Category Archives: سەرۆکایەتی زانکۆ

رۆژی چوارشەممە 20ی دیسەمبەری 2023، پ.د. ئیدریس محەمەد تاهیر هەرکی سەرۆکی زانکۆ سەردانی سەنتەری پێداگۆجی کرد و لە نزیکەوە بەشداری کرد لە وانەیەکی ئەو خولە و تیایدا وتەیەکی پێشکەش کرد دەربارەی لێهاتوویی و کاراماییەکانی مامۆستای سەردەم هەروەها ئەو تایبەتمەندییانەی کە پێویستە مامۆستای سەردەم بە دەستی بهێنێت و گوتی: “پێویستە مامۆستا ژینگەی فێربوون بکات بە ژینگەیەکی فێربوونی سەردەمی لە ڕێی ئەم لێهاتوویی کاراماییانەوە هەوڵ بدات کە وا لە فێرخوازان بکا کۆمەڵە لێهاتوویی و کارامەیەک بە دەست بهێنن کە بە کردار سوودی لێوەرگرن بێ بۆ ئەوەی لە بازاڕی کاردا جێی خۆیان بکەنەوە”.

لە بەشێکی دیکەی وتەکانیدا سەرۆکی زانکۆ بەپێویستی زانی کە مامۆستا لینکێک یاخود پەیوەندییەک لەگەڵ بازاڕی کار دروست بکات بۆ ئەوەی لە ڕێیەوە بزانێت پێداویستییە سەردەمییەکانی بازاڕی کار چییە لێهاتوو کارامەیەکانی کە بازاڕی کار پێویستی پێی چییە بۆ ئەوەی لەسەر ئەو بنەمایە پڕۆگرامی خوێندنی خۆی دابڕێژێ، بەمەش زانکۆ دەبێتە ئەو دامەزراوەیەی کە بە کردارەکی خزمەتی بە کۆمەڵگە بکات.

لە کۆتایی وتەکەیدا د. ئیدریس دەستخۆشی لە سەنتەری پێداگۆجی و مامۆستایان و سەرپەرشتیارانی خولەکە رد و هیوای سەرکەوتنی بۆ بەشداربووانی خولەکە خواست.

لە درێژەی کار و چالاکییەکانی ڕێکخراوی (IREX)ی ئەمریکی لەڕێگەی سەنتەرەکانی کاری زانکۆکان، پۆلێک لە قوتابیانی زانکۆی پۆڵی تەکنیکی هەولێر لە چالاکییەکی نێودەوڵەتی شان بە شانی زانکۆکانی عێراق و ئەمەریکا و ئوردن بۆ ماوەی (٨) ھەفتە بەشداربوون.

چالاکییەکە بریتی بوو لە پێشبرکێیەک لە ژێر ناونیشانی (Global Solutions Sustainability Challenge), تایبەت بوو بە دۆزینەوەی چارەسەرێک بۆ یەکێک لە ئاڵنگارییەکان لە ڕێگەی دورستکردنی بەرھەمێک و ناساندنی بۆ بازاڕی کار. قوتابییانمان توانییان بەرھەمێک بۆ مەبەستی گشتوکاڵ و کاتی وشکەساڵی پێشکەش بکەن.

شایانی باسە، تیمی زانکۆمان لە قۆناغی پێش کۆتایی توانی یەکێک بێت لە (٥) تیمی سەرکەوتوو. لە قۆناغی کۆتایش وەک تاکە زانکۆی ھەرێمی کوردستان و عێراق توانی پارێزگاری لە مانەوەی بکات. لەسەر ئاستی جیھانیش توانی پلەی دووەم بەدەست بێنێت و ببێتە یەکێک لە براوەکانی خەڵاتی دارایی چالاکییەکە. جێگەی دڵخۆشییە، تیمەکەی زانکۆمان (Team 1 the Rising Sun) لە لایەن ئامادەبووانەوە پێشوازییەکی گەرمی لێکرا و توانیمان زۆرترین ژمارەی دەنگ بۆ تیمی دڵخواز بەدەست بێنین، ئەمەش لە ئەنجامی پێشکەشکردنی ئەدایەکی نایابەوە بوو.

وەک سروشتی چالاکییەکان، تیمی زانکۆکانی عێراق و ئوردن لەگەڵ تیمی زانکۆکانی ئەمریکا یەکدەگرن بەمەبەستی دروستکردنی تیمێکی نێودەوڵەتی. بۆ ئەم جارە تیمی زانکۆمان لەگەڵ تیمی (Lone Star College, Houston, Texas )ی ویلایەتە یەکگرتووەکانی ئەمەریکا یەکیان گرت.

شایانی باسە، تیمی زانکۆ لە لایەن مامۆستایان (سەروان سدیق حەسەن و ئەژین صابر علی) مامۆستایانی بەشی شیکاری کۆلێژی تەکنیکی شەقڵاوە سەرپەرشتی دەکران.

