Category Archives: سەرۆکایەتی زانکۆ

پ.د.ئیدریس محەمەدتاهیر هەرکی، سەرۆکی زانکۆی پۆلیتەکنیکی هەولێر لە میانی سەردانی فەرمی لەگەڵ شاندێکی باڵای وەزارەتی خوێندنی باڵا و توێژینەوەی زانستی بۆ بەریتانیا کە پێکهاتووە لە ژمارەیەک راوێژکار و بەڕێوەبەری گشتی و سەرۆکی زانکۆکانی سەڵاحەددین و سلێمانی و دهۆک و گەرمیان، سەردانی زانکۆی Loughboroughی کرد.

لە سیمینارێکدا سەرۆکی زانکۆی پۆلیتەکنیکی هەولێر تیشکی خستەسەر مێژوو و پێکهاتەی زانکۆی پۆلیتەکنیکی هەولێر و داتا و پڕۆگرامەکانی خوێندن لە زانکۆ، هەروەها پڕۆگرام و بەرنامەکانی خوێندنی باڵا و ژمارەی قوتابیانی خوێندنی باڵا لە دبلۆمی باڵا، ماستەر و دکتۆرای لە زانکۆماندا خستەڕوو.

دواتر پ.د.ئیدریس محەمەدتاهیر هەرکی، باسی لە پێداویستییەکانی ئەو بەشە زانستیانە کرد کە تازەن لە زانکۆماندا و وەک پێویستی بازاڕی کار کراونەتەوە و پێویستیان بە پالپشتی زیاترە.

پاشان دیاری و لۆگۆی زانکۆی Loughborough پێشکەش بە سەرۆکی زانکۆی پۆلیتەکنیکی هەولێر کرا و لای خۆیەوە پ.د.ئیدریس محەمەدتاهیر هەرکی لۆگۆ و دیاری زانکۆی پۆلیتەکنیکی هەولێری پێشکەش بە سەرۆکی زانکۆی Loughborough کرد.

لە کۆتاییدا سەرۆکی زانکۆی پۆلیتەکنیکی هەولێر و شاندی باڵای وەزارەتی خوێندنی باڵا و توێژینەوەی زانستی کۆلیژ و بەش و تاقیگەکانی زانکۆی Loughborough یان بەسەرکردەوە.

پ.د.ئیدریس محەمەدتاهیر هەرکی، سەرۆکی زانکۆی پۆلیتەکنیکی هەولێر لەگەڵ شاندێکی باڵای وەزارەتی خوێندنی باڵا و توێژینەوەی زانستی کە لە ژمارەیەک راوێژکار و بەڕێوەبەری گشتی و سەرۆکی زانکۆکانی سەڵاحەددین و سلێمانی و دهۆک و گەرمیان لە میانی سەردانێکی فەرمیدا بۆ بەریتانیا سەردانی زانکۆی نۆتینگهامی کرد.

شاندەکە کە دوێنێ یەکشەممە 3ی کانوونی یەکەمی 2023لەسەر بانگهێشتی British Council بەمەبەستی هاوبەشی و هەماهەنگیی نێوان زانکۆکانی هەرێمی کوردستان و وڵاتی بەریتانیا گەیشتە بەریتانیا، ئەمڕۆ دووشەممە لەگەڵ زانکۆی نۆتینگهامی کرد و بەشداریی لە چەند دیدار و کۆبوونەوەیەکدا کرد.

لە میانی دیدارەکاندا پ.د.ئیدریس محەمەدتاهیر هەرکی تیشکی خستە سەر پێکهاتەی زانکۆی پۆلیتەکنیکی هەولێر و ئەو بەشە زانستیانەی کە زانکۆمان پێویستییان بە هاوکاری و پشتیوانی زیاتر هەیە بەتایبەتی ئەو بەشانەی کە نوێن و لەسەر ئاستی هەرێمی کوردستان و ناوچەکەشدا دەگمەنن.

هاوکات تیشک خرایە سەر بە نێودەوڵەتیکردنی زانکۆ و بەشدارییکردن و هاوبەشیکردنی زانکۆمان لە بوارەکانی توێژینەوە و ئاڵوگۆڕی مامۆستایان و قوتابیان و پێداچوونەوە بە پڕۆگرامەکانی خوێندن و هاوکاری بۆ پێگەیاندنی مامۆستا لەو بوارانەی کە زانکۆمان پێویستی پێی هەیە.

