Category Archives: سەرۆکایەتی زانکۆ

ڕۆژی چوار شەممە 7ی شوباتی 2024، پ.د.ئیدریس محەمەد تاهیر هەرکی سەرۆکی زانکۆی پۆلیتەکنیکی هەولێر بە سەرۆکایەتی شاندێک و بەمەبەستی پیرۆزبایی و هاوئاهەنگی سەردانی سکرتاریەتی یەکێتی ‌ئافرەتانی کوردستانی کرد.

شاندەکەی زانکۆ پێکهاتبوون لە هەریەک پ.د.ئازاد حەسەن قادر یاریدەدەری سەرۆکی زانکۆ بۆ کاروباری کارگێری و دارایی، پ.ی.د.بۆتان مەجید یاریدەدەری سەرۆکی زانکۆ بۆ کاروباری زانستی، پ.ی.د.یوسف مستەفا ڕەسوڵ یاریدەدەری سەرۆکی زانکۆ بۆ کاروباری قوتابیان، پ.ی.د.ڕەنج سیروان بەرێوەبەری گشتی سەنتەری توێژینەوەی زانستی و ژمارەیەک لە ئەندامانی ئەنجومەنی زانکۆ.

سەرۆکی زانکۆ و یاوەرانی لەلایەن بەڕێز زیبا تەها شاهین سکرتێری یەکێتی ئافرەتانی کوردستان، ئەندامانی سکرتاریەت لیا سەیفەدین، ڕێژین سیامەند، خاتوو دڵڤین پێشوازییان لێکرا.

سەرۆکی زانکۆ بە ناوی ئەنجومەنی زانکۆی پۆلیتەکنیکی هەولێرەوە پیرۆزبایی دەست بەکاربوونی ستافی نوێی سکرتاریەتی یەکێتی ئافرەتانی کوردستانی کرد و ستایشی ڕۆڵی خانمانی کرد و رۆڵی ئافرەتانی بەگرنگ زانی کە شان بەشانی پیاوان خزمەت دەکەن، و گوتی “خەباتی شار و شاخی خانمان لەبەرچاوە و لەبیر ناکرێت”.

هەروەها گوتی : زۆر خۆشحاڵین ڕۆژانە دەبینین خانمان و ئافرەتانی وەک بەڕێزتان و ئەندامانتان جیا لەکاری ماڵ و پەروەردەکردنی منداڵ و سەرپەرشتی کردنی کاری خێران لەفەرمانگە و زانکۆ و پەیمانگاکان بەرپرسیاریەتیان هەیە و سەرکەوتووانە کارەکانیان ڕادەپەرێنن، ئێمە هاوکارین و هاوکارتان دەبین.

لای خۆیەوە سکرتێری یەکێتی ئافرەتانی کوردستان خۆشحاڵی خۆی بەو سەردانەی شاندەکەی زانکۆ دەربڕی و گوتی: ئێمە شانازی دەکەین پەروەردەی دەستی ئێوەی مامۆستایانین، ئێمەش وەک یەکێتی ئافرەتانی کوردستان ئامادەی هەموو هاوکاریەکین هەرکات پێویستیتان پێمان هەبێت.

 

ڕۆژی سێ شەممە 6ی شوباتی 2024، پ.د.ئیدریس محەمەد تاهیر هەرکی سەرۆکی زانکۆی پۆلیتەکنیکی هەولێر بەمەبەستی پیرۆزبایی دەستبەکاربوونی ستافی نوێی ژووری بازرگانی و پیشەسازی هەولێر سەردانی ئەو دامەزراوەیەی کرد.

شاندی زانکۆمان پێکهاتبوون لە هەریەک لە پ.ی.د.بۆتان مەجید ئەحمەد یاریدەدەری سەرۆکی زانکۆ بۆ کاروباری زانستی، پ.ی.د. یوسف مستەفا ڕەسوڵ یاریدەدەری سەرۆکی زانکۆ بۆ کاروباری قوتابیان، پ.ی.د.ڕەنج سیروان بەرێوەبەری گشتی سەنتەری توێژینەوە، مامۆستا کۆڤان عومەر بەرێوەبەری سەنتەری گەشەپێدان بۆکار و مامۆستا زانیار جەبار مامۆستا لە کۆلێژی تەکنیکی کارگێڕی هەولێر هاوکات رێکخەری پیوەندی نێوان زانکۆ و ژووری بازرگانی و پیشەسازی هەولێر.

شاندەکەی زانکۆ لەلایەن بەڕێز گیلان حاجی سعید سەرۆکی ژوور، جێگرانی سەرۆکی ژوور کامران صلاح باجگر و معروف عزیزخان هەرکی، هەریەک لەابراهیم گەردی، شیرین یەحیا ئەندامانی ئەنجومەنی کاڕگێری ژوور، بەگەرمی پێشوازییان لێکرا.