ئەم سەرکەوتنە مەزنە پیرۆز بێت لە تەواوی قوتابی، مامۆستا و فەرمانبەرانی زانکۆ.

 

رۆژی یەکشەممە 17ـی 12ـی 2023، بە ئامادەبوونی پ.د. ئیدریس محەمەد تاهیر هەرکی و ژمارەیەک ئەندامی ئەنجومەنی زانکۆ مامۆستایان و فەرمانبەران و قوتابییان، چەند چالاکی و رێوڕەسمی شایستە بۆ رۆژی ئاڵا لە سەرۆکایەتی و هەردوو کامپی یەک و دووی زانکۆی پۆلیتەکنیکی هەولێر بەڕێوەچوو.

لە دەستپێکدا سەرۆکی زانکۆ وتەیەکی پێشکەشکرد و تیایدا خۆشحاڵی خۆی دەربڕی بە یادکردنەوەی ئەو بۆنە پیرۆزە و گوتی: “ئەگەر بگەڕێینەوە بۆ مێژوو، دروستکردنی ئاڵا مێژوویەکی زۆرکۆنی هەیە و بەپێی سەرچاوە مێژووییەکان، بیرۆکەی بەکارهێنانی ئاڵا لە وڵاتانی هیندستان و چین سەریهەڵداوە، پاشان لە باشووری رۆژهەڵاتی ئاسیا بڵاوبووەتەوە.

لە سەدەکانی ناوەڕاستدا ئاڵاکان بۆ چەند مەبەستێکی جۆراوجۆر بەکار دەهێنراون وەک دیاریکردنی شوناس و جیاکردنەوەیی چینایەتی لە شارەکاندا، هاوکات بۆ پەرستگا و شوێنە ئاینیی و بۆنە و یادە ئاینییەکان، هەروەها لە جەنگ و شۆڕشەکانیش بەکارهاتووە و هەر سوپایەک ئاڵای تایبەت بە خۆی هەبووە.

نەتەوەی کوردیش وەک هەر نەتەوەیەکی دیکەی جیهان ئاڵای تایبەت بەخۆی هەبووە بەپێی قۆناغەکانی مێژوو گۆڕانکاری بەسەر شێوە و رەنگاکانیدا هاتووە.

ئەو ئاڵایەی کە ئەمڕۆ ئێمە لێرەدا بە شانازییەوە بەرزی دەکەینەوە، ئاڵای یەکەم کۆماری کوردستانە کە لەلایەن پێشەوا قازی محەمەدەوە هەڵکرا.

لەدوای رووخانی کۆماری کوردستان، لەبەر گرنگی و بایەخ و پیرۆزی ئاڵا، پێشەوا قازی تاکە یادەوەری کۆمار کە ئاڵای کوردستان بوو، رادەستی جەنەڕاڵ مستەفا بارزانی کرد.

لە دوای راپەڕینیشەوە، ئەنجوومەنی نیشتمانی کوردستان بە بڕیاری ژمارە ٤٨ لە ١٩ی حوزەیرانی ٢٠٠٤، رۆژی ١٧ی١٢ی وەک رۆژی هەڵکردنی ئاڵای کوردستان دیاریکرد.

لە مێژووی پڕ خەبات و سەروەریی گەلی کوردستاندا ئاڵا پیرۆزی خۆی هەبووە و هەیە و لەم پێناوەشدا سەدان قوربانی بۆ پاراستن و پارێزگاریکردنی دراوە.

ئەگەر چی دەسەڵاتە یەک لەدوای یەکەکانی عێراق هەمیشە پلانیان لاوازکردن و لەناوبردنی کورد بووە و بۆ ئەمەش لە چەند قۆناغێکدا رووبەڕووی خەباتی چەکداریی گەلی کوردستان بوونەتەوە، بەڵام ئاڵای کوردستان هەمیشە وەک رەمز و هێمای سەرکەوتن هەر بە شەکاوەیی ماوەتەوە.

لەکاتێکدا کە گەلانی جیهان شانازی بە شوناس و ئاڵای خۆیانەوە دەکەن، ئێمەش وەک گەلی کورد شانازی بە پیرۆزی ئاڵامانەوە دەکەین و لەژێر فەرمایشتی جەنابی سەرۆک مەسعود بارزانی، هەموو دەقیقەیەک ئامادەین لەژێر سێبەری ئەو ئاڵایە و بۆ ئەو ئاڵایە بمرین.

ئومێدەوارین رۆژێک بێت ئاڵای کوردستانمان لەتەک ئاڵای وڵاتانی جیهان لەبەردەم بارەگای نەتەوەیەکگرتووەکان و لە ناوەندە نێودەوڵەتییەکاندا بشەکێتەوە.

