Category Archives: سەرۆکایەتی زانکۆ

ئەمڕۆ پێنچ شەممە 9ی ئایاری 2024، بە ئامادەبوونی پ.د.ئیدریس محەمەد تاهیر هەرکی سەرۆکی زانکۆی پۆلیتەکنیکی هەولێر فێستیڤاڵی ساڵانەی کولتور و کەلەپوری کوردی لە کۆلێژی تەکنیکی کارگێری هەولێر بەڕێوەچوو.

لە فێستیڤاڵەکەدا یاریدەدەرانی سەرۆکی زانکۆ و ئەندامانی ئەنجومەنی زانکۆ و سەرۆک بەش و مامۆستایان بەشداربوون و تیایدا قوتابییانی کۆلێژی تەکنیکی کارگێڕی هەولێر بەپۆشینی جلوبەرگی کوردییەوە، خواردنی کوردەواری، کاری دەستییەکانیان نمایشکرد، کە سەرجەمیان لەلایەن قوتابییانەوە ئامادەکرابوون.

فێستیڤاڵەکە لەلایەن قوتابیانی هەر چوار بەشی کارگێری کار، تەکنیکی میدیا، تەکنیکی ژمێریاری و بازارگەری نێودەوڵەتی و زمان لە کۆلێژی تەکینیکی هەولێر ئامادەکرابوو.

لە درێژەی چالاکییەکانی هەفتەی رۆشنبیری قوتابییانی زانکۆ کە لەژێر چاودێری پ.د.ئیدریس محەمەد تاهیر هەرکی سەرۆکی زانکۆبەڕێوەدەچێت، ئەمڕۆ پێنج شەممە د. پشتیوان صادق وەزیری ئەوقاف و کاروباری ئاینی حکومەتی هەرێمی کوردستان، سیمینارێکی لەژێر ناونیشانی “دوا پێشهاتە سیاسییەکانی هەرێمی کوردستان” بۆ قوتابییانی زانکۆی پۆلیتەکنیکی هەولێر پێشکەش کرد.

 لە دەستپێکی سیمنارەکەدا کە یاریدەدەرانی سەرۆکی زانکۆ و ژمارەیەک لە ئەندامانی ئەنجومەنی زانکۆ و مامۆستایان و قوتابییان ئامادەیبوون د. پشتیوان صادق وەزیری ئەوقاف و کاروباری ئاینی گووتی: “زۆر خۆشحاڵم ئەمڕۆ لەگەڵ ئێوەی ئازیزو خۆشەویستدام، سوپاسی سەرۆکی زانکۆ و ئەندامانی ئەنجومەن دەکەم بۆ ئامادەکاری بۆ پێشکەشکردنی ئەو سیمینارە، ئەمڕۆ ڕۆژێکی جیاوازە بۆ من چونکە لەگەڵ توێژێکم کە داهاتووی کوردستانن.”

وەزیری ئەوقاف لە سمینارەکەدا، باسی لەوەکرد حکومەتی هەرێمی کوردستان گرنگییەکی زۆر بە کەرتی پەروەردە و خوێندن و هەروەها بە توێژی قوتابیان دەدات، تاوەکو لە ڕێگای زانست و مەعریفەکانیان، کۆمەڵگایەکی داهێنەر و بەرهەمدار دروست بکات.

لە بەشێکی تری سمینارەکەدا، رایگەیاند لە هەرێمی کوردستان، لە هەموو بوارەکان خزمەتێکی زۆر کراوە و دەستکەوتی مەزن بەدەستهاتوون، تەنها لە سێکتەری پەروەردە و خوێندنی باڵا، ئێستا خاوەن دەیان زانکۆ و پەیمانگە و هەزاران قوتابخانەین، بۆیە دڵنیابن ئایندەمان زۆر گەش و رووناکە و کوردستانیش بەردەوام دەبێت لە گەشەسەندن و پێشڤەچوون و ئاوەدانی و ئارامی زیاتر.

