Author Archives: Hallo Majed

نوێنەری زانکۆی پۆلیتەکنیکی هەولێر بەشداری لە کۆنفرانسی زانکۆکانی عەرەبی بۆ کاروباری تۆمار و وەرگرتن کرد کە لە رێکەوتی 18/12/2023 تا 21/12/2023 لە ووڵاتی تونس بەردەوام بوو.

پ.ی.د.سەرسام خلیل عمر بەڕێوەبەری تۆماری گشتی و ئەندام لە ڕێکخراوی زانکۆکانی عەرەبی بۆ بەرپرسانی تۆمار و وەرگرتن وەک نوێنەری زانکۆی پۆلیتەکنیکی هەولێر بەشداری لە کۆنفرانسی ژمارە 40 ی ڕێکخراوەکە کرد کە بۆ ئەم ساڵ لە زانکۆی تونس المنار لە ووڵاتی تونس ئەنجام درا.

نوێنەرەکەی زانکۆی پۆلیتەکنیکی هەولێر لە پەراوێزی ئەو کۆنفرانسەدا چەندین کۆبوونەوە و چاوپێکەوتنی گرنگی ئەنجام دا لەگەڵ باڵێوزی عێراق لە تونس و نوێنەری زانکۆ بەشداربووەکانی کۆنفرانسەکە بەمەبەستی ئاڵوگۆری زانیاری و پتەو کردنی پەیوەندییەکان لە بواری تۆمار و وەرگرتن و لە پێناو زیاتر خزمەت کردنی قوتابیانی زانکۆمان.

 

مامۆستایەکی کۆلێژی تەکنەلۆجی هەولێر بە نوێنەرایەتی زانکۆی پۆلیتەکنیکی هەولێر بەشداری کرد لە خولێکی راهێنان لە ژێر ناونیشانی (3D Scanning in Additive manufacturing) کە لە رۆژانی 11 تا 15ی 12ی 2023، لە زانکۆی فرایبێرگ بەڕێوەچوو.

ئەم خولە بە سپۆنسەری رێکخراوی (DAAD) ئەڵمانی بەڕێوەچوو و د. دلێر عەبدوڵڵا ئەحمەد مامۆستا لە کۆلێژی تەکنەلۆجی هەولێر بەشداری تێدا کرد. کە لە لایەن (Prof. Dr. Zeidler) وەک سەرپەرشتیاری خول و (Dr.  Abdulkader Kadauw) وەک سەرۆکی پرۆژە و رێکخەری پرۆژە و خولەکە بەڕێوەچوو.

 

پ.د.ئیدریس محەمەد تاھیر ھەرکی، سەرۆکی زانکۆی پۆلیتەکنیکی ھەولێر سەردانی پەیمانگای تەکنیکی پزیشکی ھەولێری کرد و لەلایەن پ.ی.م.ئومێد ئەرشەد حەوێزی راگری پەیمانگا و یاریدەدەر راگر و ژمارەیەک لە سەرۆک بەشەکانەوە پێشوازیی لێکرا.

دواتر سەرۆکی زانکۆ لەگەڵ قوتابیانی بەڵگەکانی تاوان کۆبووەوە کە وەک یەکەم بەشی زانستی لەسەر ئاستی زانکۆکانی عێراق لە پەیمانگای تەکنیکی پزیشکی ھەولێر تایبەت بە کارمەندانی وەزارەتی ناوخۆی ھەرێمی کوردستان کراوەتەوە.

سەرۆکی زانکۆ ئاماژەی بە گرننگی خوێندن لەو بەشە زاننستییە کرد و ھەموو پشتیوانییەکی زانکۆی بۆ دووپات کردنەوە.

ھاوکات پ.د.ئیدریس محەمەد تاھیر ھەرکی پێشانگایەکی شێوەکاری تایبەت بە قوتابیانی کچ لە پەیمانگای تەکنیکی ھەولێر کردەوە.

دوای بەسەرکردنەوەی پێشانگاکە، سەرۆکی زانکۆ دەستخۆشی لە رێکخەرانی پێشانگاکە و ئەو قوتایبانە کرد کە بەرھەم و کارەکانیان لە پێشانگاکەدا نمایش کرد.

ھەروەھا لە نزیکەوە گفتوگۆی لەگەڵ بەشداربووانی پێشانگاکە کرد و وێڕای ئومێدی سەرکەوتن، ھاوکات پشتیوانی خۆی و زانکۆی بۆ بەرەپێشچوونی زیاتری کارەکانیان نیشاندا.

رۆژی چوارشەممە 20ی دیسەمبەری 2023، پ.د. ئیدریس محەمەد تاهیر هەرکی سەرۆکی زانکۆ سەردانی سەنتەری پێداگۆجی کرد و لە نزیکەوە بەشداری کرد لە وانەیەکی ئەو خولە و تیایدا وتەیەکی پێشکەش کرد دەربارەی لێهاتوویی و کاراماییەکانی مامۆستای سەردەم هەروەها ئەو تایبەتمەندییانەی کە پێویستە مامۆستای سەردەم بە دەستی بهێنێت و گوتی: “پێویستە مامۆستا ژینگەی فێربوون بکات بە ژینگەیەکی فێربوونی سەردەمی لە ڕێی ئەم لێهاتوویی کاراماییانەوە هەوڵ بدات کە وا لە فێرخوازان بکا کۆمەڵە لێهاتوویی و کارامەیەک بە دەست بهێنن کە بە کردار سوودی لێوەرگرن بێ بۆ ئەوەی لە بازاڕی کاردا جێی خۆیان بکەنەوە”.

لە بەشێکی دیکەی وتەکانیدا سەرۆکی زانکۆ بەپێویستی زانی کە مامۆستا لینکێک یاخود پەیوەندییەک لەگەڵ بازاڕی کار دروست بکات بۆ ئەوەی لە ڕێیەوە بزانێت پێداویستییە سەردەمییەکانی بازاڕی کار چییە لێهاتوو کارامەیەکانی کە بازاڕی کار پێویستی پێی چییە بۆ ئەوەی لەسەر ئەو بنەمایە پڕۆگرامی خوێندنی خۆی دابڕێژێ، بەمەش زانکۆ دەبێتە ئەو دامەزراوەیەی کە بە کردارەکی خزمەتی بە کۆمەڵگە بکات.

لە کۆتایی وتەکەیدا د. ئیدریس دەستخۆشی لە سەنتەری پێداگۆجی و مامۆستایان و سەرپەرشتیارانی خولەکە رد و هیوای سەرکەوتنی بۆ بەشداربووانی خولەکە خواست.