بەرز و پیرۆزبێت رۆژی هەڵکردنی ئاڵای کوردسان لە کوردستان خۆراگر و ئاوەدان.

هەموولایەکتان بەخێربێن ودووبارە سوپاس بۆ ئامادەبوونتان.”

دواتر بە پێشکەشکردنی چەند پارچە هۆنراوەیەکی تایبەت بە ئاڵا و کوردستان لە لایەن مامۆستایان و فەرمانبەران و قوتابییانەوە یادەکە رازاوەتر کرا.

 

پ.د.ئیدریس محەمەدتاهیر هەرکی، سەرۆکی زانکۆی پۆلیتەکنیکی هەولێر هەفتەی رابردوو لەگەڵ شاندێکی باڵای وەزارەتی خوێندنی باڵا و توێژینەوەی زانستی کە لە ژمارەیەک راوێژکار و بەڕێوەبەری گشتی و سەرۆکی زانکۆکانی سەڵاحەددین و سلێمانی و دهۆک و گەرمیان لەسەر بانگهێشتی British Council سەردانێکی فەرمی بۆ بەریتانیا ئەنجامدا.

‎ئامانجی سەرەکی سەردانی شاندەکە دروستکردنی هاوبەشی و هەماهەنگیی بوو لەنێوان زانکۆکانی هەرێمی کوردستان و وڵاتی بەریتانیا و لەم چوارچێوەیەشدا سەردانی ژمارەیەک لە زانکۆکانی ئەو وڵاتە کرا و زنجیرەکە کۆبوونەوە و دیداری ئەکادیمی و زانستی ئەنجامدرا.

‎لە میانی سەردانی شاندی باڵای وەزارەتی خوێندنی باڵا و توێژینەوەی زانستی هەرێمی کوردستان بۆ زانکۆی نۆتینگهام، پ.د.ئیدریس محەمەدتاهیر هەرکی تیشکی خستە سەر پێکهاتەی زانکۆی پۆلیتەکنیکی هەولێر و ئەو بەشە زانستیانەی کە زانکۆمان پێویستییان بە هاوکاری و پشتیوانی زیاتر هەیە بەتایبەتی ئەو بەشانەی کە نوێن و لەسەر ئاستی هەرێمی کوردستان و ناوچەکەشدا دەگمەنن.

‎هاوکات تیشک خرایە سەر بە نێودەوڵەتیکردنی زانکۆ و بەشدارییکردن و هاوبەشیکردنی زانکۆمان لە بوارەکانی توێژینەوە و ئاڵوگۆڕی مامۆستایان و قوتابیان و پێداچوونەوە بە پڕۆگرامەکانی خوێندن و هاوکاری بۆ پێگەیاندنی مامۆستا لەو بوارانەی کە زانکۆمان پێویستی پێی هەیە.

‎هەر لە میانی سەردانی شاندی باڵای وەزارەتی خوێندنی باڵا و توێژینەوەی زانستی هەرێمی کوردستان بۆ بەریتانیا، سەردانی زانکۆی لاڤبرا کرا و لەوێ سەرۆکی زانکۆی پۆلیتەکنیکی هەولێر سیمینارێکی پێشکەش کرد.

‎لە سیمینارەکەدا، پ.د.ئیدریس محەمەدتاهیر هەرکی تیشکی خستەسەر مێژوو و پێکهاتەی زانکۆی پۆلیتەکنیکی هەولێر و داتا و پڕۆگرامەکانی خوێندن لە زانکۆ، هەروەها پڕۆگرام و بەرنامەکانی خوێندنی باڵا و ژمارەی قوتابیانی خوێندنی باڵا لە دبلۆمی باڵا، ماستەر و دکتۆرای لە زانکۆماندا خستەڕوو.

‎دواتر سەرۆکی زانکۆی پۆلیتەکنیکی هەولێر باسی لە پێداویستییەکانی ئەو بەشە زانستیانە کرد کە تازەن لە زانکۆماندا و وەک پێویستی بازاڕی کار کراونەتەوە و پێویستیان بە پالپشتی زیاترە.

‎هەر لە میانی سەردانەکەیدا بۆ بەریتانیا، شاندەکە سەردانی هەردوو زانکۆی ئەستۆن و ساسێکس-یان کرد و دوای دیدار و کۆبوونەوەکانیان تاقیگە و بەشە زانستییەکانی زانکۆکانیان بەسەرکردەوە.

‎سەرۆکایەتی زانکۆمان پلانی ئەوەی داناوە کە پەیوەندی ئەکادیمی و زانستی درێژخایان لەگەڵ ئەو زانکۆیانە دابنێت و بەداواداچوون بۆ ناوەڕۆکی ئەو لێکتێگەیشتنانە بکات کە لەگەڵ ئەو زانکۆیانەدا دروستکراون.