لە دیدارێکدا سەرۆکی زانکۆی پۆلیتەکنیکی هەولێر باسی گرنگی ئەو ژوورەی کرد لە هاوکاری کردنی زانکۆکان و ئەنجامدانی کاری هاوبەش بەیەکەوە لەڕێگای کۆمپانیاکانەوە، کە لە کۆتاییدا سودی دەبێت هەم بۆ حکومەت و هەم بۆ دەرچووان، بەو کارە ئەرکی سەرشانی حکومەت و دەرچووانیش کەم دەبێتەوە هەم لە رووی دۆزینەوەی ئیش و کارو هەم لە رووی دۆزینەوەی هەلی کار بۆ دەرچووان. بۆیە ئومێد دەکەین ستافی هەردوولامان کەنوێین بەیەکەوە هاوکار بین خزمەتی بەرچاو پێشکەش بکەین.

هەر لەو دیدارەدا سەرۆکی زانکۆ ئاماژەی بەوە دا، کە پێشتر کاری زانکۆ ئەوەبوو قوتابی دەرچووێنێ بۆ حکومەت و ئەویش دایبمەزرێنێ، بەڵام ئێستا ئیشی زانکۆ لەهەمان کاتدا دۆزینەوەی هەلی کارە، بەخۆشحاڵیەوە یەکەم زانکۆیین لە هەرێمی کوردستان پێشانگای هەلی کار بکەینەوە کە ئێستا لە زانکۆمان گرنگی زۆری پێدەدرێت، دەمانەوێت لەو بوارەدا بەیەکەوە کاربکەین لەڕێگای ۆوک شۆپ و پێشانگای لەو شێوەیە و قوتابییان بەکۆمپانیاکان بناسێنین کەکاریان دەست کەوێت، بەشی ئۆتۆمبێڵ و مارکێتینگ لەزانکۆمان کاری ڕاستەوخۆی بۆ قوتابیان دابین دەکات، بەڵام هێشتا پێویستمان بەهاوکاری زیاترە.

لە لای خۆیەوە سەرۆکی ژووری بازرگانی و پیشەسازی هەولێر وێڕای بەخێرهێنانی شاندی زانکۆمان پشتگیری وتەکانی سەرۆکی زانکۆی کرد و رایگەیاند، بەدڵنیاییەوە لە لای خۆمانەوە هاوکار دەبین، بە پلان و هەماهەنگی تەواو و بەکردەیی بەیەکەوە کاری لەسەر دەکەین.

هەوەها گوتیشی : پێم باشە زانکۆکان توێژینەوە لەبارەی هەلی کار بکەن کەچۆن هەلی کار بۆ قوتابیان و دەرچووان بدۆزرێتەوە، هاوکاردەبین بەپێ تواناو پشتگیری دەکەین، دڵنیابن کەمتەرخەم نابین و هاوکار دەبین.

 

ڕۆژی سێشەممە 30ی کانوونی دووەمی 2024، پ.د.ئیدریس محەمەد تاهیر هەرکی، سەرۆکی زانکۆی پۆلیتەکنیکی هەولێر، پێشوازی لە مارک سترۆ، کونسوڵی گشتی ئەمریکا لە هەولێر و شاندی یاوەری کرد.

لە دیدارەکەدا هەر یەکە لە پ.د. ئازاد حەسەن قادر یاریدەدەری سەرۆکی زانکۆ بۆ کاروباری کارگێڕی و دارایی، پ.ی.د. بۆتان مەجید ئەحمەد یاریدەدەری سەرۆکی زانکۆ بۆ کاروباری زانستی، پ.ی.د. رەنج سیروان عەبدوڵا بەڕێوبەری گشتی سەنتەری توێژینەوەی زانستی و د. طالب محەمەد شەریف راگری پەیمانگەی تەکنیکی مێرگەسۆر ئامادەیبوون.

سەرۆکی زانکۆ وێڕای بەخێرهێنانی کونسوڵی گشتی ئەمریکا و شاندی یاوەری، کورتەیەکی دەربارەی زانکۆ و پێکهاتەی زانکۆی و کۆلێژ و بەشە جیاوازەکان بۆ شاندی میوان خستەڕوو، هەروەها ئاماژەی بەوە کرد کە زانکۆمان ژمارەیەک بەشی زانستی لەخۆدەگرێت کە جیاوازن لەگەڵ بەشەکانی دیکە و هەندێک بەش لەسەر ئاستی عێراق و هەرێمی کوردستان تەنها لە زانکۆی پۆلیتەکنیکی هەولێر بوونیان هەیە.

