێن و دێنە زانکۆی پۆلیتەکنیکی هەولێر تاوەکو بزانن چیمان کردووە ئەوانیش سوود لە ئەزموونی ئێمە وەرگرن لەو ڕووەوە، بۆیە ئەو جۆرە خولانە گرنگ دەزانین بۆ ئەوەی بتوانین زیاتر هەنگاو بنێین بۆ بەرەوپێش و ببینە زانکۆیەکی پێشەنگ نەک تەنها لە هەولێر یان کوردستان بەڵکو لەسەرتاسەری عێراقیش، من ئەو گرێنتییەتان پێدەدەم زانکۆمان داهاتوو هەر بۆ زانکۆی پۆلیتەکنیکی هەولێرە، چونکە زانکۆی پۆلیتەکنیکی هەولێر هەم بەو پڕۆژەیەی دەستی پێکردووە لەبابەتی بۆلۆنا هەمیش ناوەکەی کەپۆلیتەکنیکە دەتوانین زۆر بەئاسانتر لەگەڵ بازاری کار خۆمان بگونجێنین، هەر ئەمساڵ چەند ڕاپۆرتێک بڵاوکرانەوە لەسەر ژمارەی قوتابیانی وەرگیراو لەهەندێک بەشی زانستی لەزانکۆکانی هەرێمی کوردستان ، خەڵکەکەی ئێمە ئێستا وشیاربۆتەوەو دەزانێت چی بخوێنێت و بچێت لەچ بەشێک بخوێنێ ، چونکە تێگەیشت لەوە کەخوێندن نەک تەنها بۆ بڕوانامەیە بەڵکو بۆ ئەوەیە کەتۆ بتوانیت کارێکی پێ بکەییت، ئێمەش دەبێت هەوڵ بدەین، بەو شێوەیەی کەئەمڕۆ ماندووتان دەکەین بەڵام دڵنیام داهاتوویەکی باش هەم چاوەڕوانی ئێوە و هەم چاوەڕوانی زانکۆکەتان دەکات، زۆر زۆر بەخێربێن، هیوادارم ئەو جۆرە وۆرکشۆپانە لەدەست نەدەن و ئیلتیزامێکی باشی پێوە بکەن ، دووبارە زۆر سوپاستان دەکەم بۆ ئامادەبوونتان هیوای سەرکەوتنتان بۆ دەخوازم”.

دواتر دەستکرا بە بەرنامەی وۆرکشۆپەکە کە تیایدا لێژنەی بۆلۆنا پرۆسێس بە سەرپەرشتی د. بۆتان و مامۆستایانی پسپۆڕ لە بوارەکە نوێترین پێشهاتەکانی پرۆسەکە روونکرایەوە.

بە ئامادەبوونی پ.د.ئیدریس محەمەد تاهیر هەرکی، سەرۆکی زانکۆی پۆلیتەکنیکی هەولێر تاقیگەی وزەی نوێ بووە لە کۆلێژی تەکنەلۆجی هەولێر کرایەوە.

لە سەرەتای رێوڕەسمەکەدا کە د.ئەمیر چالی راوێژکاری وەزیری خوێندنی باڵا و توێژینەوەی زانستی و ژمارەیەک لە بەرپرسانی دیکەی ئامادەی بوون، د.دلێر عەبدوڵڵا، سەرۆکی بەشی میکانیک و وزە، وێڕای بەخێرهاتنی میوانان،گوتی “خۆشحاڵین بە ئامادەبوونتان لە رێوڕەسمی کردنەوەی تاقیگەی وزەی نوێ بووە لە بەشی میکانیک و وزەی نوێ بووە کە لەلایەن ڕێکخراوی دادی ئەڵمانی پێشکەش بە زانکۆمان کراوە، هەروەها لە خولی ڕاهێنان بۆ ماوەی ساڵێک کاریان کردووە لەگەڵماندا ڕاهێنانیان بۆ پۆلێک لە مامۆستایانی بەشی ئێمە و کۆلێژی تەکنیکی ئەندازیاری و بەشێک لە مامۆستایانی کۆلێژی پەروەردە لە زانکۆی سەلاحەددین ئەنجامداوە”.

دواتر پ.د.ئیدریس محەمەد تاهیر هەرکی، سەرۆکی زانکۆی پۆلیتەکنیکی هەولێر لە گوتەیەکدا خۆشحاڵی خۆی نیشاندا بە کردنەوەی چەند تاقیگەیەک لە بابەتی وزە و گوتی “وزەی نوێ بووە ئەو وزەیەی کە سەرچاوەکەی سەرچاوەیەکی سروشتییە، ئاو و هەواو و خۆر بەکاردێت بۆی، دوای ئەوەی جیهان هەستی بەمەترسی کرد لەسەر گۆی زەوی، لەبەرزبوونەوەی پلەی گەرمی، گۆڕانی کەشوهەوا ، گۆڕانی ژینگەیی، ئاراستەی بەکارهێنانی وزە گۆرا بۆ بەکارهێنانی وزەی نوێ بووە”.

پ.د.ئیدریس محەمەد تاهیر هەرکی گوتیشی: “خۆشبەختانە وەک زانکۆ بەهاوکاری زانکۆی THMی ئەڵمانی پشتیوانی دارایی ڕێکخراوی دادی ئەڵمانی توانیمان کار لەسەر‌ ئەو بابەتە بکەین، بەیەکەوە توانیمان بەشێکی نوێ لە کۆلێژی تەکنەلۆجی هەولێر بکەینەوە بەناوی بەشی وزەی نوێ بووە ، ئەو بەشە بە پشتیوانی زانکۆی THMو ڕێکخراوی دادی ئەڵمانی تونرا کەرەستەکانی بۆ دابین بکرێت ، تونرا بۆ ماوەیەکی زۆر مامۆستایان ڕابهێنرێن لەسەر ئەو بابەتانەی لەو بەشە دەخوێندرێت”.

