Monthly Archives: نیسان 2025

لە چوارچێوەی پلانی هاوبەشی نێوان زانکۆمان و سەنتەری ڕاوێژکاری کۆچ لە پارێزگای هەولێر/ بەڕێوەبەرایەتی کۆچ و کۆچبەران و وەڵامدانەوەی قەیرانەکان  EJCC، سیمینارێک لەلایەن ئەندازیار ناز ڕۆستەم تاهیر، لە کۆلێژی تەکنیکی ئەندازیاری هەولێر بۆ قوتابیانی قۆناغی سێیەم لە بەشە زانستییەکانی ئەندازیاری شارستانی و ڕێگاوبان و میکانیک و وزە ئەنجامدا لەژێر ناونیشانی(زیان و مەترسییەکانی کۆچی نایاسایی و هۆشیارکردنەوەی گەنجان لەو دیاردەیە).

ئەندازیار ناز ڕۆستەم تاهیر،  بەچڕوپڕی ئاماژەی بە خاڵە نەرێنییەکانی کۆچی نایاسایی بۆ قوتابیانی بەشداربوونی سیمینارەکە ڕوونکردەوە کە ڕێگەی یاسایی هەڵبژێرن بۆ کۆچ تاوەکو خۆیان لە مەترسییەکانی کۆچی نایاسایی بپارێزن.

لە کۆتایی سمینارەکەدا ڕاگری کۆلێژی تەکنیکی ئەندازیاری هەولێر پ.د. ئەیاد زەکی صابر سوپاس و ڕێزلێنانی تایبەتی بەخشییە ئەندازیار ناز ڕۆستەم تاهیر و هیوای سەرکەوتنی هەمیشەیی بۆ خواست کە بەردەوامبن لەو جۆرە سمینارانە، تاوەکو قوتابیانی زانکۆ و گەنجان و هاووڵاتییان بەوریاییەوە لەو بابەتە مەترسیدارە بڕوانن و خۆیان بەدووربگرن.

شایانی باسە سەنتەری راوێژکاری کۆچ لە میانی ئەو هاوبەشیەی وەزارەتی ناوخۆی حکوومەتی هەرێم، ناوەندی هاوبەشی هەماهەنگی قەیرانەکان لەگەل ICMPD لە پارێزگای هەولێر دامەزراوە بۆ خزمەتکردنی گەنج و هاوولاتییان و بەمەبەستی هۆشیارکردنەوەی قوتابیانی زانکۆمان لە زیان و مەترسییەکانی کۆچی نایاسایی بە هەماهەنگی سەرۆکایەتی زانکۆ و راگرایەتی کۆلێژ و پەیمانگا تەکنیکییەکان زنجیرەیەک سیمینار ئەنجام دەدەن .

لە پەراوێزی کارەکانی ٥٧ هەمین خولی کۆنگرەی گشتیی یەکێتی زانکۆکانی عەرەبی کە لە زانکۆی نێودەوڵەتی کوێت لە وڵاتی کوێت بەڕێوەچوو، پ.د.ئیدریس محەمەد تاهیر هەرکی، سەرۆكی زانكۆی پۆلیتەكنیكی هەولێر لەگەڵ پ.د.بەرەکات عەوەز ئەلهدەیبان سەرۆکی دەستەی ئەمیندارانی زانکۆی نێودەوڵەتی کوێت کۆبووەوە.

لە کۆبوونەوەکەدا باس لە بەهێزکردنی پەیوەندییەکانی نێوان هەردوو زانکۆ لە بوارەکانی زانستی و کارگێری کرا، هەروەها باس لە رەخساندنی دەرفەتی مەشق و راهێنانی قوتابیان کرا و لەمبارەیەوە بڕیاردرا کە بۆ ئەمساڵ ژمارەیەک قوتابی زانکۆی نێودەوڵەتی کوێت بۆ مەشقی هاوینە سەردانی زانکۆمان بکەن.

دواتر لەلایەن پ.د.ئیدریس محەمەد تاهیر هەرکی و پ.د.بەرەکات عەوەز ئەلهدەیبان یاداشتی لێتێگەیشتن لەنێوان زانكۆی پۆلیتەكنیكی هەولێر و لە زانکۆی نێودەوڵەتی کوێت واژۆ کرا.

پ.د.ئیدریس محەمەد تاهیر هەرکی، سەرۆكی زانكۆی پۆلیتەكنیكی هەولێر بەشداری لە کۆنگرەی یەکێتی زانکۆکانی عەرەبی کرد کە لە رۆژانی ٢٣-٢٤ی نیسانی ٢٠٢٥ لە زانکۆی نێودەوڵەتی کوێت لە وڵاتی کوێت بەڕێوەچوو.

سەرۆكی زانكۆی پۆلیتەكنیكی هەولێر لەگەڵ ژمارەیەک لە سەرۆکی زانکۆکانی هەرێمی کوردستان بەشداریی لە کارەکانی کردنەوەی ٥٧ هەمین خولی کۆنگرەی گشتیی یەکێتی زانکۆکانی عەرەبی کرد کە لە زانکۆی نێودەوڵەتی کوێت لە وڵاتی کوێت دەستی بەکارەکانی کرد.

