Category Archives: سەرۆکایەتی زانکۆ

ڕۆژی پێنچ شەممە 22ی شوباتی 2024، بە ئامادەبوونی پ.د. ئیدریس محەمەد تاهیر هەرکی، سەرۆکی زانکۆی پۆلیتەکنیکی هەولێر، د. ژاڵە سعید خطاط بەڕێوەبەرى گشتى فەرمانگەى توێژینەوە و پەرەپێدان لە وەزارەتى خوێندنى باڵا و توێژینەوەى زانستى و یاریدەدەرانی سەرۆکی زانکۆ، لە رێوڕەسمێکدا کۆتایی بە خولی هەشتەمی پێداگۆجی هات و بڕوانامە بەسەر بەشداربووانی خولەکە دابەشکرا.

سەرەتا سەرۆکی زانکۆ وتەیەکی پێشکەش کرد و تیایدا وێرای بەخێرهێنان پیرۆزبایی لە دەرچووانی خولەکە کرد و تیشکی خستە سەر گرنگی ئەو خولەو گوتی:

“بەناوی ئەنجومەنی زانکۆی پۆلیتەکنیکی هەولێر پێشەکی دەستخۆشی لەو مامۆستا بەڕێزانە دەکەین کەماوەی شەش مانگ بەردەوام بوون لەو خولە و وانەوتنەوە تێیدا، کە بەردەوامن و هەر بەردەوامیش دەبن لەگەڵمان، بەتایبەتی ئەو مامۆستایانەی لە دەرەوەی زانکۆی پۆلیتەکنیکی هەولێر هاتوون و بەشداری دەکەن لەگەڵمان، دەستخۆشیتان لێدەکەین و سوپاس گوزارین، زۆر زۆر بەخێربێن. هەوەها پیرۆزباییەکی گەرم لە ئێوەی مامۆستایانیش دەکەین کە بەشداربوون سەرکەوتووانە خولەکەتان تەواو کرد، ئیتر دوای تەواوکردنی ئەم خولە و بەدەستهێنانی‌ئەو بڕوانامەیە دەتوانن داواکارییەکانتان پێشکەش بکەن و ببنە مامۆستا لەیەکێک لەزانکۆکانی هەرێمی کوردستان.

لە بەشێکی دیکەی وتەکانیدا سەرۆکی زانکۆ رایگەیاند، خولەکانی پێداگوجی مەرجێکە بۆ‌ ئەوەی بتوانن داواکاری پێشکەش بکەن و ببن بەمامۆستای زانکۆ، گرنگی ئەو خولە کە بۆماوەی شەش مانگ بەردەوام بووە دڵنیام گرنگی و سوودێکی زۆری هەیە ، دەسپێکێکی زۆرباشە بۆ ئەوە ی ببیت بەمامۆستایەکی سەرکەوتوو لە بواری خوێندنی باڵا بەتایبەتی، بەڵام ئەوە بەتەنیا بەس نییە، بەڵکو بەردەوامی دەوێت ئەوەتا ئێمە 30 ساڵە مامۆستای زانکۆین هێشتا پێویستمان بەخوێندن و خۆئامادەکردن هەیە، هەوڵدەدەین زیاتر فێربین لەپیشەی پیرۆزی مامۆستایەتی، پیشەی مامۆستایەتی دەریایەکە و پێویستە ڕۆژانە هەوڵبدەین شتی زیاتر فێربین بەتایبەتیش لەزانکۆ، تەنها بەخولێک تۆ نابیتە مامۆستایەکی شایستە و سەرکەوتوو، وادابنێ لەزانستەکەی خۆت زانستێکی مام ناوەندیت هەیە و زۆر ئیمتیازت نییە، بەڵام دەتوانی مامۆستایەکی نایاب بیت بەپلەی یەک زۆر لەو مامۆستایانەش باشتربیت کە ئیمتیازیان هەیە، بۆیە لەئێستا بەدواوە و دوای وەرگرتنی ئەو بروانامەیە خۆتان دروست بکەن و ببن بەمامۆستایەکی نایاب، بۆ ئێمەش هەر ئەوە گرنگە چونکە ئێوە لێرەن بۆ ئەوەی ببن بەمامۆستا، پیرۆزباییەکی گەرمتان لێدەکەم ‌و هیوادارین‌ سەرکەوتووانە لەزانکۆکانی کوردستان خزمەت بکەن”.