بە ئاماژەدان بە گۆڕینی ئاراستەی جیهان بەرەو وزەی نوێ بووەیە، گوتی “بۆیە بەپێویستمان زانی ئێمەش لە زانکۆکانی کوردستان بەتایبەتی لە زانکۆی پۆلیتەکنیکی هەولێر دەست بەو ئاراستەیە هەنگاو بنێین و قوتابیانمان فێربکەیین و ڕایان بهێنین بۆئەوەی ئێمەش دانەبرێین لەو زانستە کە ئێستا زۆربەی هەرە زۆری وڵاتانی جیهان پێوەی سەرقاڵن”

گوتیشی “یەکێک لەو وڵاتانەی کەزۆر گرنگی بەو بابەتە دەدات وڵاتی ئەڵمانیایە کە لەسەر ئاستی جیهان لەپلەی سێیەمی وڵاتانە دوای ولاتی چین و ئەمریکا بۆ بەکارهێنانی وزەی نوێ بووە، و خۆشبەختانە ئێمەش لەگەڵ زانکۆیەکی ئەڵمانی ئەو کارەمان ئەنجامداوە ، لێرەوە زۆر سوپاسی زانکۆی THM دەکەیین کە بەڕاستی زۆر خەمخۆرانە هاوکاری ئێمەبوون تاگەیشتین بەو دەرئەنجامە بەتایبەتی تریش زۆر دەسخۆشی لەهەردوو بەڕێزان پ.د.بەکر فەرەنگیس و پ.د.کلاوس دەکەین کە بەداخەوە دوو هەفتە پێش ئێستا خانەنشین بوو لەو زانکۆ ئەڵمانییە کە زۆر دڵسۆزانە هاوکارمان بوون تا گەیشتین بەو دەرئەنجامەی ئێستا”.

سەرۆکی زانکۆی پۆلیتەکنیکی هەولێر ئومێدی ئەوەی خواست کە بتوانن بەردەوام بن لە گرنگدان بەو بوارە تاوەکو بتوانن زیاتر خزمەتی زانکۆ و خزمەتی کۆمەڵگای کوردی و خزمەتی مڕۆڤایەتی بکەن و رایگەیاند “ئەو بابەتە کاریگەری لەسەر ئاستی جیهان و هەموو گۆی زەوی هەیە”.

دواتر ڕاگری کۆلێژی تەکنەلۆجی هەولێر، د.بۆتان مەجید ئاسنگەر گوتی: “جێگای شانازییە سەرباری ئەو هەموو قەیران و کێشانەی بەرۆکی هەرێمی کوردستانی گرتووە کە چی ئێمە ڕۆژ بەڕۆژ زیاترو زیاتر لە هەولەکانمان بەردەوامین بۆ ئایندەیەکی رووناکتر، لەشوێنی خۆمان نەوەستاوین و خۆمان تەسلیم بەو کێشانە نەکردووە کەرووبەرومان دەبنەوە”،

گوتیشی “زانکۆمان وەک پێشەنگ لە هەنگاوەکانی بەرەو نوێ بوونەوە بۆ خۆ گونجاندن لەگەڵ پێشکەوتنەکانی دونیای سەردەم و تەکنەلۆجیای نوێ درێغی نەکردووە، هەولی جددیمان داوە هەردەم لەڕێزی پێشەوەی ئەو پێداویستییانە بین کە وڵاتەکەمان و دونیای نوێ پێویستییەتی، بۆ نموونە لە ڕابردوو کاتێک هەندێک بەشمان گۆرانکاری تێدا کرد و بەشی نوێشمان کردەوە هەوڵماندا نەک تەنها لەسەر ئاستی زانکۆی خۆمان بەڵکو هەولماندا لەسەر ئاستی هەولێر و هەرێمی کوردستانیش ئەو بەشانە بکەینەوە کە نییە و بازاری کار پێویستییەتی وەک بەشی تەکنەلۆجیای ئۆتۆمبێل کە تاکە بەشە لەسەر ئاستی هەرێمی کوردستان هەردوو بڕوانامەی دیلۆمی دووساڵە و بەکالۆریۆسی چوارساڵە دەبەخشێت بەقوتابیان”.

راشیگەیاند بە پشتگیری سەرۆکایەتی زانکۆی پۆلیتەکنیکی هەولێر و هاوکاری و پشتیوانی دارایی حکوومەتی هەرێمی کوردستان بەشی وزەی نوێ بووەش یەکێکە لەو بەشانە کەلەسەر ئاستی هەرێمی تائێستا بەشێک نییە بەو ناوە، بۆیە ئێمە ئەو بەشە وەکو سەرەتایەک کە لەئێستادا بڕوانامەی دبلۆمی دوو ساڵە دەبەخشێت و لە ئایندەیەکی فراوانتر بۆ بەکالۆریۆس لەو بوارەدا هەولدەدەیین و کاری لەسەر دەکەین.