لە پەراوێزی کارەکانی کۆنگرەکەدا کە بە ئامادەبوونی ژمارەیەک وەزیر و سەرۆکی زانکۆکانی ئەندام لە یەکێتییەکە بەڕێوەچوو، سەرۆکی زانکۆی پۆلیتەكنیكی هەولێر و سەرۆکی زانکۆکانی هەرێمی کوردستان بەناوی هەرێمی کوردستانەوە زنجیرەیەک دیدار و کۆبوونەوەیان لەگەڵ بەشداربووانی کۆنگرەکە ئەنجامدا.

لەو دیدارانەدا شاندی کوردستان لەبارەی پەرەپێدان بە پەیوەندی و هەماهەنگیی نێوان زانکۆکان ئاڵوگۆڕی بیروبۆچوونەکانیان کرد.

لە لایەکی دیکەوە پ.د.ئیدریس محەمەد تاهیر هەرکی، سەرۆكی زانكۆی پۆلیتەكنیكی هەولێر لەگەڵ پ.د.بەرەکات عەوەز ئەلهدەیبان سەرۆکی دەستەی ئەمیندارانی زانکۆی نێودەوڵەتی کوێت کۆبووەوە و لەمیانیدا باس لە بەهێزکردنی پەیوەندییەکانی نێوان هەردوو زانکۆ لە بوارەکانی زانستی و کارگێری کرا، هەروەها باس لە رەخساندنی دەرفەتی مەشق و راهێنانی قوتابیان لەنێوان هەردوو زانکۆ کرا و لەمبارەیەوە بڕیاردرا کە بۆ ئەمساڵ ژمارەیەک قوتابی زانکۆی نێودەوڵەتی کوێت بۆ مەشقی هاوینە سەردانی زانکۆی پۆلیتەکنیکی هەولێر بکەن.

لە میانی کارەکانی کۆنگرەکەدا لە چوارچێوەی چەند پانێڵێکدا بابەتەکانی پەیوەندار بە پرۆسەی خوێندن لە زانکۆکان تاوتوێی کرا، لەوانە بابەتی پۆلێنبەندی و رانکینگی زانکۆکان، هەماهەنگی نێوان یەکێتی زانکۆکانی عەرەبی و متمانە AACSB، فێربوونی دیجیتاڵی و چەند بابەتێکی دیکەی پەیوەندار بە خوێندنی بەرایی و خوێندنی باڵا لە زانکۆکان تاوتوێ کرا.

جێی ئاماژەیە، زانكۆی پۆلیتەكنیكی هەولێر وەک یەکێک لە زانکۆکانی ئەندام لە یەکێتی زانکۆکانی عەرەبی ساڵانە بە فەرمی بانگهێشتی کۆنگرەی یەکێتییەکە دەکرێت کە هەر خولێکی لەلایەن زانکۆیەکی ئەندام لە یەکێتییەکە لە وڵاتێک میوانداریی دەکرێت.

ڕۆژی چوارشەممە ٢٣ ی نیسانی ٢٠٢٥  لە هۆلی کۆنگرەکان لە کەمپی یەکی زانکۆمان، لە ڕێوڕەسمێکدا بە ئامادەبوونی ئەندازیار عبدالرحمن صدیق سەرۆکی پێشووی دەستەی پاراستن و چاککردنی ژینگە، پ.د.ئازاد حسن قادر یاریدەدەری سەرۆکی  زانکۆی پۆلیتەکنیکی هەولێر بۆ کاروباری کارگێڕی و دارایی و پ.د.فەرهاد عەلی مستەفا یاریدەدەری سەرۆکی زانکۆی سەلاحەددین بۆ کاروباری قوتابیان و خوێندن، ژمارەیەک لە مامۆستایان، فەرمانبەران و قوتابیان، بڕوانامە بەسەر بەشداربووانی خولی هۆشیاری ژینگە کە لەلایەن بەڕێوەبەرایەتی تەندروستی و سەلامەتی لە هەردوو زانکۆی پۆلیتەکنیکی هەولێر و زانکۆی سەڵاحەددین بە هەماهەنگی لەگەڵ رێکخراوی ئاڤیاری هۆشیاری ژینگە لە ژێر ناونیشانی روڵی قوتابی لە گۆڕانکارییەکانی کەشوهەوا  بەسەر (٦٤) قوتابی هەردوو زانکۆکە دابەش کرا.

لە سەرەتادا، ئاسۆ شکاک سەرۆکی رێکخراوی ئاڤیاری هۆشیاری ژینگە وتەیەکی پێشکەش کرد و لە دوای بەخێرهێنانی میوانان، و سوپاسکردنی هەردوو زانکۆی پۆلیتەکنیکی هەولێر و زانکۆی سەڵاحەددین، هاوکات باسی لە گرنگی کردنەوەی ئەم جۆرە خولانە بۆ قوتابیانی زانکۆ و رەنگدانەوەی ئەرێنی لەسەر پاراستنی ژینگە کردەوە.

پاشان ئەندازیار عبدالرحمن صدیق سەرۆکی پێشووی دەستەی پاراستن و چاککردنی ژینگە  بابەتێکی لە ژێر ناونیشانی رۆڵی قوتابی لە پاراستنی ژینگەدا بۆ ئامادەبووان پێشکەش کرد.

 لە کۆتاییدا لەلایەن ئامادەبووانەوە بڕوانامە بەسەر بەشداربووانی خولەکە دابەش کرا.