لە بەشێکی دیکەی وتەکانیدا سەرۆکی زانکۆ باسی لەوە کرد کە ئێمە وەک زانکۆ کاردەکەین بۆ ئەوەی پسپۆڕییەکانمان لەگەڵ بازاڕی کاردا بگونجێت و دواتر دەرچووانمان کاریان دەستبکەوێت.

لای خۆیەوە کونسوڵی گشتی ئەمریکا لە هەولێر وێڕای دەستخۆشی لە زانکۆی پۆلیتەکنیکی هەولێر کرد کە بەشێوازێک بایەخیان بەکردنەوەی ئەو بەشانەداوە کە گرنگن و لە ئێستادا لەگەڵ بازاڕی کار دا دەگونجێن، هەروەها بە بایەخەوە باسی لە کردنەوەی پێشانگای هەلیکار کرد کە لە مانگی ئۆکتۆبەری ساڵی رابردوو بۆ دەرچووانی زانکۆکە کردبووەوە و بووە هۆی ژمارەیەکی بەرچاو لە هەلی کار بۆ دەرچووانی زانکۆی پۆلیتەکنیکی هەولێر.

بۆ ئەمەش هەموو پشتیوانییەکی خۆی بۆ زانکۆ دووپاتکرەوەوە و رایگەیاند کە لە ئایندەدا هەماهەنگییان زیاتر دەبێت وئامادەیی کونسوڵخانەی بۆ زانکۆ دووپاتکرەوە و خۆشحاڵی خۆی بە سەردانیکردنی زانکۆ نیشاندا.

دواتر سەرۆکی زانکۆ پلاکێتی تایبەت بە زانکۆی پێشکەش بە کونسوڵی گشتی ئەمریکا کرد، و کونسڵی ئەمریکاش دیاری تایبەتی کونسوڵخانەی پێشکەش بە ئامادەبووانی کۆبوونەوەکە کرد.

 

ڕۆژی دووشەمە 29ی کانوونی دووەمی 2024، پ.د.ئیدریس محەمەد تاهیر هەرکی سەرۆکی زانکۆی پۆلیتەکنیکی هەولێر، پ.د.ئازاد حەسەن قادر یاریدەدەری سەرۆکی زانکۆ بۆ کاروباری کارگێری و دارایی و پ.ی.د.یوسف مستەفا ڕەسوڵ یاریدەدەری سەرۆکی زانکۆ بۆ کاروباری قوتابیان و بەشەناوخۆییەکان بەشدارییان لە چالاکییەکی بەشی تەکنیکی بازاڕگەری نێودەوڵەتی و زمانەکانی کرد لەکۆلێژی تەکنیکی کارگێری هەولێر.

ئەو چالاکییە بریتیبوو لە ڕێکخستن و بەرێوەبردنی پرۆگرمێکی تایبەت لەلایەن بەشی تەکنیکی بازاڕگەری  نێودەڵەتی و زمانەکان لەژێر ناوی ڕاهێنانی پراکتیکی ، کە سەرۆکی زانکۆ  و یاوەرانی بەشدارییان تێدا کرد و چەند قوتابییەک بەشێوەی سیمینار ڕاهێنانی پراکتیکی خۆیان پێشکەش کرد دەربارەی بازاڕگەری و هەلی کار .

سیمینارەاکانی قوتابییان لەلایەن لێژنەیەکی تایبەتی مامۆستایانی هەمان بەش سەرپەرشتی دەکرا، دوای گفتوگۆی زانستیانە لەنێوان قوتابیان و سەرپەرشتیارانیان، سەرۆکی زانکۆ بەمەبەستی گرنگیدانی زیاتری بەو بەشە پێشنیاری کرد کۆبوونەوەی زیاتر بکرێت تا قوتابیان سوودی زیاتر وەربگرن و لە ڕێگایەوە هەلی کار بدۆزنەوە، دواتر گوێی لەقوتابیان گرت و بەڵێنی جێبەجێ کردنی داواکارییەکانی پێدان، قوتابیانیش دڵخۆش بوون بەپاڵپشتی و هاوکارییەکانی سەرۆکی زانکۆ .

شایەنی باسە مامۆستایانی بەشەکە مانگانە سیمیناری هاوشێوە بە قوتابیان ئەنجام دەدەن تاوەکو کەم و کورییەکانیان دیاری بکەن، دواتر داوای بۆ ئەنجامدانی سیمیناریان لێدەکەن.

جێگای وەبیرهێنانەوەیە تائێستا 80٪ی قوتابیانی ئەو بەشە کاریان دەست کەوتووە، ئەو بەشە پشتگیری بڕیاری حکومەت دەکات کەداوا دەکات گەنج و لاوان و قوتابیان دەبێت خۆیان کار بۆ خۆیان بدۆزنەوە، قوتابیانی ئەو بەشەش وا ڕاهێناون کە بەهۆی لێهاتوویی خۆیان دەرفەتی کار بدۆزنەوە .