لە کۆتایی رێوڕەسمەکەدا بڕوانامەی دەرچوون بەخشرایە مامۆستایانی بەشداربووی خولی هەشتەمی پێداگۆجی لە زانکۆی پۆلیتەکنیکی هەولێر.

شایەنی باسە بەشداربووانی خولی هەشتەمی پێداگۆجی لە زانکۆی پۆلیتەکنیکی هەولێر پێکهاتبوون لە 69 قوتابی کە بە سەرپەرشتی ژمارەیەک مامۆستا لە ناوەوە و دەرەوەی زانکۆی پۆلیتەکنیکی هەولێر بۆ ماوەی شەش مانگ سەرپەرشتی وتنەوەی وانەکانی خولەکەیان کرد.

 

ڕۆژی چوارشەممە 21ی شوباتی 2024، لە هۆڵی سەنتەری رۆشنبیری زانکۆ، بەئامادەبوونی پ.د.ئیدریس محەمەد تاهیر هەرکی سەرۆکی زانکۆی پۆلیتەکنیکی هەولێر ژمارەیەک بەرپرسی حیزبی و حکومی و ئەندامانی ئەنجومەنی زانکۆ و کەسانی پسپۆڕ و ئەکادیمی زانکۆی پۆلیتەکنیکی هەولێر پانێڵێکی لەژێر ناونیشانی “گرنگی و رۆڵی زمان لە مانەوەی نەتەوە و پێکەوەژیان لە کوردستاندا” رێکخست.

سەرەتای پانێڵەکە بەخولەکێک وەستان بۆ گیانی پاکی شەهیدانی ڕێگای ڕزگاری کورد و کوردستان لەگەڵ سرودی نیشتیمانی ئەی ڕەقیب دەستی پێکرد بەتێکهەڵکێش لەگەڵ چەند پارچە شیعرێکی تایبەت بەزمانی شیرینی کوردی .

بەر لە دەستپێکی بەرنامەی پانێڵەکە سەرۆکی زانکۆ وتەیەکی پێشکەش کرد:

دەقی وتەکانی سەرۆکی زانکۆ:

“بەناوی خوای گەورە و میهرەبان، بەناوی خۆم و ئەنجومەنی زانکۆی پۆلیتەکنیکی هەولێر زۆر بەگەرمی بەخێرهاتنی میوانە خۆشەویستەکان دەکەین بەگشتی، بەتابیەتی میوانانی دەرەوەی زانکۆمان بەڕێزان د.ڕەشاد میران ، پرفیسۆر د.عبدالڵە حوسێن ، پ.ی.د. سالار ، مامۆستا صباح ، بەڕێز ستیڤان رۆژنامەڤان، مامۆستا تەلعەت تاهیر.

بەڕێزان وەک لای هەمووان ئاشکرایە ڕۆژی زمانی دایک دەکەوێتە 21ی شوبات، و هەموو ساڵێک یادی ئەو ڕۆژە پیرۆزە دەکرێتەوە کەلەلایەن ڕێکخراوی یونسکۆوە ئەو ڕۆژە هەڵبژێردراوە ، مێژووی دیاریکردنی ئەو ڕۆژە دەگەڕێتەوە بۆ سەردەمانێک کەبەنگلادیش بەشێک بوو لەوڵاتی پاکستان لەساڵی 1952، دیارە لەڕۆژێکی وەک ئەمڕۆدا لە 21ی شوبات بەنگلادیشیەکان خۆپیشاندانێکیان ئەنجامداوە بۆ ئەوەی داوا لەپاکستانیەکان بکەن کە بەزمانی دایکی خۆیان بخوێنن و گفتوگۆ بکەن و پەروەردە بکرێن، ئەوکاتە وەڵامی پاکستانیەکان بۆ بەنگلادیشیەکان بەچەک و بەزەبربووە و ژمارەیەکی زۆریان لێ شەهیدکردوون، دوای ئەوەی بەنگلادیشیەکان سەربەخۆییان وەرگرت و لەسەر داوای بەنگلادیشیەکان لە یونسکۆ ڕۆژی 21ی شوباتی ساڵی 1999ـەوە ئەو ڕۆژە کراوەتە ڕۆژی فەرمی زمانی دایک لەجیهاندا .