راگری کۆلیژی تەکنەلۆجی هەولێر گوتیشی: “بێگومان هەرێمی کوردستان ڕۆژ بەڕۆژ زیاتر پێویستی بەوزە زۆر لەزیادبوونە بەهۆی ئەو فراوانبوونەی ژمارەی دانیشتووان و کارگەکان و پێداویستی سەرتاپای هەرێمی کوردستان، سەرەڕای ئەوەی ژینگەکەمان پێویستی بەژینگەیەکی پاکترو خاوێنتر هەیە لەوەی ئێستا هەیە، بۆیە لە ئێستادا بەهەماهەنگی هەموولایەک وەک زانکۆمان خۆمان بەخۆشحاڵ دەزانین و خۆمان بەخەمخۆرو دڵسۆزی ئەو بوارە  دادەنێین کەدەستمان پێکردووەو بەدەست گرتنی ئێوەی بەڕێزان لەسەرووی ئێمەش هەولدەدرێت شتی گەورەترو باشتر پێشکەش بەوڵات و نیشتیمانەکەمان بکەییین، بە پێویستی دەزانم زۆر سوپاسی د.بەکر فەرەنگیس بکەم کە هەڵگری رەگەزنامە ئەڵمانیا و لە زانکۆی THMی ئەڵمانیاوە هاتووە، بەڵام کوردێکی ئەو نیشتیمانییە و زۆر کوردانە و زۆر دڵسۆزانە لەدڵەوە سەرپەرشتی ئەو خولەی کردووە بەرێکوپێکی و ئەو کادیر و قوتابی و فەرمانبەرانەی رۆژانە لەژێر سەرپەرشتی ئەو فێربوون بەوپەڕی خەمخۆری و نیشتیمانپەروەری کاری گەورەیان ئەنجامداوە، بەناوی زانکۆ و بەناوی خۆمان و بەشی تەکنەلۆجیای وزەی نوێ زۆر بەخێرهاتنی دەکەین و زۆر سوپاسی دەکەین”.

د.بەکر فەرەنگیس ڕاهێنەرو سەرپەرشتیاری ئەو خولەی بۆ کادران ومامۆستایان ئەنجامدرا بۆ بەشی وزەی نوێ گوتی: “وەکو کوردێکی ڕۆژهەڵاتی لێرە خۆم بەمیوان نازانم، خاوەن ماڵیش نیم، بەڵام وەک هاوڕێیەک بەسەرچاوان لەخزمەتدام و لێرەم، بەکورتی باسی زانستی تاقیگەکان دەکەم، بۆچوونی ئێمە لەسە دوو بۆچوون کۆبووەتەوە، لەبارەی ئەو شتەی کەئێمە دەزانین بەمانای ئەوەنییە کەفامیشمان کردبێت ، باشتر‌ ئەوەیە کەخۆمان ئەنجامی بدەیین ،   کارکردن زۆر پێویستە بەڵام بەکردەیی ئەنجامی بدەیین ، هەڵەیەکی تێدا بکەیین و ڕاستی بکەینەوە ، ئەو هەڵەیە زۆر یارمەتیدەرە ، سوپاسی هەموو ئەوانە دەکەم هاوکارییان کردین، بۆیە ناوی کەس ناهێنم نەوەک ناوێکم بیربچێت، زۆر خۆشحاڵم لەخزمەتتاندام، هیوادارم لە قۆناغی یەکەم ئەو زانستە بێتە ئێرە و لە قۆناغی دووەم لەناو زانکۆدا جێگای بکرێتەوە و بخوێندرێت”.

د.ڕەنج سیروان لە وتەیەکدا ئاماژەی بە چۆنیەتی دەستپێکردنی کارەکانی دامەزراندنی تاقیگەکان کرد و گوتی: بیرۆکەی دامەزراندنی ئەم تاقیگەیە لە سەنتەری توێژینەوە لەگەڵ دوو مامۆستای زانکۆمان گەڵاڵە بوو، دوای هەوڵێکی زۆر  لەگەڵ د. بەکر توانیمان پرۆپۆزەڵی وزەی نوێ بووە ئامادە بکەین لەزانکۆمان، لە راستیدا کاری ئێمە هێشتا تەواو نەبووە ئامانجی یەکەممان قۆناغی یەکەم ئەو تاقیگەیە بوو، بەڵام قۆناغی دووەم ئەوەیە کە بتوانین سەنتەرێکی وزەی نوێ بووە لەسەر ئاستی هەموو کوردستان بکرێتەوە، پشتیوان بەخوا وەک زانکۆی پۆلیتەکنیکی هەولێر بەردەوامی بدەین بە کارکردنمان لەگەڵ زانکۆی THM و ڕێکخراوی داد بۆ قۆناغی دووەم هەنگاو بهاوێژین بۆ دوو ساڵی دیکە ئەو ئامانجەش بپێکین، ئەوکات دەتوانین بەناوی سەنتەرێک کەتەنها تاقیگەیەک نابێت ستافیشی دەبێت و تاقیگەی ئەدڤانسی دەبێت کە پێشکەوتووە و لەسەر ئاستی هەموو کوردستان یەکەم زانکۆ دەبێت، ئێمە زۆر پێخۆشحالین کە د.بەکر هەر لەگەڵمان بێت و پەیوەندیمان لەگەڵی هەبێت ، بەدڵنیاییەوە سەرۆکایەتی زانکۆمان پاڵپشتمان بێت لەقۆناغی دووەم  هیوادارین کە د.ئەمیر و وەزارەتیخوێندنی باڵاش یارمەتیمان بدەن لەو بابەتە بەهەر شێوازێک بێت کەبتوانین بەرەو قۆناغی دووەم برۆیین کە پرۆپۆزەڵەکەی ئامادەیە، بەڵام وەک دەزانن ئیمکانیاتی دەوێت، ئێمە ناوەستین ، پ.د. ئیدریس سەرۆکی زانکۆ ئامادەیی دەربڕیوە بەپێی ئیمکانیاتی زانکۆ پاڵپشتیمان بکەن، بەڵام من دەزانم پڕۆژەیەکی لەو شێوەیە خەرجییەکی زۆری دەوێت، بۆیە پێمخۆشە ئەو کارە هەر بەردەوام بێت ، پشتیوان بەخوا ئەو خەونەی بەیەک هەنگاو و بەیەک ئیمەیڵ دەستی پێکرد دەگەینە کۆتاییەکەشی، زۆر زۆر سوپاس دەستانخۆش.