د. پشتیوان صادق کە هاوکات ئەندامی مەکتەبی سیاسی پارتی دیموکراتی کوردستانیشە ئاماژەی بەوەکرد، “هەرێمی کوردستان لە رووی پەیوەندی سیاسی و دبلۆماسی و نێودەوڵەتیەکان، زۆر بەهێزە و  ڕۆژ لە دوای ڕۆژ لە پێشکەوتن و بەرەوپێشچوون دایە، بۆیە پێویستە ئێوەی قوتابی کە دواڕۆژی ئەم ووڵاتەن، هەوڵی پێشخستنی زانست و زانیاری خۆتان بدەن و هەمیشە بە چاوی پڕ لە خۆشەویستی و ڕێزەوە سەیری ئەم خاک و نیشتمان بکەن، کە بە خوێنی ئاڵی هەزاران شەهید هاتۆتە بەرهەم.”

دواتر دەرگای گفتوگۆ بەڕووی ئامادەبوواندا کرایەوە پرسیارەکانیان ئاراستە کرد و لە لایەن بەڕێزیانەوە وەڵامی پێویست درانەوە، لە کۆتاییشدا پ.د. ئیدریس محەمەد تاهیر هەرکی سەرۆکی زانکۆ، خەڵاتی رێزلێنان و پلاکێتی تایبەت بە زانکۆی پێشکەش بە بەڕێز د. پشتیوان صادق کرد و سوپاسی بەڕێزیانی کرد بۆ پێشکەشکردنی سیمنارەکەی.

لەژێر چاودێری پ.د. ئیدریس محەمەد تاهیر هەرکی سەرۆکی زانکۆ و بە ئامادەبوونی پ.ی.د. سەرسام خەلیل شوانی راگری پەیمانگەی تەکنیکی کارگێڕی هەولێر و پ.ی.د. رەنج سیروان عەبدوڵا بەڕێوبەری گشتی سەنتەری توێژینەوەی زانستی، ئەمڕۆ چوارشەممە 8ی ئایاری 2024، کۆتایی هات بەخولێکی تایبەت بەزمانی ئینگلیزی کە بۆ مامۆستایان و فەرمانبەرانی زانکۆی پۆلیتەکنیکی هەولێر کرابوویەوە.

خولەکە لەژێر ناوی پەرەپێدانی ئاخاوتن بەزمانی ئینگلیزی لە لایەن دەزگای (University Institute) بەڕێوەچوو. و لە رێکەوتی 28ی نیسان تا 8ی ئایاری 2024، بەردەوام بوو.

لەم خولەدا 63 مامۆستا و فەرمانبەر لەسەر ئاستی زانکۆی پۆلیتەکنیکی هەولێر بەشدارییان تێدا کرد، بە سەرپەرشتی 10 مامۆستای بەئەزموونی نێودەوڵەتی ڕۆژانە سێ کاتژمێر وانەکان دەگوترانەوە و کۆی گشتی کاتی وانەکان (30) کاتژمێر بوو.

شیاوی باسە خولەکە لەڕێگای سەنتەری پەرەپێدان و توێژینەوەی زانستی و سەنتەری زمانی زانکۆی پۆلیتەکنیکی هەولێر رێکخرابوو.

 

رۆژی چوارشەممە 8ی ئایاری 2024، بە ئامادەبوونی پ.ی.د. محسن شەریف شیروانی راگری کۆلێژی تەکنیکی کارگێڕی هەولێڕ، پ. ی. د. ارشد حاجى صديق- سەرۆکی بەشی تەکنیکی ژمێریاری، م. هەوری – یاریدەدەری راگر و مامۆستایان و قوتابیان، بەشی تەکنیکی ژمێریاری لە کۆلێژی تەکنیکی کارگێری هەولێر، بە هەماهەنگی لەگەڵ (UN VOLUNTEER) سمینارێکیان بۆ قوتابیان رێکخست.

لە سیمنارەکەدا چۆنیەتی بەدەستهێنانی هەلی کار لە رێکخراوی (UN) بۆ قوتابییان روونکرایەوە و قوتابیان ئاشناکران بە کارەکانی (UN) و چۆنیەتی پێشکەشکردنی سیڤی بە رێکخراوەکە تاکو لەڕێگەیەوە هەلی کار بەدەستبهێنن لەو رێکخراوە.