بەڕێزان ئێمەی کوردستانی و کورد بەتایبەتتر زۆرباش درک بەو ئازارەی بەنگلادیشیەکان دەکەین کەچەشتویانە، لەمێژووی وڵاتەکەماندا زۆرجار ڕووبەرووی ئەو زەبرە بووینەتەوە بۆ ئەوەی زمانی کوردی و نەتەوەی کورد نەمێنێت، ئێمە لەزانکۆی پۆلیتەکنیکی هەولێر بەپێویستمان زانی ‌وەک ناوەندێکی ئەکادیمی ڕۆڵمان هەبێت لە بەرزراگرتنی ئەو یادانە، ئامانجمان ئەوەیە بۆ بەرزکردنەوەی وشیاری، فرە زمانی، فرە ڕەنگی، فرە فەرهەنگی، بۆئەوەی بتوانین لەوڵاتێکی ئازاد بەیەکەوە بژین، خۆشبەختانە ئەمڕۆ لەکوردستاندا لەسایەی حکومەتی هەرێمی کوردستان و دەسەڵاتی کوردستان توانیومانە تاڕادەیەکی زۆر ئەو ئامانجە بپێکین، ژیان و پێکەوە ژیانی ئازادانەی پێکهاتەکان لە کوردستان لە ناوچەکە دەنگیداوەتەوە”.

دواتر دەستکرا بە پێشکەش کردنی بەرنامەی پانێڵەکە کە لە دوو تەوەر پێکهاتبوو، تەوەری یەکەم لەژێر ناونیشانی (ڕۆڵ و بایەخی زمانی دایک لەپرۆسەی نەتەوەسازیدا) بەبەشداری پ.ی.د.سالار عوسمان ئەکادیمی و نووسەر، پ.د.ڕەشاد میران جێگری سەرۆکی ئەکادیمیای کوردی، پ.د.عبدالڵە حسین ڕواندزی مامۆستای زانکۆ لەبەشی زمانی کوردی زانکۆی سەلاحەدین، مامۆستا تەڵعەت تاهیر حەمەد سەعدی مامۆستا لە کۆلێژی زمان زانکۆی سەلاحەدین بەڕێوەچوو، کە تیایدا بەشداربووان بەوردی باسیان لە بایەخی زمانی دایک لە پرۆسەی نەتەوەسازیدا بۆ ئامادەبووان تاوتوێ کرد.

تەوەری دووەمی پانێڵەکە لەژێر ناونیشانی (زمانی دایک و پێکەوەژیان لە هەرێمی کوردستان) بە بەشداری م.صباح صالح احمد بەرێوەبەری گشتی فێرکردنی تورکمانی وەزارەتی پەروەردە، پ.ی.د. سیروان ئەنوەر مەجید مامۆستا لەزانکۆی پۆلیتەکنیکی هەولێر، ستیڤان شانی رۆژنامەڤان و چالاکوانی کلدانی، د.عەلی عبدالڵە صالح مامۆستا لەزانکۆی پۆلیتەکنیکی هەولێر بەڕێوەچوو کە تیایدا بەشدابووانی پانێڵ باسیان لە پێکەوەژیانی پێکهاتەکان کرد کە لە سایەی حکومەتی هەرێمی کوردستاندا بە ئازادانە لە ناوەندەکانی خوێندندا بە زمانی دایکی خویان دەخوێنن و بە داتا ژمارەی قوتابخانە و ناوەندە کلتووری و فەرهەنگییەکانی تایبەت بە پێکهاتەکان خرانەڕوو، بە پرسیار و پێشنیاری میوانان و قوتابییان و وەڵامدانەوەیان لە لایەن بەشداربووانی پانێڵەکە بابەتی تەوەرەکان دەوڵەمەندتر کران.