پێش کۆتایی هاتنی تەواوی مەراسیمەکە د.کاروان و مامۆستایان، هەنگاو بەهەنگاو سیمیناری تایبەتیان لەبارەی تاقیگەو پێداویستی و کارەکان پێشکەش کرد و بۆ ئامادەبووانیان شیکردەوە کەچی کارێکیان کردووە و گرنگی کارەکانیان چییە.

ڕۆژی پێنچ شەممە 19ـی ئۆکتۆبەری 2023، لەهۆڵی سەنتەری ڕۆشنبیری زانکۆی پۆلیتەکنیکی هەولێر رێورەسمی ئاهەنگی دەرچوونی قوتابییانی زانکۆمان لەژێر ناوی “خولی خۆڕاگری” بەڕێوەچوو کە تیایدا قوتابییانی هەریەکە لە کۆلێژی تەکنیکی ئەندازیاری ، کۆلێژی تەکنیکی تەندروستی و پزیشکی، کۆلێژی تەکنیکی کارگێڕی هەولێر و پەیمانگەی تەکنیکی کارگێری هەولێر سوێندیان خوار دو بڕوانامەی بەکالۆریۆس و دبلۆمیان لەچەندین پسپۆڕی جیاواز پێبەخشرا .

لەم ئاهەنگەدا پ.د.عبدالفتاح عبدالرەزاق بریکاری وەزیری خوێندنی باڵاو توێژینەوەی زانستی ، د.کاروان یاریدەدەری سەرۆکی زانکۆی هەولێری پزیشکی ، هاوکارت نوێنەری سەرۆکی زانکۆی هەولێری پزیشکی ، م.هەژار بەرپرسی ناوچەی ئاسۆ ، د.دیار جەباری کارگێری ناوچەی ئاسۆ ، بەڕێز شیرین خالید بەرپرسی ناوچەی ئایندە ، م.پشتیوان کارگێری ناوچەی ئایندە ، بەڕێز نێچیرڤان کەلاری سکرتێری یەکێتی قوتابیانی کوردستان، لەگەڵ ژمارەیەکی زۆر لەکەسوکاری قوتابیان بەشداربوون تێیدا .

رێورەسمەکە بەخولەکێک وەستان بۆ گیانی پاکی شەهیدان و گوێگرتن لە سرودی نیشتیمانی ئەی رەقیب دەستی پێکرد ، دواتر وتارى لێژنەى باڵاى ئاهەنگى دەرچووانى زانکۆی پۆلیتەکنیکی هەولێر بۆ ساڵى خوێندنى 2022 – خوێندرایەوە.

پاشان پ.د. ئیدریس محەمەد تاهیر هەرکی سەرۆکی ئەنجومەنی زانکۆی پۆلیتەکنیکی هەولێر وتارێکی پێشکەش کرد کە ئەمە دەقەیەتی:

بەناوی یەزدانی پاک و بێگەرد

قوتابیانی خۆشەویست…

دەرچووانی لە دڵاشیرین…

خانەوادەی دەرچووان…

مامۆستایانی خۆڕاگرو دڵسۆز….

خۆشحاڵ و شادومانین بە دەرچوونی پۆلێکی دیکە، لە قوتابیانی کۆلێژو پەیمانگەکانمان لە بەش و پسپۆڕییە هەمەجۆرەکان، بەمبۆنەیەوە جوانترین پیرۆزبایی لە خۆمان و تەواوی ئەندامانی ئەنجوومەنی زانکۆو ئەنجومەنی کۆلێژو بەشە زانستییەکان و یەکە یەکەی دەرچووان و خانەوادەکانیان و مامۆستایانی ماندونەناس دەکەین، لە هەمان کاتدا پیرۆزبایی لە جەنابی رێزدار (مەسرور بارزانی)سەرۆکی حکومەتی هەرێمی کوردستان و وەزارەتی خوێندنی باڵاوتوێژینەوەی زانستی دەکەین، هیوای ئایندەیەکی گەش و پڕشنگدارتان بۆ دەخوازین، تا لە ژینگەی کرداری قۆناغی دوای زانکۆ ببنە مایە سەربەرزی و شکۆمەندی خۆتان و خانەوادەکانتان و مامۆستاکانتان و زانکۆمان.

بەڕێزان….

هەروەک چۆن زانکۆکان ئەرکیان پێگەیاندن و فێرکردن و دەرچوونی قوتابیانە، بە پێشخستنی تواناو کارامەیی دەرچووەکانیان، ئاوهاش پێویستە ئەو پەیوەندییەی لە نێو حەرەمی زانکۆ لەگەڵ قوتابیاندا هەیبووە، ئەوا ئەو  رایەڵەیە نەپچڕێنێت و بەردەوام بێت بۆ راهێنان و رەخساندنی هەلیکار بۆیان، لەو چوارچێوەیەشدا بە هەنگاونان بۆ رەخساندنی دەرفەتی کار بۆ دەرچووانمان بایەخی تایبەتیمان بە بەڕێوەبەرایەتی سەنتەری گەشەپێدانی کار(CDC) داوە، بۆ ئەمەش ژمارەیەک یاداشتی لێتێگەیشتن لەگەڵ کۆمپانیاکانی کەرتی تایبەت و رێکخراوە ناوخۆیی و جیهانییەکانی وەک (WFP) و (SPARK) واژووکردووە، کە دەتوانین بە هاوبەشی دەرچووانی زانکۆمان بەشێوەیەکی باشتر بۆ بازاڕی کار ئامادە بکەین و هەلی کاریان بۆ ڕەخسێنین لە رێگەی کردنەوەی پێشانگای ساڵانەی هەلیکار بۆ دەرچووان، بەم هەنگاوە ئەو بارگرانیەی لەسەر حکومەت هەیە لە دامەزراندنی دەرچووان کەمتر دەبێتەوە.

