ڕاگری پەیمانگای تەکنیکی مێرگەسۆر بەشداری لە وۆرکشۆپێکی نێودەوڵەتی تایبەت بە دۆزینەوەی چارەسەر بۆ ئاڵنگارییەکان دەکات

ڕۆژانی پێنجشەممە و هەینی 5-6ی ئەیلولی 2024، د. طالب محەمەد شەریف عومەر ڕاگری پەیمانگەی تەکنیکی مێرگەسۆر-زانکۆی پۆلیتەکنیکی هەولێر بەشداری لە وۆرکشۆپێک کرد لەژێر ناونیشانی ” بە دۆزینەوەی چارەسەرێک ئاڵنگارییەکان لە رێگای دۆزینەوەی بەرهەمێک و ناساندی بە بازاری کار ” کە بۆ ژمارەیەک زانکۆ و پەیمانگە رێکخرابوو.

وۆرکشۆپەکە بۆ ماوەی دوو ڕۆژ لە هۆتێل ڕادیسۆنی هەولێر بەردەوام بوو و تایبەت بوو بە پرۆگرامێکی هەشت هەفتەیی بۆ بەستنەوەی قوتابیانی زانکۆکانی عێراق و ئوردن لەگەڵ قوتابیانی زانکۆکانی ئەمریکا بە مەبەستی بە دۆزینەوەی چارەسەرێک ئاڵنگارییەکان لە رێگای دۆزینەوەی بەرهەمێک و ناساندی بە بازاری کار .

مەبەست لە وۆرکشۆپەکە دۆزینەوەی باشترین چارەسەری بازرگانییە کە قوتابیان پەرە بە کارامەییەکانیان دەدەن بۆ هاوکاریکردن لە بواری کولتوورە جیاوازەکاندا و دۆزینەوەی چارەسەر بۆ کێشەکان، بەشێوەی تیم، ودۆزینەوەی بیرۆکەی بازرگانی داهێنەرانە بۆ چارەسەری گرفتەکان و دۆزینەوەی بەرهەمێک و ناساندنیان بە بازاری کار.

ئەم پرۆگرامە (The Global Solutions Sustainability Challenge) لە ژێر دەستپێشخەری ستیڤنز بەڕێوەدەچێت، کە لەلایەن رێکخراوی IREX ی ئەمریکییەوە جێبەجێ دەکرێت، پێشبڕکێیەکی دۆزینەوەی چارەسەری بەردەوام بۆئاڵنگارییەکان و بازرگانی کە قوتابیانی کۆلێژ لە ئەمریکا و ئوردن و عێراق لەسەر تیمە دوو نەتەوەییەکان بەیەکەوە لە تیمێکدا هاوکاری یەکتر دەکەن بۆ ئەوەی کار لەسەر چارەسەرێکی بەردەوام بۆ ئاستەنگە ناوخۆییەکانی پەیوەست بە ئامانجەکانی گەشەپێدانی بەردەوامی نەتەوە یەکگرتووەکان بکەن.

تیمە دوو نەتەوەییەکان لە ماوەی هەشت هەفتەدا لە ڕێگەی پرۆسەی بیرکردنەوەی دیزاینەوە بەشداری دەکەن بە بیرۆکەی چارەسەرێکی بەردەوام بۆ پێداویستییە ڕاستەقینەکان لە کۆمەڵگە ناوخۆییەکانیان.

پرۆگرامی گڵۆباڵ سۆڵیوشن ئاڵوگۆڕی لە رێگای ئۆنلاین بەکاردەهێنێت بۆ باشترکردنی لێکتێگەیشتن و توانای چارەسەرکردنی کێشە لە نێوان قوتابیادا. بە درێژایی چاڵێنجەکە، بەشداربووان پەرە بە تواناکانی هێزی کار دەدەن و تۆڕێک لەگەڵ پیشەوەرە پیشەسازییەکان دروست دەکەن.

چارەسەرە جیهانییەکان لەلایەن دامەزراوەی IREX جێبەجێ دەکرێت و لەلایەن دەستپێشخەری ئاڵوگۆڕی ئەم پرۆگرامە Christopher Stevens (JCSVEI) پشتگیری دەکرێت. JCSVEI پرۆگرامێکی نووسینگەی کاروباری پەروەردەیی و کولتووری وەزارەتی دەرەوەی ئەمریکایە کە لەلایەن پەیمانگای ئاسپێنەوە بەڕێوەدەبرێت.