لە کۆتاییشدا پ.د. ئیدریس هەرکی خەڵاتی رێزلێنانی زانکۆی پۆلیتەکنیکی هەولێری بەخشییە بەشداربووانی پانێڵ و بەڕێوبەری تەوەرەکان، و دووبارە سوپاسی کردن.

ڕۆژی سێ شەممە 20ی شوباتی 2024، بە ئامادەبوونی پ. د. ئیدریس محەمەد تاهیر هەرکی سەرۆکی زانکۆی پۆلیتەکنیکی هەولێر، یاریدەدەری سەرۆکی زانکۆ بۆ کاروباری زانستی و بەڕێوبەری گشتی سەنتەری توێژینەوەی زانستی، بە هاوکاری زانکۆی لیڤەرپول لە بەریتانیا و زانکۆی بور سەعید لە میسڕ دوو وۆرکشۆپ بە ناونیشانی (بنەماکان وپرۆگرامەکانی زیرەکی دەستکرد لە خوێندنی باڵا) و( ئەپڵیکەیشنەکانی زیرەکی دەستکرد لە بواری توێژینەوە) لە سەنتەری توێژینەوەی زانستی بۆ ژمارەیەک توێژەر و مامۆستای زانکۆمان بەڕێوەچوو.

بەر لە دەستپێکی وۆرکشۆپەکان سەرۆکی زانکۆ وتەیەکی پێشکەش کرد و تیایدا دەستخۆشی لە رێکخەرانی وۆرکشۆپەکە کرد و بابەتی زیرەکی دەستکردی بە گرنگ زانی و رایگەیاند ئەم بابەتە پێشهاتێکی نوێی جیهانییە لە بواری تەکنەلۆژیا و کەم تا زۆر بایەخ و گرنگی خۆی هەوەرها لایەنی نەرێنیشی هەیە بۆیە هیوادارم ئەم وۆرکشۆپە سوودی بۆ توێژەر و مامۆستایانمان هەبێت.

وۆرکشۆپەکان تایبەت بوون بە  بواری زیرەکی دەستکرد و خوێندنی باڵا لەژێر ناونیشانی (بنەماکان و پرۆگرامەکانی زیرەکی دەستکرد لە خوێندنی باڵا) و (ئەپڵیکەیشنەکانی زیرەکی دەستکرد لە بواری توێژینەوە)، کە لەلایەن پسپۆری بەریتانی پ.ی.د. نەشوی اسماعیل و پ.ی.د. یارا عبد العاطی وەکو قسەکەری نێودەوڵەتی و پ.ی.د. شەهاب وەهاب کەریم وەکو قسەکەری ناوخۆ و د. سەلار عثمان علی وەکو بەڕێوەبەری وۆرکشۆپەکان وستافی زانکۆمان ئەنجامدرا، کە تیایدا مامۆستایان و توێژەرانی زانکۆمان لە نوێترین گۆڕانکاری و پێشهاتەکانی زیرەکی دەستکرد ئاشناکران.

ئامانج لەم وۆرکشۆپە بریتیبوو لە (بەدەستهێنانی تێگەیشتنێکی بنەڕەتی لە چەمکەکانی زیرەکی دەستکرد، بەکارهێنانی ⁠زانیارییەکانی بنەماکانی زیرەکی دەستکرد لە جیهانی ڕاستەقینەی خوێندنی باڵا، و ⁠بەشداریکردن لە گرووپەکانی گفتوگۆ بۆ چارەسەرکردنی ئەو ئاستەنگ ودەرفەتانەی کە پەیوەندییان بە زیرەکی دەستکرد هەیە لە خوێندنی باڵا.