ناشبێت ئەوە لە بیر بکەین، زانکۆی پۆلیتەکنیکی هەولێر، وەک زانکۆیەکی پێشەنگ لەسەر ئاستی هەرێمی کوردستان، لە پێناو بایەخدان بە توێژی قوتابیان و زەمینەسازی بۆ ژینگەیەکی شیاوی خوێندن، بە ئاوێتەکردنی چالاکییە کەیفخۆشیی و رۆشنبیرییەکان بۆ یەکەمجار لەسەر ئاستی زانکۆکانی کوردستان سەنتەری قوتابیانی کردۆتەوە کە دەبێتە ناوەندێکی گرنگی زانستی و مەعریفی بۆ قوتابیان کە تیایدا دەتوانن چالاکییە هونەریی و رۆشنبیرییەکانی خۆیان تێدا ئەنجام بدەن لە پاڵ ئەوەشدا کار بۆ دروستکردنی یاریگای تایبەتمەند بۆ چالاکییە وەرزشییەکان کراوە تا قوتابیان بەهرە وەرزشییەکانی خۆیان مومارەسەر بکەن.

خۆشەویستان…

لە دوای دەست بەکاربوونمان وەک سەرۆکی زانکۆ،  بە هاوکاری ئەو تیمە ئەکادیمی و کارگێڕییە دڵسۆزە، نەخشرێگەیەکی ستراتیژی داڕشتووە بۆ بەرەوپێشبردنی زانکۆ لە بواری زانستی، کارگێڕی، دارایی و بنیاتنانی ژێرخانێکی ئەکادیمی پتەو.، لەو روانگەشەوە بە خۆگونجاندن لەگەڵ بازاڕی کار ژمارەیەک بەشی زانستی نوێ لەسەر ئاستی کۆلێژ و پەیمانگاکان کراونەتەوە، کە هەم دەرفەتی خوێندن دەڕەخسێنێت و هەمیش گرەنتی دەرفەتی کار دەبن بۆ دەرچووانی ئەو بەشە تازانە. هاوشانی ئەو پڕۆژەیەش بە ئامانجی بنیاتنانی ژێرخانی زانکۆ کۆمەڵێک پڕۆژە خراونتە بواری جێبەجێکردنەوە کە بە تەواوبوونیان زانکۆمان  پێدەنێتە  قۆناغێکی دیکەی پەروپێدانی زانستی، ئەمە جگە لەو پڕۆژانەی کە زانکۆ بۆ خزمەتی کۆمەڵگەو کێشە و گرفتەکانی بەردەوام دەبێت، لەو چوارچێوەیشدا کار لەسەر کردنەوەی نۆڕینگەیەکی پزیشکی ددان دەکرێت لە بەشی یاریدەدەری پزیشکی ددان لە پەیمانگەی تەکنیکی پزیشکی هەولێر بۆ خزمەتی هاووڵاتییان.

بەڕێزان…..

زانکۆمان، لە بواری خوێندنی باڵاشدا ئێستا شان بە شانی زانکۆکانی کوردستان پلانی زانستی هاوچەرخانەی داڕشتووەو دەستی داوە پێگەیاندنی کادیری خۆماڵی لە خوێندنی باڵا، بۆ ئەمساڵی خوێندنیش ژمارەیەکی بەرچاوی لە قوتابیانی (دبلۆمی باڵا، ماستەر و دکتۆرا) وەرگرتووە، لەگەڵ ئەوەشدا بۆ یەکەمجار گۆڤاری پۆلیتەکنیک بۆ زانستە پەتییەکان لەسەر پلاتفۆرمی ئەلسیڤەر جێبەجێکرا و هەنگاو دەنێت بۆ سکۆپەس، کە ئەمەش هانی مامۆستایان و توێژەران دەدات بۆ بڵاوکردنەوەی توێژینەوەی زانستی کوالێتی بەرز و پڕۆسەی سایتەیشن کە هەموو ئەوانەش دەبنە هۆی بەرزبوونەوەی رانکینگی زانکۆمان لە ریزبەندییە ناوخۆیی و جیهانییەکان.

بەڕێزان….

ئەو بۆنەیە بە دەرفەت دەزانم، وەک سەرۆکایەتی زانکۆی پۆلیتەکنیکی هەولێر سوپاسی رێزدار جەنابی(مەسرور بارزانی سەرۆک وەزیرانی هەرێمی کوردستان بکەم کە ساڵی خوێندنی ٢٠٢٢-٢٠٢٣ سەرەڕای ئاستەنگە داراییەکان، بەڵام بەردەوام بوو لە دابینکردنی پشتیوانی دارایی بۆ قوتابیان و زانکۆکانی هەرێمی کوردستان، دەتوانین بڵێن بە خۆڕاگری جەنابیان، زانکۆکان توانیان بەردەوام بن لە پڕۆسەی خوێندن، تەنانەت بۆ یەک چرکەش پڕۆسەی خوێندن  نەوەستا،  پشتیوان بە خودای گەورە و پاڵپشتی کابینەی نوێەمی حکوومەتی هەرێمی کوردستان کاروانی زانست لە کوردستان بەرەوپێش دەچێت و هیواخوازین زانکۆمان بە هەوڵی مامۆستایانی ماندوونەناس و کارمەندانی ستافی کارگێڕی و قوتابیانی ئازیز سەرمەشقی ئەم کاروانە بێت و ببینە پێشەنگ لە ناو زانکۆکانی هەرێمی کوردستاندا.