راگەیاندنیپەیمانگەیتەکنیکی_مێرگەسۆر

 

بۆردی ڕاوێژکاری دەرەکی بۆ پلانی ستراتیژی پەیمانگەی تەکنیکی مێرگەسۆر کۆدەبێتەوە

رۆژی پێنجشەممە رێکەوتی ٥ی ئەیلولی ٢٠٢٤، بە ئامادەبوونی د.طالب محەمەد شەریف راگری پەیمانگە یەکەمین کۆبوونەوەی “بۆردی ڕاوێژکاری دەرەکی” بە بەشداری حەوت پرۆفیسۆری بەڕێز، بەڕێوەچوو کە تیایدا گفتوگۆی چڕوپڕ کرا سەبارەت بە پێداویستییە گرنگەکانی کۆمەڵگە و چۆنیەتی پەرەپێدانی پەیمانگەی تەکنیکی مێرگەسۆر.

لە کۆبوونەوەکەدا چەند تەوەرێکی سەرەکی باسکران و یەکێک لە تەوەرە سەرەکییەکانی کۆبوونەوەکە بریتی بوو لە دەستنیشانکردنی بۆشاییەکان لە بواری ئەکادیمی و ژێرخانی پەیمانگاکە.

بۆردەکە پێیوایە هەرچەندە پەیمانگای تەکنیکی مێگەسۆر لە زۆر بواردا سەرکەوتوو بووە، بەڵام پێویستییەکی ڕوون هەیە بۆ فراوانکردنی بازنەی ئەکادیمی. بە تایبەتی تیشک خرایە سەر دامەزراندنی بەش و کۆلێژی نوێ کە خزمەت بە دەڤەرەکە و هەموو کوردستان بکات. هەروەها گرنگی دان بە بنیاتنانی ژێرخانی بەهێز، چونکە بناغەیەکی تۆکمە بۆ گەشەسەندنی داهاتوو پێویستە.

هەروەها ئەندامانی بۆردەکە هاوڕابوون لەسەر پەرەپێدانی دامەزراوەکە بەشێوەیەک نەک تەنها پێشخستنی باشی ئەکادیمی بەڵکو وەک سەرچاوەیەکی گرنگ بۆ گەشەپێدانی ناوچەیی بە تایبەتی سەبارەت بە بەشداریکردنی کۆمەڵگە لە بواری داهێنانی پەروەردەیی.

هەر لە کۆبوونەوەکەدا زەمینەی دانانی پلانێکی ستراتیژی گشتگیرتر داڕێژرا و بڕیاردرا کۆبوونەوەکانی بۆردەکە بەردەوامییان هەبێت.

بۆردی ڕاوێژکاری دەرەکی پەیمانگەی تەکنیکی مێرگەسۆر پێکهاتووە لە ژمارەیەک ئەکادیمیست و کەسانی شارەزا کە کار بۆ دانانی پلانی ستراتیژی پەیمانگای تەکنیکی مێرگەسۆر و خوێندنی باڵا لە دەڤەری بارزان دەکەن و لە داهاتوویەکی نزیکدا گۆڕانکاری بەرچاو لە شێواز و جۆری کارکردن و پەرەپێدانی دامەزراوە ئەکادیمییەکانی دەڤەرەکە ئەنجام دەدەن.

 

پەیامی راگری پەیمانگە بەبۆنەی 41هەمین ساڵیادی جێنوسایدی بارزانییەکان

ئەوکاتانەى کە ژیان تازە دەیویست بەدەم گریانى هاتنەدنیام بە پێکەنین وەڵامم بداتەوە و، شادى روخسارى باب و برام بە روونى هەستپێبکەم، دەستى رەشى دڕندەترین مرۆڤەکان، تاڵترین تامى ژیانی پێ چەشتم و بۆ هەمیشە وێنەى ئازیزانمى بە تەمى تارى نادڵنیایى داپۆشى؛ بۆیە بۆ من، یادى ئەنفال جگە لەو کاریگەرییە گشتییەى کە لەسەر کۆنەستى هەموومان هەیەتى، ئەزموونێکى تایبەتى پڕ لە ژان و ئازاریشە؛ چونکە من خۆم رزگاربوویەکى ئەنفالم.

چل و یەک ساڵ لەمەوبەر، بە مەبەستى لەناوبردنى بزووتنەوەى رزگاری خوازی کوردستان، ڕژێمی سەدام حسێنى گۆڕبەگۆڕ، لە کردەوەیەکی دڕندانەى بەرنامە بۆداڕێژراودا، کردەوەى جینۆساید و سڕینەوەى بارزانییەکانى دەستپێکرد و زیاتر لە 8 هەزار جوامێرى بارزانى بێسەروشوێن و راپێچى مەرگ کردن؛ لەوکاتەوە تا ئێستا، ئێمە بە ئازارى خەمى لەدەستدانى ئەو ئازیزانەوە ژیانمان تێدەپەرێنین.

