Category Archives: پەیمانگەی تەکنیکی مێرگەسۆر

ڕۆژی دووشەممە 5 ئایاری 2025 بە ئامادەبوونی بەرێز (د.طالب محمد شریف عمر )راگری پەیمانگەی تەکنیکی مێرگەسۆرو ، (پ.ی.د. نەجیب تۆما بەتۆ )بەرێوەبەری دڵنیایی جۆری زانکۆی پۆلیتەکنیکی هەولێر، وۆرکشۆپێکی نێودەوڵەتی لە بواری ڕووەکە پزیشکییەکان بۆ ژمارەیەک لە مامۆستایان و قوتابیانی بەشی ڕووەکە پزیشکییەکان لە پەیمانگەی تەکنیکی مێرگەسۆر بەڕێوەچوو.

لە دەستپێکی وۆرکشۆپەکە بەڕێز ( د. طالب محمدشەریف عومەر ) ڕاگری پەیمانگەی تەکنیکی مێرگەسۆر وتارێکی پێشکەش کرد بە زمانی ئینگلیزی بە خێرهاتنی پسپۆڕان و شارەزایانی ئەم بوارە کرد، بەڕێزیان ئەم وۆرکشۆپەی بە گرنگ لە قەلەم دا بۆ پێشخستنی بەشی ڕووەکە پزیشکییەکان و زیاتر گرنگی پێدان و ئاشنابوونی زیاتر بەم بوارە، ڕاگری پەیمانگە ئاماژەی بەوەش کرد کە ئەم وۆرکشۆپە تەنها بۆ کۆکردنەوەی پسپۆڕان و شارەزایان و توێژەران نییە، بەڵکو هەنگاوێکە بۆ ئەوەی لێکتر فێربن و کاری هاوبەش ئەنجام بدەن و بۆچوونەکان بگۆڕنەوە وە زیاتر پێشخستن و داهێنان بکەن لەم بوارەدا.

ئەم وۆڕکشۆپە لە لایەن پڕۆفیسۆر دکتۆر ( سامی پێداوەر ) پسپۆر لە بواری پاراستنی ڕووەک وە ( لایف ساینس ) مامۆستا لە زانکۆی بەیروت – لوبنان، و( مارک فانستینکیست ) شارەزای باڵا لە ڕاهێنانی TVET بەڕێوەچوو.

ئەمەش لە درێژەی چاڵاکیەکانی پڕۆژەی ( أزدهارک ) ئەم پڕۆژەیە بە شێوەیەکی سەرەکی گرنگی بە کەرتی کشتوکاڵ و ڕووەکە پزیشکییەکان دەدات لە سەرتاسەری عێراق، ئەم پڕۆژەیە تەرخانی دارایی کراوە لە لایەن یەکێتی ئەوروپا و لە لایەن ڕێکخراوی ( کۆوەتەر ) جێبەجێدەکرێت.

ڕاگەیاندنی پەیمانگەی تەکنیکی مێرگەسۆر

ڕۆژی سێ شەممە 29 ی نیسانی 2025 بەشی ڕووەکە پزیشکیەکان لە پەیمانگەی تەکنیکی مێرگەسۆر گەشتێکی زانستیان ئەنجامدا

بەسەر پەرشتی بەڕێز ( م.ی عەلی حسێن میر ) سەرۆکی بەشی ڕووەکە پزیشکیەکان و ( م. شعبان کاسول عباس ) مامۆستای بابەت گەشتێکی زانستیان بۆ قوتابیانی بەشی ڕووەکە پزیشکیەکانی پەیمانگاکەمان ڕێکخست لە وانەی پۆلێنی ڕووەک ( Plant Taxonomy ) بۆ نێو سروشتی دەڤەری بارزان لە شانەدەر ، بە مەبەستی لەنزیکەوە ئاشناکردنی قوتابیان بە ڕووەکە خۆڕسکەکانی دەڤەرەکە و جۆرەکانیان و سودو گرنگی هەمە لایەنەی ڕووەکەکان، هەروەها ناساندنی ئەو ڕووەکانەی کە لە دەڤەرەکەدا هەبوون لەگەڵ خاسیتەکانیان، دوای ئەوەش شێوازی کۆکردنەوە و پۆلێنکردنی ڕووەکەکان و ئامادەکردنیان بۆ تاقیگەی ڕووەکی پێشانی قوتابیەکان درا لەلایەن مامۆستای بابەت.

ڕاگەیاندنی پەیمانگەی تەکنیکی مێرگەسۆر

‎پەیمانگەی تەكنیكی مێرگەسۆر بە هاوبەشی هەفتەی جیهانی داهێنان و نوێگەری بە هەماهەنگی سەنتەری گەشەپێدانی كاری زانکۆی پۆڵیتەکنیکی هەولێر، وۆركشۆپێك ئەنجامدرا كە ئالنگاریەكان و چارەسەرییەكانی بەردەم كارەكان باسكران.