دواتر سەرۆکی زانکۆی پۆلیتەکنیکی هەولێر لەگەڵ ئەمینداری گشتیی زانکۆی نۆتینگهام دیاری و لۆگۆی زانکۆیان پێشکەش بەیەکتر کرد.

پ.د.ئیدریس محەمەد تاهیر هەرکی، سەرۆکی زانکۆی پۆلیتەکنیکی هەولێر، بەمەبەستی لە نزیکەوە ئاگاداربوون لە کارەکان، سەردانی کۆلێژی تەکنیکی شەقڵاوەی کرد و لەلایەن پ.ی.د.عبدالخالق نارد، راگری کۆلیژ و یاریدەدەری راگر و ئەندامانی ئەنجوومەنی کۆلیژەوە پێشوازیی لێکرا.

 لە دانیشتنێکدا بە ئامادەبوونی پ.ی.د.نجیب توما بتو، یاریدەدەری سەرۆکی زانکۆی پۆلیتەکنیکی هەولێر بۆ کاروباری زانستی و راگر و یاریدەدری راگر و ئەندامانی ئەنجوومەنی کۆلێژەکە، باس لە رەوشی خوێندن لە کۆلیژەکە و پێداویستییەکانیان کرا.

دواتر سەرۆکی زانکۆ لەگەڵ یاریدەدەری سەرۆکی زانکۆی پۆلیتەکنیکی هەولێر بۆ کاروباری زانستی و راگر یاریدەدەری راگری کۆلیژی تەکنیکی شەقڵاوە و بەڕێوەبەری کارگێری و خۆیەتی زانکۆ کارەکانی دروستکردنی هۆڵی کۆنفرانسەکانیان بەسەرکردەوە کە لەسەر داهاتی زانکۆمان لە کۆلیژەکەدا لە قۆناغی کۆتایی جێبەجێکردندایە.

سەرۆکی زانکۆ وێڕای دەستخۆشی لە راگر و ستافی کۆلیژەکە بۆ ئەنجامدانی کارەکانیان بەشێوەیەکی رێک و پێک، هاوکات پشتیوانی خۆی و زانکۆی بۆ دووپات کردنەوە.

 

ڕۆژی دووشەممە 27ـی نۆڤەمبەری 2023، پ.د. ئیدریس محەمەد تاهیر هەرکی سەرۆکی زانکۆی پۆلیتەکنیکی هەولێر بە یاوەری پ.ی.د. نەجیب تۆما بتۆ یاریدەدەری سەرۆکی زانکۆ بۆ کاروباری زانستی و م. سەرمەند نەسرەدین بەڕێوبەری کارگێڕی سەرۆکایەتی زانکۆ، سەردانی پەیمانگەی تەکنیکی مێرگەسۆری کرد و لەلایەن ڕاگری پەیمانگە بەرێز د. طالب محەمەد شريف و ئەندامانی ئەنجومەنی پەیمانگە پێشوازییان لێکرا.

لەمیانی سەردانەکەیدا سەرۆکی زانکۆی پۆلیتەکنیکی هەولێر لەگەڵ راگر و ئەندامانی ئەنجومەنی پەیمانگە کۆبووەوە و چەند بابەتێکی گرنگی پەیوەست بە پەیمانگە تاوتوێکران.

هەر لە دیدارەکەدا د. ئیدریس دەستخۆشی لە راگر و ئەنجومەن و ستافی پەیمانگە کرد لە بەرامبەر ئەو خزمەتەی کە بە دامەزراوەکە دەیکەن هەروەها بەڕێزیان پاڵپشتی تەواوی خۆی دووپاتکردەوە بۆ پرۆژەکانی داهاتوو بۆ زیاتر برەودان بەو دامەزراوە ئەکادییمییە.

دواتر بەمەبەستی لەنزیکەوە ئاگاداربوون لە چۆنییەتی بەڕێوەچوونی کاروبارەکانی پەیمانگە و دەستنیشانکردنی کەم و کورتییەکان، سەرۆکی زانکۆ و شاندی یاوەری هۆبە و بەشە کارگێریەکانی پەیمانگەیان بەسەرکردەوە، هەروەها سەردانی پرۆژەی دروستکردنی یانەی قوتابییانیان کرد و لە نزیکەوە ئاگاداری چۆنیەتی جێبەجێ کردنی کارەکانی پرۆژەکە بوون.