لە کۆتاییدا جارێکی دیکە، پیرۆزبایی لە دەرچووانی ئازیز دەکەم، پیرۆزە بڕوانامەی تێکۆشان و هەوڵ و رەنج و ماندووبونی چەند ساڵەی خوێندنتان، ئومێدەوارم هەمیشە سەرکەوتووبن لە هەموو بوارەکانی ژیاندا، ئایندەیەکی پڕشنگدارو روناک چاوڕێتان دەکات، کوردستان پێویستی بە تواناو کارامەییە جەستەیی و ئەقڵییەکانی ئێوەی خۆشەویستە.

هەر شەکاوە بێت ئاڵای کوردستان، لە کوردستانێکی خۆڕاگرو بەهێز.

 

هەر لە مەراسیمەکەدا پ.د.عبدالفتاح عبدالرەزاق بریکاری وەزارەتی خوێندنی باڵاو توێژینەوەی زانستی وتەیەکی پێشکەش کرد و تیایدا پیرۆزبایی لەقوتابیان و کەسوکاری قوتابیان کرد و گوتی : خۆشحاڵم ئەمڕۆ لێرە لەزانکۆی پۆلیتەکنیکی هەولێر بەیەکەوە بەشداردەبین لەئاهەنگی دەرچوونی پۆلێک لەکورو کچی خۆشەویستی وڵاتەکەمان .

دەرچوانی خۆشەویست ، بەناوی وەزارەتی خوێندنی باڵاو توێژینەوەی زانستی لەناخی دڵەوە پیرۆزبایی گەرمتان لێدەکەم بۆ ئەو سەرکەوتنە گەورەیەی کەئەمڕۆ ئاهەنگی بۆ دەگێڕن ، پڕ بەدڵ هیوای سەرکەوتنی زیاترو گەورەترتان بۆ دەخوازم، وە دڵنیام کەدەبنە بەشێکی گرنگ لەسەرمایەی مرۆیی وڵات و خزمەتی گەورەی نیشتیمانەکەمان دەکەن .

ئازیزان هەرچەندە لەماوەی خوێندنی ئێوەی بەڕێز هەرێمی کوردستان توشی قەیرانی دژوارو ئالنگاری گەورەبوو بەتایبەتی قەیرانی دارایی و بڵاوبونەوەی پەتای کۆڤید 19 ، بەڵام جێگەی شانازیە کەتوانیتان بەپشتیوانی خانەوادەو کەسوکارتان ، مامۆستاکانتان و حکومەتی هەرێم و وەزارەتی خوێندنی باڵا بەسەر کۆسپ ئالنگارییەکان سەربکەون و لەخوێندن دانەبرێن .

دەستخۆشی و سوپاستان دەکەم بۆ هەول و ماندوبونتان بۆ کۆشش و شەونخونیتان لەماوەی ساڵانی رابردووی خوێندنتان کەئەمڕۆ بەشانازییەوە بەرهەمەکەی بەدەست دەهێنن .

دەرچوانی قەدرگران

حکومەتی هەرێم و وەزارەتی خوێندنی باڵا بەهەموو تواناکانی لەهەول و کۆششەکانی بەردەوامە بۆ پێگەیاندنی ئێوە بەڕەخساندنی کەشی ئارام و فرسەتی خوێندنی یەکسان بۆ هەمووان لەگشت ئاستەکانی خوێندن ، وە دڵنیام کەزانکۆکەتانیش درێغی نەکردووە بۆ خزمەتکردنتان لەبواری زانستی و پەروەردەیی و بنیاتنانی کارامەییەکانتان.

ئازیزان ، کۆشش و هەولەکانتان لێرە کۆتایی نایەت و رۆڵی حکومەت و زانکۆکەشتان بۆ پێگەیاندنتان نابێت کۆتایی پێ بێت ، پێویستە زانکۆکان بەرنامەی هەبێت بۆ پشتیوانی و ئامادەکردنی ئێوە بۆ قۆناغی داهاتوتان، وە لەبازاری کار هاریکاریتان بکات بۆ دۆزینەوەی هەلی کار ، کارئاسانی و رێنوێنیتان بکات و بەرنامەی هەبێت بۆ زیادکردن و سەقل کردنی ئەو کارامەییانەی کەبازاری کار پێویستییەتی  .

وەپێویستە حکومەتیش لەپاڵپشتییەکانی بۆ ئێوەی خۆشەویست بەردەوام بێت ، بەم بۆنەیەوەش بەئەرکی خۆمی دەزانم کەسوپاسێکی بێ پایانی حکومەتی هەرێم بکەم کەبەردەوام پشتگیری تەواوی وەزارەتی خوێندنی باڵای کردووە بۆ جێبەجێکردنی پڕۆژەکانی ژێرخانی دامەزراوەکانی خوێندنی باڵاو بەرنامەکانی چاکسازی و پەرەپێدان  لەوەزارەت و زانکۆکان تابتوانین زۆرترین فرسەتی خوێندن و باشترین کوالێتی خوێندن بۆ ئێوەی بەرێز فەراهەم بکەیین.

بەرێزان ، هەر ئەو پاڵپشتییەی حکومەتی هەرێم بوو وای کرد کەوەزارەتمان بۆ ئەمساڵی خوێندن زیاتر لە60000 شێست هەزار کورسی خوێندن لەزانکۆ حکومیەکان  جگە لەکورسیەکانی زانکۆو پەیمانگە تایبەتەکان دابین بکات بۆ دەرچوانی پۆلی دوازدەی ئامادەیی لەکاتێکدا کەژمارەیان 46379 قوتابی بوو ، ئەوەش لەڕێگای فراوانکردنی تاقەی ئیستیعابی زانکۆکان لەلایەک و لەلایەکی تر زیادکردنی ژمارەی زانکۆکان بوو .