‎ئەمڕۆ یەكشەممە ٢٧ نیسانی ٢٠٢٥، بەئامادەبونی د.طالب محمد شریف عومەر ڕاگری پەیمانگەی تەكنیكی مێرگەسۆر، هەڵگورد شێخ نەجیب ، سەرپەرشتیاری ئیدارەی سەربەخۆی سۆران و پ.ی.د. بۆتان مجید ئاسنگەر یاریدەدەری سەرۆكی زانكۆ بۆ كاروباری زانستی و خوێندنی باڵا، نەزاكەت سالح نوێنەری نوسینگەی سەرۆكی حكومەتی هەرێمی كوردستان و ئەندام پەڕلەمان و چەندین کەسایەتی حکومی بەشداریان كرد لە وۆركشۆپێکی پەیمانگەی تەكنیكی مێرگەسۆر لە ژێر ناونیشانی ( داهێنان و نوێگەری لە بەهێزكردنی كارامەییەكانی قوتابیان بۆ بازاڕی كار )

‎لە دەستپێكی وۆركشۆپەكەدا، د. طالب محمد شریف عومەر ڕاگری پەیمانگەی تەكنیكی مێرگەسۆر وتارێكی پێشكەشكرد ،باسی لە ڕۆلی قوتابی كرد كە چۆن بتوانن لە ژینگەی ئێستادا كاری تایبەت بەخۆیان هەبێت، دواتر بەڕێز هەڵگورد شێخ نەجیب سەرپەرشتیاری ئیدارەی سەربەخۆی سۆران وتارێكی پێشكەشكرد و دواتر پ.ی.د. بۆتان مجید ئاسنگەر، یاریدەدەری سەرۆكی زانكۆ بۆ كاروباری زانستی و خوێندنی باڵا، وتار و سمینارێكی پێشكەش بە ئامادەبوان كرد.

‎دواتر، پانێلێك بەڕێوچوو بەسەر پەرشتی و بەڕێوەبردنی م. نیهاد یاسین مامۆستا لە پەیمانگەکەمان و بە بەشداری پ.ی.د مەحمود باشقالی ، م. زانیار جەبار مامۆستای زانکۆ، پاشان، لەلایەن پ.ی.د. محمود باشقالی، مامۆستا لە زانكۆی ئاكرێ بۆ زانستە كردارییەكان باسی لەبارەی كار و بەكارخستنی بازاڕی كار و كاریگەرییەكانی ژیری دەستكرد لەسەر داهاتوی كار لە نێوان گۆڕانكاری و نەماندا کرد ، هەروەها; م. زانیار جەبار، باڵوێزی داهێنان و نوێگەری لە عێراقدا باسی لە داهێنانی پێشەنگی لەكاردا وە گۆڕینی بیرۆكەكان بۆ سود گەیاندن بە مرۆڤایەتی و ژینگە کرد

‎ لە کۆتاییدا لەلایەن ڕاگری پەیمانگە و یاریدەدەری سەرۆكی زانكۆ بڕوانامەی بەشداربوون بە بەڕێوەبەری پانێل و پانێلیستەكان درا.

لەم چالاکیە زانستیەدا پێشانگای کاری دەستی و ڤیستیڤاڵی خواردن بەشێکی گرنگی چاڵاکیەکە بوون لەو ڤیستیڤاڵەدا کە وەک وانەیەکی مارکێتینگ بۆ قوتابیانی بەشی کارگێڕی کار کە تیایدا خواردنیان فرۆشت بە ئامادەبووان و مێوانان وە پێشانگایەکی کاری دەستی بۆ چەند خانمێكی بەهرەمەند و خاوەنكاری دەڤەری بارزان ئامادەکرابوو کە دەستڕەنگینی و بەهرەمەندیان لەو کارەیان دا دیار بوو کە لە لایەن مێوانان و مامۆستا و فەرمابەران و قوتابیان بەرهەمەکانیان لێ کڕدرا و بەهرەمەندان لە لایەن قوتابیان و گەنجانی دەڤەرەکە وەک کاری سەربەخۆ پێشاندران دواتر ڕێزلێنانی تایبەت بە هەموو خاوەن پیشەکان پێبەخشرا

جیا لەم وۆركشۆپەدا قوتابیانی قۆناغی دووەمی بەشی پەرستیاری و كارگێڕی كار لە پەیمانگەی تەکنیکی مێرگەسۆر بۆ ماوەی ٩ هەفتە بەشداریان لە خولێكی ئایرێکسی ئەمریکی كردبوو توانیان پلەی دووەم لەسەر ئاستی جیهان بەدەستبهێنن لەلایەن ڕاگری پەیمانگە و یاریدەدەری سەرۆكی زانكۆ قەلغانی ڕێزلێنانی بەشداریكردنیان پێبەخشرا.