ئەمڕۆ بە هەستێکی قووڵی پڕ لە خەم یادى ئەو کارەساتە دەکەینەوە؛ بەڵام لەگەڵ ئەوەشدا، ئەگەر چاوێک بە مێژووماندا بگێڕین و لە چارەنووسى ئەوانەى کە ئەنفالیان کرد و ئەوانەش کە ئەنفالکران رابمێنین، سوکناییەک بەدڵماندا دێت. ئەوەتا ئێمەى بەجێماوانى ئەنفال و میراتگرانى ئەو کۆستە مەزنە، سەرەڕاى ئەو هەموو سەختى و نەهامەتییانەى کە چەشتمانن و رووبەڕوومان بوونەوە، بووینەتە رووسوورى مێژوو و بکەرانى ئەنفالیش لە زبڵدانى مێژوودان.

بۆ ئێمە نەک تەنیا 31ى تەمووز، بەڵکو هەموو رۆژێک یادى ئەو ئازیزانەیە. چونکە ئەوان تەنیا هەشت هەزار کەس نەبوون، بەڵکو ئەوان هەریەکەیان ژیانێک بوو بە هەموو رەنگاڵەیى و جۆراوجۆرییەکانیەوە، هەریەکەیان چیرۆک و ئاوات و خۆشەویستی خۆی هەبوو بۆ وڵات، ئاین و مرۆڤایەتی و ژینگەدۆستی.

وەک ئەکادیمییەک، ئەرکی ئێمەیە کە یادەوەرییەکانمان و تەواوى ئەو دڕندەییانەى بەرامبەرمان کراون لەبیر نەکەین؛ پێویستە نەوەکانی داهاتوو ئاگادار بکرێنەوە، کە پێشینانیان، باوک و براو خزم و کەسیان، تەنیا لەبەر ئەوەى کورد بوون، تەنیا لەبەرئەوەى بارزانى بوون، لە چرکەساتێکى مێژووییدا، جینۆساید کران و لەناوبران. ئەمە گرنگە بزانرێ، تا داهاتوومان روون و دیار بێ.

ئەنفالى بارزانییەکان لە یادەوەری ئێمەدا بۆ هەمیشە بە بەرزى دەمێنێتەوە؛ بەڵام ئەمە هاوکات پەڵەیەکى رەشیشە بە ناوچاوى مرۆڤایەتى و دادەپەروەری مرۆییەوە.

جارێکى تر لەو یادەدا، دروود دەنێرین بۆ گیانى پاکى هەموو ئەوانەى بوونە قوربانى ئەو دڕندەییەى داگیرکەران، و بەڵێن بە رۆحى بەرزەفڕیان دەدەین، هەروەک رابردوو ئیرادەى نەبەزیوى کوردستان هەر لە باڵاییدا دەمێنێتەوە.

د. طالب محەمەد شەریف عومەر
راگری پەیمانگەی تەکنیکی مێرگەسۆر

 

راگری پەیمانگە بەشداری یاری کۆتایی پاڵەوانێتی هەڵبژاردەی کوردستان دەکات

ئێوارەی رۆژی چوارشەممە 24ی تەمووزی 2024، د.طالب محەمەد شەریف عمر راگری پەیمانگەی تەکنیکی مێرگەسۆر، بەئامادەبوونی بەرێز هەڵگۆرد شێخ نەجیب سەرپەرشتیاری ئیدارەی سەبەخۆی سۆران و ژمارەیەک لە بەرپرسانی حیزبی و حکومی و وەرزش دۆستان بەشداریکرد لە یاری کۆتایی پاڵەوانێتی هەڵبژاردەی شارەکان بۆ تۆپی پێ لە یارگای د.فرسەت سۆفی لە شاری سۆران.

یاریەکە لە نێوان هەڵبژاردەی هەولێر و هەڵەبجە بەرێوەچوو.

لە یاری کۆتایدا هەڵبژاردەی هەولێر توانی بێتە پاڵەوانی پاڵەوانێتییەکە دوای سەرکەوتنیان بە سەر هەڵبژاردەی هەڵەبجە بە ئەنجامی (4-3).
لە کۆتاییدا خەڵات بەسەر هەردوو تیمو باشترینەکانی خولەکەدا دابەشکرا.