Category Archives: سەرۆکایەتی زانکۆ

رۆژی یەکشەممە 12ی ئایاری 2024، بە ئامادەبوونی پ.د. ئیدریس محەمەد تاهیر هەرکی سەرۆکی زانکۆی پۆلیتەکنیکی هەولێر، پەیمانگەی تەکنیکی پزیشکی هەولێر مەراسیمێکی شایستەی بە بۆنەی ڕۆژی (جیهانی پەرستاران) لە سەرۆکایەتی زانکۆ ڕێکخست.

لە وتەیەکدا سەرۆکی زانکۆ بە بۆنەی ئەم رۆژە جیهانییەوە پیرۆزبایی لە تەواوی پەرستارانی جیهان و کوردستان کرد. بۆ ئەو خزمەتە زۆرەی کە پێشکەشی نەخۆشی دەکەن لە ناوەندە تەندروستییەکان و بە چینێکی گرنگ و کاریگەری کۆمەڵگەی لە قەڵەمدا.

پاشان پ.ی.د. تیران جمیل پیرۆ ڕاگری پەیمانگەی تەکنیکی پزیشکی هەولێر، پیرۆزباییەکی گەرمی لە گشت پەرستارانی جیهان و کوردستان کرد. لە پای ئەو ڕۆڵە گرنگەی، کە لە نەخۆشخانەکان دەیگێڕن لە خزمەت کردنی نەخۆش.

هەر لەو مەراسیمەدا کە یاریدەدەرانی سەرۆکی زانکۆ و ئەندامانی ئەنجومەنی زانکۆ و شاخەوان سلیم سەرۆکی لقی هەولێری سەندیکای کارمەندانی تەندروستی و مامۆستایان و پەرستاران و قوتابیانی بەشی پەرستاری ئامادەیبوون، سیمنارێکی تایبەت بە کارەکانی پەرستاران و فریاگوزاری سەرەتایی لە لایەن مامۆستایەکی پەیمانگەی تەکنیکی پزیشکی هەولێرەوە پێشکەشکرا.

لە کۆتایی رێوڕەسمەکەدا خەڵاتی ڕێزلێنان بەخشرایە ژمارەیەک پەرستار کە لە نەخۆشخانەکاندا ڕۆڵێکی گرنگیان هەیە لە خزمەتکردنی پەرستاری و نەخۆش لە نەخۆشخانەکان.

ئەمڕۆ یەکشەممە 12ی ئایاری 2024، لە درێژەی چالاکییەکانی هەفتەی رۆشنبیری قوتابیان، زانکۆی پۆلیتەکنیکی هەولێر لەژێر چاودێری پ.د.ئیدریس محەمەد تاهیر هەرکی سەرۆکی زانکۆ، سیمنارێکی بۆ مامۆستا جەمال مورتکە سازکرد لەژێر ناونیشانی (بۆچی کوردستانیان خاوەن کیانێکی سەربەخۆ نین؟ بۆ هەبوونی کیانێک دەبێت پلانمان بۆ داهاتوو چی بێت، ئاڵنگاری و بەربەستەکانی بەردەم هەبوونی کیانێکی سەربەخۆ چین؟)

لەسەرەتای سیمنارەکەدا کە سەرۆکی زانکۆی پۆلیتەکنیکی هەولێر و یاریدەدەرانی و ژمارەیەک لە ئەندامانی ئەنجومەنی زانکۆ، سەرۆک بەش و مامۆستایان و فەرمانبەران و قوتابیان ئامادەیبوون، لە لایەن پێشکەشکاری چالاکییەکەوە کورتەیەک لە ژیان و خەباتی مامۆستا جەمال بۆ ئامادەبووان خوێندرایەوە.