بەرێزان هەرێمی کوردستان کەلەپێش راپەرین خاوەنی تەنها 3 زانکۆ بوو ئێستا لەسایەی حکومەتی هەرێمی کوردستان خاوەنی 18 زانکۆی حکومی و18 زانکۆی تایبەت و2 کۆلێژی زانکۆیی و12 پەیمانگەی تەکنیکی و بریاریش دراوە 14 پەیمانگەی پیشەییش دروست بکرێت .

هەر لەم کابینەیەدا ئەمساڵ بریاری دامەزراندنی سێ زانکۆی تردرا ، دووانیان حکومی بوون و ئەوانیش زانکۆی ئاکرێ بۆ زانستە کردارییەکان و زانکۆی پۆلیتەکنیکی گەرمیان بوون ، هەروەها زانکۆیەکی تایبەتیش کەلقی زانکۆیەکی نێودەوڵەتییە لەهەولێر ئەویش لقی زانکۆی لەندەنە.

دەرچوانی خۆشەویست

حکومەتی هەرێمی کوردستان لەهەولەکانی بۆ پێگەیاندنتان و خەمخۆری بۆ دابینکردنی فرسەتی کار بۆ ئێوەی بەرێز بەردەوامە ، هەردوو هەفتە لەمەوپێش لەئاهەنگی دەرچوانی زانکۆی سەلاحەددین جەنابی سەرۆکی حکومەت خەمخۆری خۆی بۆ ئەم بابەتە راگەیاندو جەختی لەوە کردەوە کەحکومەت بەهەموو تواناکانی هەولدەدات کەفرسەتی کاری یەکسان و دادپەروەرانە بۆ دەرچوانی زانکۆو پەیمانگاکان دابین بکات ، هەر لە مەراسیمەدا پڕۆژەی قەرزی بچووک و مام ناوەندی راگەیاند کەدەدرێت بەو گەنجانەی کەپرۆژەی تایبەتیان هەیەو پێویستیان بەقەرزکردن هەیە بۆ جێبەجێکردنی پرۆژەکانیان، وەهەروەها جەنابیان جەختی لەوە کردەوە کەهەموو کۆمپانیاو پرۆژەکانی وەبەرهێنان لەهەرێم پێویستە بەلایەنی کەم لەسەدا 70ی دەستی کارەکانیان لەکرێکارو کارمەندان خەڵکی هەرێمی کوردستان بن ، ئەوە جگە لەسیاسەتی حکومەتی هەرێم لەهاندان و ئاسانکاری بۆ پرۆژەکانی وەبەرهێنان لەگشت بوارەکان، کەئەوانەش هەمووی وادەکەن فرسەتی کار بۆئێوەی بەرێز زیاتر بکات .

لەکۆتاییدا دەمەوێت سوپاسێکی تایبەت ئاراستەی سەرۆک و ئەندامانی ئەنجومەنی زانکۆو گشت مامۆستایان و فەرمانبەرانی زانکۆی پۆلیتەکنیکی هەولێر بکەم کەشەو و ڕۆژیان خستەسەر یەک بۆ ئەوەی بتوانن ئێوەی ئازیز بگەیەنن بەم ڕۆژە پڕ شکۆیە .

هەروەها بەپێویستی دەزانم کەدەسخۆشی و سوپاس و رێزی بێ پایانمان ئاراستەی هەموو کەسوکاری دەرچوان بکەم کەزۆر ماندوبون و ڕۆلی گەورەیان بینی لەو سەرکەوتنە گەورەیەی کەئەمڕۆ ڕۆڵەکانیان بەدەستیان هێنا .

دووبارە پیرۆزبایتان لێدەکەم ، هەمیشە هەر هەر شادو سەربەرزو سەرفرازبن.

دواتر قوتابییانی هەریەکە لە کۆلێژەکانی تەکنیکی ئەندازیاری، تەکنیکی تەندروستی و پزیشکی، تەکنیکی کارگێڕی هەولێر و پەیمانگەی تەکنیکی کارگێڕی هەولێڕ بەیانیان و ئێواران بەجیا سوێندی یاساییان خوارد و سەرۆکی زانکۆش بەپێی ئەو دەسەڵاتەی پێدراوە بڕوانامەی بەکالۆریۆس و دبلۆمی بەخشییە دەرچووەکان لە پسپۆڕییە جیاوازەکان و کۆتایی بە مەراسیمەکە هات.

لێــــــــــــــــــــــــــرە کلیک بکە بۆ بینینی سەرجەم وێنەکانی ئاهەنگی رۆژی 19ی ئۆکتۆبەری قوتابییانی کۆلێژەکانی تەکنیکی ئەندازیاری، تەندروستی و پزیشکی، کارگێڕی هەولێر و پەیمانگەی تەکنیکی کارگێڕی هەولێر بە کوالیتی بەرز.

لێــــــــــــــــــــــــرە کلیک بکە بۆ بینینی سەرجەم وێنەکانی ئاهەنگی رۆژی 21ـی ئۆکتۆبەری قوتابییانی کۆلێژی تەکنەلۆجی هەولێر، پەیمانگەی تەکنیکی پزیشکی هەولێر و پەیمانگەی تەکنیکی خەبات بە کوالیتی بەرز.

 

رۆژی چوارشەمە 18ـی ئۆکتۆبەری 2023، بەئامادەبوونی سەرۆکی زانکۆی پۆلیتەکنیکی هەولێر پ.د.ئیدریس محەمەد تاهیر هەرکی، پ.ی.د.نەجیب توما یاریدەدەری سەرۆکی زانکۆ بۆ کاروباری زانستی، لەهۆلی کۆنفرانس لەسەرۆکایەتی زانکۆ وۆرکشۆپێکی تابیەت بە قوتابیانی وەرگیراوی خوێندنی باڵا  ماستەر و دکتۆرا بەرێوەچوو.