‎راگەیاندنی پەیمانگەی تەكنیكی مێرگەسۆر ‎

ئەمڕۆ یەکشەممە 13ی نیسانی 2025، لە پەیمانگەی تەكنیكی مێرگرسۆر، بە ئامادەبوونی دکتۆر پشتیوان سادق وەزیری ئەوقاف و کاروباری ئاینی حکومەتی هەرێمی کوردستان و ژمارەیەک مامۆستای زانکۆ و ئەکادیمست و رۆشنبیر و کەسایەتی حزبی و حکومی و قوتابیان، دووەمین کۆڕبەندی زانستی پەیمانگای تەکنیکی مێرگەسۆر، لە ژێر ناونیشانی “ڕۆڵی مێژوو، هونەر، سینەما و وەرگێران لە گواستنەوەی بەها پیرۆزەکانی کوردستان بۆ جیهان: ڕێبازی بارزان وەک نموونە” بەڕێوە چوو .

لە سەرەتای کۆڕبەندەکەدا ڕاگری پەیمانگە د. طالب محمد شریف عمر وتارێكی پێشكەشكرد، کە تیایدا وێڕای بەخێرهێنانی میوانان و ئامادەبووان، تیشکی خستە سەر رۆلی هونەر و سینەماو وەرگێران لە گواستنەوەی بەها جوان و پیرۆزەکانی کوردستان.

لەکۆڕبەندە زانستییەکەدا، چەندین فیچەر و دۆکیۆمێنتاری سەبارەت بە مێژووی بارزان و چیرۆکە نەبیستراوەکانی (ژەنەڕاڵ مستەفا بارزانی) پێشکەشکران، لەگەڵ چەند پانێڵێک لە بارەی ڕۆڵی حکومەتی هەرێم بۆ گرنگیدان و پاراستنی بەها پیرۆزەکانی نیشتمان و ڕۆڵی فیلم و هونەر و سینەما و وەرگێران لە ناساندنی مێژوو و کەلتوور و پێکەوەژیان لە کوردستان.

دواتر پانێلێك لە ژێر ناونیشانی “ڕۆڵی مێژوو، هونەر، سینەما و وەرگێران لە گواستنەوەی بەها پیرۆزەکانی کوردستان بۆ جیهان: ڕێبازی بارزان وەک نموونە” بەڕێوەچوو، بە سەرپەرشتی و بەڕێوەبردنی سەید محەمەد سەید عەبدوڵڵا، و بە بەشداری بەڕێزان پ.د. محمد کاکەسور، پ.ی. د. شوان حمدئەمین و ئاریان سەلاحەدین ئەسعەدوەک پانێڵیست.

لە کۆتایی پانێلەکەدا بروانامەی بەشداریکردن لە لایەن. پ.د.ئازاد حسن یاریدەدەری سەرۆکی زانکۆ بەخشرایە پانێلیستەکان، هەروەها قەڵغانی رێزلێنان درایە کۆمەلێک نوسەرو وەرگێڕ و سینەماکار و فۆتۆگرافەری دەڤەری بارزان کە خزمەتێکی دیارو بەرچاویان هەبووە.

شایانی باسە ئەمە دووهەمین ساڵە پەیمانگەی تەکنیکی مێرگەسۆر کۆڕبەندەکە رێکدەخات و ئامانج لەکۆڕبەندەکەی ئەم ساڵیش ناساندنی زیاتری مێژووی خەبات و قوربانیدانی نەتەوەکەمان بەگشتى و وەک نموونەش، تیشک خرایە سەر ڕێبازی بارزان وەک بەها و بنەمایەکی نەتەوەیی و کولتووری، کە بێگومان بەشێکى گرنگى شوناسی گەلی کوردە. ئێمە لە پەیمانگەی تەکنیکی مێرگەسۆر دەمانەوێ بەها و کولتووری جوانی کوردستان، بەتایبەتى بەهاکانى ژینگەدۆستی و پێکەوەژیان، بخەینە بەرچاوى هەمووان. لەم رێگەیەشەوە، ئامانجمانە ئاستی هۆشیاری تاک بە تاکی کۆمەڵگا، بە تایبەت گەنجان و قوتابییان بەرزبکەینەوە.

هەوەها گرنگە بەلامانەوە بتوانین، ئەم نەوەیە بهێنینە سەر ئەو باوەڕەى، کە بە سوودوەرگرتن لە تەکنەلۆژیای سەردەم، وەرگێران، بەرهەمی هونەری، فیلم و سینەما، بەها باڵاکانى ژینگەپارێزى و پێکەوەژیان بڵاوبکەنەوە و تاکو بەیەکەوە هەنگاو بنێین بۆ نیشتمانسازییەکى پتەو.

پەیمانگەی تەکنیکی مێرگەسۆر مەبەستیەتی بە پێشکەشکردنى قەڵغانى پێزانین، رێز لە ئەرک و ماندووبوونى ئەو مرۆڤە دڵسۆزانە بگرێت، کە بە وەرگێڕان، نووسین، مێژووى زارەکى، فۆتۆگراف و فیلمسازی، رۆڵێکى دیاریان لە گەیاندنى ئەو بەها بەرزانە بە کۆمەڵگەى کوردستان و تەنانەت دەرەوەش، گێڕاوە.

ڕاگەیاندنی پەیمانگای تەكنیكی مێرگەسۆر