Author Archives: karez hamad

راگری پەیمانگە سەردانی کونسوڵخانەی هیندستان لە هەولێر دەکات

رۆژی دووشەممە 4ی دیسەمبەری 2023، د. طالب محەمەد شەریف راگری پەیمانگەی تەکنیکی مێرگەسۆر سەردانی کونسوڵخانەی هیندستانی لە هەولێر کرد و لەلایەن بەڕێز مادان گۆپال کونسوڵی گشتی وڵاتی هیندستانەوە پێشوازی لێکرا.

لە دیدارێکدا گفتوگۆکرا لەبارەی پەیوەندییەکانی پەیمانگەی تەکنیکی مێرگەسۆر و زانکۆ و کۆلێژەکانی ئەو وڵاتەوە کە لەماوەی رابردوودا بەڕێز راگر سەردانی ئەو وڵاتەی کردبوو.

تەوەرێکی دیکەی کۆبوونەوەکە تایبەت بوو بە کردنەوەی گۆشەیەک لە پەرتوکخانەی پەیمانگە بەناوی گۆشەی پەرتوکخانەی هیندستان کە تیایدا ژمارەیەکی بەرچاو لە سەرچاوە گرنگەکانی تایبەت بە بوارەکانی (پزیشکی، پەرستاری، کشتوکاڵی، دەرمانی گیایی، هەنگەوانی، کارگێڕی و زمانی ئینگلیزی) لە خۆدەگرێت.

لەلای خۆیەوە کونسوڵی نوێی هیندستان لە هەولێر بەڵێنیدا وەک کونسوڵخانە بەردەوام بن لە پەیوەندییەکانیان لەگەڵ پەیمانگە و زیاتر بەرەوپێشەوەی ببەن و ئامادەی هەر هاوکارییەک دەبن لە بواری ئەکادیمی و زانستی.

ڕاگەیاندنی پەیمانگەی تەکنیکی مێرگەسۆر

سەرۆکی زانکۆی پۆلیتەکنیکی هەولێر سەردانی پەیمانگەی تەکنیکی مێرگەسۆر دەکات

ڕۆژی دووشەممە 27ـی نۆڤەمبەری 2023، پ.د. ئیدریس محمد تاهیر هەرکی سەرۆکی زانکۆ، پ.ی.د. نەجیب تۆما بتۆ یاریدەدەری سەرۆکی زانکۆ بۆ کاروباری زانستی و مامۆستا سەرمەند نەسرەدین بەڕێوبەری کارگێڕی سەرۆکایەتی زانکۆ، سەردانی پەیمانگەی تەکنیکی مێرگەسۆریان کرد و لەلایەن ڕاگری پەیمانگە بەرێز د. طالب محمد شريف و یاریدەدەری ڕاگر و ئەندامانی ئەنجومەنی پەیمانگە پێشوازییان لێکرا.

لەمیانی سەردانەکەیدا سەرۆکی زانکۆی پۆلیتەکنیکی هەولێر لەگەڵ راگر و ئەندامانی ئەنجومەنی پەیمانگە کۆبووەوە و چەند بابەتێکی گرنگی پەیوەست بە پەیمانگە تاوتوێکران.

هەر لە دیدارەکەدا د. ئیدریس دەستخۆشی لە راگر و ئەنجومەن و ستافی پەیمانگە کرد لە بەرامبەر ئەو خزمەتەی کە بە دامەزراوەکە دەیکەن هەروەها بەڕێزیان پاڵپشتی تەواوی خۆی دووپاتکردەوە بۆ پرۆژەکانی داهاتوو بۆ زیاتر برەودان بەو دامەزراوە ئەکادییمییە.

دواتر بەمەبەستی لەنزیکەوە ئاگاداربوون لە چۆنییەتی بەڕێوەچوونی کاروبارەکانی پەیمانگە دەستنیشانکردنی کەم و کورتییەکان، سەرۆکی زانکۆ و شاندی یاوەری هۆبە و بەشە کارگێریەکانی پەیمانگەیان بەسەرکردووە.

