رۆژی سێ شەممە رێکەوتی 19ـی نیسانی 2022 بەرێوبەرایەتی رەخساندنی هەلیکاری زانکۆی پۆلیتەکنیکی هەولێر بە هەماهەنگی لەگەڵ کۆمپانیای (شلومبێرگر) هەڵسان بە ئەنجامدانی سیمنارێک بۆ دەرچووان و قوتابیانی قوناغی چواری کۆلێژی تەکنیکی ئەندازیاری هەولێر.
مەبەستی سیمنارەکە زیاتر ئاشناکردنی کۆمپانیای ناوبراو وکارەکانی و هەروەها رەخساندنی هەلیکار بوو بۆ قوتابیان ، لە کۆتایی سیمنارەکەشدا چاوپێکەوتن لەگەڵ بەشداربووان ئەنجام درا بەمەبەستی دامەزراندنیان لە کۆمپانیای ناوبراو.
ئێوارەی رۆژی دووشەممە رێکەوتی 4ـی نیسانی 2022 سەرۆکی زانکۆی پۆلیتەکنیکی هەولێر پ.ی.د. کاوە عبدالکریم شێروانی بە یاوەری یاریدەدەری سەرۆکی زانکۆ بۆ کاروباری قوتابیان پ.ی.د. یوسف مصطفى رسول لە مەراسیمێکدا پرۆژەی نۆژەنکردنەوەی هۆڵی خوێندنەوەی قوتابیانی لە بەشەناوخۆییەکانی کچانی زانکۆی پۆلیتەکنیکی هەولێر کردەوە.
لە رێورەسمەکەدا کە هەریەکە لە راگری پەیمانگەی تەکنیکی کارگێری هەولێر د. برزۆ دزەیی، بەرێوەبەری بەشەناوخۆییەکانی سەرۆکایەتی زانکۆ مامۆستا فەرهاد عثمان و بەرپرسی نوسینگەی زانکۆی پۆلیتەکنیکی هەولێری یەکێتی قوتابیانی کوردستان حسین تۆڤی ئامادەیبوون، قوتابییان خۆشحاڵی خۆیان دەربڕی بەهۆی کردنەوەی هۆڵەکە، کە سوودێکی زۆر بە قوتابییان دەگەیەنێت و هەروەها سوپاسی سەرۆکی زانکۆیان کرد بۆ نۆژەنکردنەوەکە و لە لەی خۆیەوە سەرۆکی زانکۆ تەواوی پاڵپشتی سەرۆکایەتی زانکۆی بۆ قوتابییان دووپاتکردەوە بۆ زیاتر بەرەوپێشبردنی تواناکانیان و فەراهەمکردنی ژینگەیەکی گونجاو بۆ خوێندن و خوێندنەوە.
پاشان لە لایەن بەڕێوبەرایەتی بەشەناوخۆییەکانەوە بەدواداچوون کرا بۆ کێشە و گرفتەکانی دیکەی بەشەناوخۆییەکان و بڕیاری چارەسەری خێرا لە بارەیانەوە درا.
رۆژی یەکشەممە رێکەوتی 3ـی نیسانی 2022 سەرۆکی زانکۆ پ.ی.د. کاوە عبدالکریم شێروانی بروانامەی بەخشییە 79 قوتابی بەشدار لە پرۆگرامێک کە زانکۆی پۆلیتەکنیکی هەولێر بە هەماهەنگی لەگەڵ ئیمپریال ئینگلیش یوکەی ساڵی پار بۆ قوتابیانی زانکۆمان رێکیانخستبوو.
بە ئامادەبوونی یاریدەدەرانی سەرۆکی زانکۆ و ژمارەیەک بەڕێوبەری سەرۆکایەتی زانکۆ و مامۆستایانی سەرپەرشتیار کە پێکهاتبوون لە د. سەلار عثمان، پ.ی.د. عبدالله عمر و مامۆستا ئاریان هەمزە مەراسیمەکە بەرێوەچوو و تیایدا بروانامە بەخشرایە قوتابیانی بەشدار لە پرۆگرامەکە کە ماوەی یەک ساڵی خایاندبوو لە رێکەوتی 1/3/2021 تاکو 1/3/2022 بەردەوام بوو.
قوتابیانی بەشداربوو لە هەرسێ کۆلێژی تەکنیکی کارگێڕی، ئەندازیاری و تەندروستی هەولێر لەرێگەی ئەپلیکیشنەوە وانەکانیان پێدەگوترایەوە و زانکۆی پۆلیتەکنیکی هەولێر وەک یەکەم زانکۆی حکومی لە کوردستان ئەو وانەیە پێشکەش بە قوتابیان دەکات، کە ئاستێکی نێودەوڵەتی بەریتانیە و بروانامەکان لەلایەن (کۆلێژی ئیمپریاڵ ئینگلیش یوکەی)ـەوە نێردراوە بەشێوەی ئۆنلاین و باوەڕپێکراوە لە لایەن دەزگای ئۆف کواڵ Of Qual.
لە درێژەی کاروچالاکییەکانی بەرێوبەرایەتی پەیوەندییە نێودەوڵەتییەکانی سەرۆکایەتی زانکۆ خولێکی راهێنانی نێودەوڵەتی بۆ مامۆستایان و قوتابیانی خوێندنی باڵا لە بواری پرۆگرامسازی و سیمیولێشن لە هەردوو کۆلێژی تەکنەلۆجی هەولێر و کۆلێژی تەکنیکی ئەندازیاری هەولێر بەرێوەچوو کە بۆ ماوەی 5 رۆژ بەردەوام بوو.
شایەنی باسە ئەم چالاکیە لە چوارچێوەی خاڵەکانی یاداشتی لێکتێگەیشتنی نێوان زانکۆی بیلیفیڵدی ئەڵمانی و زانکۆمان ئەنجام دەدرێت و تیایدا نوێترین پێشکەوتنەکانی بوارەکە بۆ بەشداربووان روونکرایەوە بە هەردوو شێوازی تیۆری و پراکتیکی.
خولەکە تایبەت بوو بە مامۆستایان و قوتابیانی خوێندنی باڵا لە بواری پرۆگرامسازی و سیمیولێشن، لە ماوەی پێنج رۆژ بەرێوەچوو بۆ هەر رۆژێک 5 کاتژمێر بەردەوام بوو لە هەردوو کۆلێژی تەکنەلۆجی هەولێر و کۆلێژی تەکنیکی ئەندازیاری هەولێر.