لە سەرەتای وۆکشۆپەکەدا سەرۆکی زانکۆ وتەیەکی پێشکەش کرد  کە تیایدا بەخێرهاتنی قوتابییانی وەرگیراو لە خوێندنی باڵا کرد و گووتی: “نازانم چۆن پێخۆشحاڵی خۆم دەربڕم بۆ ئەو ژمارە زۆرەی مامۆستایان و کارمەندانی زانکۆمان کە ئەمڕۆ لێرە کۆبووینەتەوە بۆ ئەوەی بەشداری بکەین لەم وۆرکشۆپە کە چەند سیمنارێک لەخۆی دەگرێت لەبارەی توێژینەوەی زانستی کە سوودێکی زۆری هەیە لە کاتی خوێندنەکەتاندا.

سەرەتا دەمەوێت بەناوی خۆم و بەناوی ئەنجومەنی زانکۆی پۆلیتەکنیکی هەولێرەوە پیرۆزباییەکی گەرم لەیەکە یەکەی‌ ئێوەی بەڕێز‌ دەکەین، یەکێک لە ئامانجەکانم ئەوەبوو کە بتوانین زۆرترین دەرفەت بۆ کارمەندانی زانکۆمان برەخسێنین بۆ ئەوەی ژمارەیەکی زیاتر لە مامۆستایان و کارمەندانی زانکۆمان دەرفەتی خوێندنیان بۆ برەخسێت بۆ وەرگرتنی بڕوانامەی ماستەر و دکتۆرا، لەبەر ئەوەی هەستمان دەکرد کە زانکۆمان زیاتر پێویستی بەمامۆستا هەیە کە خاوەن بڕوانامەی ماستەرو دکتۆرابن، سوپاس بۆ خوا توانیمان ئەو دەرفەتە بڕەخسێنین بۆیە ئەمڕۆ زۆر دڵخۆشم کە دەبینم ژمارەیەکی زۆر لەکارمەند و مامۆستای ئێمە کە زیاترە لە 200 کارمەند و مامۆستا داوای مۆڵەتی خوێندنیان کردووە بەمەبەستی درێژەدان بەخوێندن و بەدەسهێنانی بڕوانامەی بەرزتر.

تا ئەمڕۆ بەردەوامین و بەردەوامیش دەبین کە ژمارەی وەرگێراوان ژمارەیەکی یەکجار زۆرە، ئومێد دەکەین کە لە دوو تا سێ ساڵی داهاتوودا ژمارەی مامۆستایانمان بگاتە 1000 مامۆستا، بۆ زانیاری بەڕێزتان ئێمە تاوەکو ئێستا  نزیکەی 700 مامۆستامان هەیە و لە هەوڵ دەدەین لە دوو ساڵی داهاتوو بتوانین ئەو ژمارەیە بەرز بکەینەوە بۆ 1000 مامۆستا، ئەمەش هەنگاوێکی زۆر زۆرباشە، نزیکەی 16000 قوتابیمان هەیە کە ژمارەیەکی یەکجار زۆرە و ساڵانە لەزیاد بوونە، بۆیە ئێمە زۆر پێویستمان بەمامۆستا هەیە، هەر لەبەر ئەوەشە کە پێخۆشحاڵ بووین لەگەڵ ئێوە کۆبووینەوە تا دڵخۆشی خۆمان ڕابگەیەنین پێتان و پیرۆزبایتان لێ بکەین، وە ئومێدی سەرکەوتنتان بۆ بخوازین لەخوێندن.

ئومێد دەکەین زۆر بەجدی زۆر بەتواناوە دەست بەخوێندن بکەن، سوود لەو بڕوانامانە وەربگرن کە بەدەستی دەهێنن، ئێمە وەکو زانکۆ هاوکار دەبین و پشتگیریتان دەکەین، بەڵام پێویستە ئێوەش پشتگیری خۆتان بکەن، بەبڕوانامەیەکی وا بێنەوە سەرکار کەشانازیتان پێوە بکەین دووبارە، زۆر‌ گرنگە مەبەستتان تەنها بەدەستهێنانی بڕوانامە نەبێت و لەگیرفانتان دایبنێن، بەڵکو مەبەستتان بێت زانیاری زیاتر بەدەست بهێنن بۆئەوەی مامۆستایەکی باشتربن، تا بتوانن خزمەتێکی باشتر و چاکتری زانکۆ بەتایبەتی و کوردستان بەگشتی بکەن.

دووبارە پیرۆزتان بێت، ئومێدەوام لەم وۆرک شۆپ و سیمینارانەی ئەمڕۆ کە تایبەتە بە قوتابیانی خوێندنی باڵا لەو ماوەی دوو ساڵە هاوکارتان بێت تاکو توێژینەوەکانتان زیاتر بایەخ دارتربێت، هەروەها بتوانن توێژینەوەکانتان بڵاوبکەنەوە، ئەمانە هەمووی گرنگن سەبارەت بە قوتابیانی خوێندنی باڵا، ئومێدەوارین ئەو چالاکیەی ئەمڕۆ وانەیەک بێت بتوانن سوودی زیاتری لێوەربگرن ، دووبارە زۆر بەخێربێن، سەرکەوتووبن”.

دواتر دەستکرا بە بابەتەکانی وۆرکشۆپەکە کە لە لایەن هەریەک لە پ.د. ئەحمەد محەمەد ئەدهەم و پ.ی.د. ڕەنج سیروان عەبدوڵڵا دوو سیمیناری بەسوود و بۆ وەرگیراوانی ماستەرو دکتۆرا پێشکەش کرد.

پاشان دەرگای گفتوگۆ بۆ ئامادەبووان کرایەوە و راو سەرنجەکانیان ئاراستە کرد و وەڵام درانەوە.