پاشان مامۆستا جەمال دەستیکرد بە پێشکەش کردنی سیمنارەکە و تیایدا وێرای سوپاس و دەستخۆشی لە سەرۆکی زانکۆ و ئەندامانی ئەنجومەن بۆ سازکردنی ئەو سیمینارەو بەشداری کردنی مامۆستایان و فەرمانبەران و قوتابیان گوتی: “خۆم بەخۆشحاڵ ئەمڕۆ لەگەڵ ئێوەی ئازیزو مامۆستایان و قوتابیانی زانکۆ کۆبوومەتەوە لەسیمینارێکدا کەڕێکخراوە لەلایەن مامۆستایانی زانکۆ و هەڤاڵانی زانکۆ، پێخۆشحاڵم ئەمڕۆ لەگەڵ ئێوەی بەڕێز و خۆشەویست، لەگەڵ ئێوەی سەرکردەی داهاتووی نەتەوەو نیشتیمانەکەمان، لەگەڵ ئێوەی هەڵگری قورسایی مێژووی خەباتی نەتەوەیی و نیشتمانیمانم، کەساڵەهای ساڵە باوک و باپیرانمان بەپێی مێژووی نەتەوەکەمان خەباتیان کردووە و ماندووبوونە و خوێنیان ڕشتووە و پارێزگاریان لەگەل و نیشتمان کردووە.

هەر لە سیمنارەکەدا مامۆستا جەمال بە تێر و تەسەلی باسی لە چەند وێستگەیەکی گرنگ و مێژوویی کوردستان و بزووتنەوەی ئازادی خوازی کوردستان و خەباتی کوردستان کرد لە سەرەتای دروست بوونی عێراقەوە تا دەگاتە ئەم قۆناغەی ئێستا و تیشکی خستە سەر کاریگەری وڵاتە زلهێزەکان لەسەر بە ئامانج نەگەیشتنی کوردستان.

دواتر دەرگای گفتوگۆ بۆ ئامادەبووان وەڵا کرا و چەند پرسیارێکیان ئاراستەکرد ولە لایەن بەڕێز مامۆستا جەمال مورتکەوە وەڵامدرانەوە.

دواتر پ.د. ئیدریس محەمەد تاهیر هەرکی سەرۆکی زانکۆ سوپاسی مامۆستا جەمالی کرد بۆ پێشکەشکردنی سیمنارەکەی و خەڵاتی رێزلێنانی بەخشییە بەڕێزیان، لە بەرامبەردا مامۆستا جەمال ژمارەیەک لە کتێب و بەرهەمی نووسینەکانی خۆی پێشکەش بە پ.د. ئیدریس و زانکۆی پۆلیتەکنیکی هەولێر کرد.

ئەمڕۆ پێنچ شەممە 9ی ئایاری 2024، بە ئامادەبوونی پ.د.ئیدریس محەمەد تاهیر هەرکی سەرۆکی زانکۆی پۆلیتەکنیکی هەولێر فێستیڤاڵی ساڵانەی کولتور و کەلەپوری کوردی لە کۆلێژی تەکنیکی کارگێری هەولێر بەڕێوەچوو.

لە فێستیڤاڵەکەدا یاریدەدەرانی سەرۆکی زانکۆ و ئەندامانی ئەنجومەنی زانکۆ و سەرۆک بەش و مامۆستایان بەشداربوون و تیایدا قوتابییانی کۆلێژی تەکنیکی کارگێڕی هەولێر بەپۆشینی جلوبەرگی کوردییەوە، خواردنی کوردەواری، کاری دەستییەکانیان نمایشکرد، کە سەرجەمیان لەلایەن قوتابییانەوە ئامادەکرابوون.

فێستیڤاڵەکە لەلایەن قوتابیانی هەر چوار بەشی کارگێری کار، تەکنیکی میدیا، تەکنیکی ژمێریاری و بازارگەری نێودەوڵەتی و زمان لە کۆلێژی تەکینیکی هەولێر ئامادەکرابوو.