راگەیاندنی پەیمانگەی تەکنیکی مێرگەسۆر

بەناوی خودای گەورەو میهرەبان
رێزدار جەنابی مەلا مستەفا بارزانی
بەڕێزان میوانانی قەدرگرانی حکومى و حزبی
خانەوادەی قوتابییان
دەرچووانی ئازیزى پەیمانگەکەمان
مامۆستایانی خۆڕاگر
ئەم کاتەتان باش
هەست بە خۆشحاڵییەکى لە رادەبەدەر و شانازییەکى مەزن دەکەم، ئەمڕۆ وەک یەکەم راگرى پەیمانگەی تەکینکی مێرگەسۆر لە ژێر دروشمی خولی( خۆڕاگری و خۆبنیاتنان) لەبەردەمتان وەستاوم و، وتارى نۆبەرەى دەرچووانى پەیمانگەکەمانتان پێشکەشدەکەم؛ لە ناخى دڵەوە و بە ناوى تەواوی ئەنجومەنی پەیمانگەی تەکنیکی مێرگەسۆر، زۆر بە گەرمی بەخێرهاتنتان دەکەم بۆ رێوڕەسمى یەکەمین خولى دەرچووانی پەیمانگەی تەکنیکی مێرگەسۆر- زانکۆی پۆلیتەکنیکی هەولێر بۆ سالی خوێندنی 2022-2023
ئامادەبووانی هێژا….
ئەمڕۆ دواى دووساڵ خویندن و، بە دەستهێنانى ئەزموونێکى دەوڵەمەند، پۆلێک لە قوتابییانی ئازیزی پەیمانگەکەمان، بروانامەی دەرچوون/ دبلۆمی تەکنیکی لە دوو پسپۆریەتی جیا (کارگێڕی کاروتەکنیکی وەرگێڕان) وەردەگرن و، ئامادە دەبن بۆ قۆناغێکی تری ژیانیان، کە قۆناغى بەکارهێنانى زانست و زانیارییەکانیانە بۆ خزمەتکردنى کۆمەڵگە.
قوتابییانی ئازیز..
پەیمانگەکەتان، یەکەمین ناوەندی ئەکادیمی و تەکنیکیی خوێندنی بالایە لە سنوری قەزای مێرگوسۆر، کە لە سالی 2019 فەرمانی وزاری بۆ دەرچووەو لە ساڵی 2021یەکەم کاروانی قوتابیانی خۆی وەرگرتووە ؛ لەو تەمەنە کورتەدا، سەرەڕاى هەموو ئاڵنگارى و سەختییەکان، کە پەیوەست بوون بە بنیاتنانى پەیمانگەیەک لە سفرەوە، هەنگاوی باشی لە بواری ئەکادیمی و توێژینەوەی زانستی و پێشخستنی توانا مرۆییەکان و، پەیوەندی نێوخۆیی و نێودەوڵەتی ناوە و، چووەتە ئاستێکی بەرزەوە و، بووەتە مایەى ئومێدى خەڵکى دەڤەرەکە. ئەمە جگە لەوەى کە هەر لە سەرەتاى دامەزراندنییەوە، هەوڵمانداوە بیکەینە بەشێک لە کۆمەڵگە و کاریگەرى لەسەر دەورووبەرى خۆمان دابنێین. بەخۆشییەوە لەمبارەشەوە، بە ئەنجامى زۆر باش گەیشتووین، کە مایەى خۆشحاڵییە.
دەرچووانی خۆشەویست.
لە کاتێکدا ئێمە لێرە کۆدەبینەوە بۆ ئاهەنگگێڕانی سەرکەوتنەکانتان و، چنینەوەى دەسکەوتەکانتان، پێویستە سەرەتاى بیرکردنەوەش بێت لەوەى، کە رێگاى زانست، رێگایەکى ئاڵۆز و پڕ کەند و لەندە. رێگایەکە کە پێویستى بە شەونخونى و رامانى رەخنەگرانە و داهێنەرانە هەیە؛ رێگایەکە کە پێویستی بە خۆپەروەردەکردنى بەردەوام و کۆڵنەدان و ماندوونەناسى هەیە. پێویستە ئەوە بزانن، بە هەبوونى ئەم تایبەتمەندییانە و، کردنیان بە بەشێک لە رۆتێنى ژیانتان، سەرکەوتنتان هەروەکو ئێستا، لە داهاتووشدا مسۆگەرە. ئێوە بەوتایبەتمەندییانەوە، بە لێهاتوویى پێویست دەگەن و، زۆر بە هێزەوە تواناى رووبەڕووبوونەوەى ئاڵنگارى و کێشە ئاڵۆزەکانى دنیاى دەورووبەرتان دەبێ.
دنیایەک کە گۆڕانکارییەکانى خێرا و بەردەوام و، هەلومەرجەکانى بەردەمى ناڕوون و نادڵنیان. بۆیە لێرەوە، بەرپرسیارێتییەکى گەورە دەکەوێتە سەرشانتان و، وەک هێزى کارى پسپۆڕ، پێویستە بەردەوامبن لەبەرەو پێشبردنى حیکمەت و لێزانى خۆتان و، خۆتان بۆ ئەو رووبەڕووبوونەوەیە ئامادە بکەن. ئەمە جگە لەوەى کە دنیاى دەرەوەى زانکۆ، ئەگەر هەلێکى کارى تێدا هەبێ، بە تەواوى پەیوەستە بە توانا و لێهاتووییەکانتان و، چۆنیەتى پەرەپێدانى بەردەوامى ئەو لێهاتووییانە.
ئێمە دڵنیاین، خوێندنى دوو ساڵى ئێوە لە پەیمانگەکەمان، لەژێر تیشکى بەرنامەیەکى زانستى تۆکمە و، بە هەوڵ و ماندووبوونى ژمارەیەک مامۆستای دڵسۆزوخۆراگر، هەوێنی دەوڵەمەندى رێڕەوى داهاتووى ژیانتان دەبێت و، هیوادارین بە ئێتیک و ئەخلاقێکى بەرزەوە، بتوانن سوود لە پسپۆڕى و زانیارییەکانتان وەرگرن.
بەرێزان:
دەمەوێت لە قولایی دلەوە سوپاسی رێزدار (مەسرور بارزانی) سەرۆکی حکومەتی هەرێمی کوردستان و، هەموو دامەزراوە پێوەندیدارەکانى حکومەتى هەرێمى کوردستان بکەم، کە هەمیشە سەرەڕاى کێشە و بەربەستە زۆرەکانى بەردەمیان، لەخۆبردووانە و دڵسۆزانە یارمەتیدەرمان بوون بۆ گەیاندنى پەیمانگەکەمان بەمڕۆ.
ئازیزان
زۆر بە پێویستی دەزانم سوپاسێکی تایبەتی جەنابی (ملامستەفا بارزانی) و، نووسینگە بەرێزەکەیان،بکەم، کە لەم کاروانە زانستییەدا دەستیان گرتین، ئومێدیان پێبەخشین بۆ ئەنجامدانى کارى مەزن و بەردەوام.
هاوکات لەگەڵ پیرۆزبایى، سوپاسى بنەماڵەى بەڕێز و، هێژاى قوتابییەکانمان دەکەم، بۆ پشتگیرى بێ دریغى جگەرگۆشەکانیان، کە بێگومان ئەم سەرکەوتنە پشکێکى مەزنى ئەوانیشى تێدایە. هەروەها هەموو ئەو کەسایەتى و ئازیزانەش جێگاى رێز و ستایشن.
لە هەمان کاتدا، نابێت ڕۆڵی یەکێتی قوتابییانی کوردستان لە بیربکرێت کە هەردەم پالپشتی پەیمانگە و قوتابییەکانمان بوونە لە کاروچالاکیەکاندا. هەروەها سوپاسی لێژنەی ئامادەکاری ئاهنگی دەرچووانی پەیمانگەکەمان دەکەم کە شەو رۆژیان کردۆتە یەک بۆ سەرخستنی ئەم مەراسیمە هەژیە.
لە کۆتاییدا، دەمەوێت بڵێم، قوتابییانى ئازیز، ئەمڕۆ ئەگەرچى کۆتایى قۆناغێکى ئەکادیمتانە، بەڵام سەرەتاى قۆناغگەلێکى دیکەى دووروو درێژی ژیانتانە. ئومێدم وایە هەمیشە شەوقى سەرکەوتن وەها لەچاواکانتدا،ببریسکێتەوە. زانست و پەرەپێدان، هەولە بۆ ئەوەی ژیانی مرۆڤی کوردستانی خۆشتربکرێت، وە ئاستی رۆشنبیری و زانیاری خوێندن بەرزتربێت و، نیشتیمانسازی و ئایندەسازی لەناو هزری کوردستانیان پتەوتربێت.
جارێکی تربەخێربێن و، پیرۆزبایى لە یەکەمین خولى دەرچووانی پەیمانگەکەمان [پەیمانگەی تەکینکی مێرگەسۆر] دەکەم. شانازیتان پێوە دەکەین و، هیوادارین هەمیشە سەرکەوتوبن و، ئێرە بە ماڵى گەورەی ئەکادیمی خۆتان بزانن.
کوردستانیش هەر ئاوەدان و، خۆراگرو، خۆ بنیاتنەر بێت.

زۆر سوپاس

مامۆستایەکی پەیمانگەی تەکنیکی مێرگەسۆر بڕوانامەی دکتۆرای بەدەستهێنا

رۆژی چوارشەمە ڕێکەوتی ٢٠٢٣/١١/٢٢ گفتوگۆی نامەی دکتۆرا قوتابی خوێندنی باڵا ” سەربەست ناسر احمد مامۆستا لە پەیمانگەی تەکنیکی مێرگەسۆر لە زانکۆی سۆران – فاکەلتی پەروەردە – بەشی پەروەردەی جەستەیی و زانستە وەرزشییەکان ئەنجامدرا .

تێزی دکتۆراکە بە ناونیشانی “دراسة مقارنة بين مسافتين مختلفين في بعض المتغيرات الميكانيكية للمسار الحركي للثقل في قسم الرفع إلى الصدر CLEAN لرافعي الأثقال” بوو.

بەناوی ڕاگرایەتی پەیمانگەی تەکنیکی مێرگەسۆر پیرۆزبای لە بەرێزیان دەکەین هیوای سەرکەوتنی زیاتری بۆدەخوازین.

ڕاگەیاندنی پەیمانگەی تەکنیکی مێرگەسۆر.