لە درێژەی چالاکییەکانی هەفتەی رۆشنبیری قوتابییانی زانکۆ کە لەژێر چاودێری پ.د.ئیدریس محەمەد تاهیر هەرکی سەرۆکی زانکۆبەڕێوەدەچێت، ئەمڕۆ پێنج شەممە د. پشتیوان صادق وەزیری ئەوقاف و کاروباری ئاینی حکومەتی هەرێمی کوردستان، سیمینارێکی لەژێر ناونیشانی “دوا پێشهاتە سیاسییەکانی هەرێمی کوردستان” بۆ قوتابییانی زانکۆی پۆلیتەکنیکی هەولێر پێشکەش کرد.

 لە دەستپێکی سیمنارەکەدا کە یاریدەدەرانی سەرۆکی زانکۆ و ژمارەیەک لە ئەندامانی ئەنجومەنی زانکۆ و مامۆستایان و قوتابییان ئامادەیبوون د. پشتیوان صادق وەزیری ئەوقاف و کاروباری ئاینی گووتی: “زۆر خۆشحاڵم ئەمڕۆ لەگەڵ ئێوەی ئازیزو خۆشەویستدام، سوپاسی سەرۆکی زانکۆ و ئەندامانی ئەنجومەن دەکەم بۆ ئامادەکاری بۆ پێشکەشکردنی ئەو سیمینارە، ئەمڕۆ ڕۆژێکی جیاوازە بۆ من چونکە لەگەڵ توێژێکم کە داهاتووی کوردستانن.”

وەزیری ئەوقاف لە سمینارەکەدا، باسی لەوەکرد حکومەتی هەرێمی کوردستان گرنگییەکی زۆر بە کەرتی پەروەردە و خوێندن و هەروەها بە توێژی قوتابیان دەدات، تاوەکو لە ڕێگای زانست و مەعریفەکانیان، کۆمەڵگایەکی داهێنەر و بەرهەمدار دروست بکات.

لە بەشێکی تری سمینارەکەدا، رایگەیاند لە هەرێمی کوردستان، لە هەموو بوارەکان خزمەتێکی زۆر کراوە و دەستکەوتی مەزن بەدەستهاتوون، تەنها لە سێکتەری پەروەردە و خوێندنی باڵا، ئێستا خاوەن دەیان زانکۆ و پەیمانگە و هەزاران قوتابخانەین، بۆیە دڵنیابن ئایندەمان زۆر گەش و رووناکە و کوردستانیش بەردەوام دەبێت لە گەشەسەندن و پێشڤەچوون و ئاوەدانی و ئارامی زیاتر.

د. پشتیوان صادق کە هاوکات ئەندامی مەکتەبی سیاسی پارتی دیموکراتی کوردستانیشە ئاماژەی بەوەکرد، “هەرێمی کوردستان لە رووی پەیوەندی سیاسی و دبلۆماسی و نێودەوڵەتیەکان، زۆر بەهێزە و  ڕۆژ لە دوای ڕۆژ لە پێشکەوتن و بەرەوپێشچوون دایە، بۆیە پێویستە ئێوەی قوتابی کە دواڕۆژی ئەم ووڵاتەن، هەوڵی پێشخستنی زانست و زانیاری خۆتان بدەن و هەمیشە بە چاوی پڕ لە خۆشەویستی و ڕێزەوە سەیری ئەم خاک و نیشتمان بکەن، کە بە خوێنی ئاڵی هەزاران شەهید هاتۆتە بەرهەم.”

دواتر دەرگای گفتوگۆ بەڕووی ئامادەبوواندا کرایەوە پرسیارەکانیان ئاراستە کرد و لە لایەن بەڕێزیانەوە وەڵامی پێویست درانەوە، لە کۆتاییشدا پ.د. ئیدریس محەمەد تاهیر هەرکی سەرۆکی زانکۆ، خەڵاتی رێزلێنان و پلاکێتی تایبەت بە زانکۆی پێشکەش بە بەڕێز د. پشتیوان صادق کرد و سوپاسی بەڕێزیانی کرد بۆ پێشکەشکردنی سیمنارەکەی.