Daily Archives: ئازار 9, 2025

د.ئەحمەد جەلال کۆنسوڵی فەخری کۆماری سۆسیالیستی دیموکراتی سریلانکا سەردانی پەیمانگای تەکنیکی کارگێری هەولێری کرد و لەلایەن پ.ی.د.سەرسام خەلیل شوانی راگری پەیمانگەوە پێشوازیی لێکرا.

لە دیدارەکەدا کە یاریدەدەری راگر و ژمارەیەک لە سەرۆک بەشەکانی پەیمانگا ئامادەی بوون، راگری پەیمانگا باسی لە بەشەکانی پەیمانگا بەتایبەتی بەشی کارگێری دەزگاکانی گەشتیاری کرد.

هەر لە دیدارەکەدا باس لە کردنەوەی سەنتەرێک بۆ راهێنانی قوتابیانی بەشەکانی کارگێری دەزگاکانی گەشتیاری و گەشتوگوزار لە کۆلێژ و پەیمانگا تەکنکییەکان کرا تاوەکو لە دوای دەرچوونیان بە هەماهەنگیی لەگەڵ لایەنە پەیوەندارەکان لە حکوومەتی هەرێمی کوردستان ببنە خاوەن کاری خۆیان و لەمبارەیەوە باس لەو ژێرخانە کرا کە لە پەیمانگادا هەیە کە دەکرێت لە داهاتوودا لەو سەنتەرە سوودی لێ وەربگیرێت.

دواتر کۆنسوڵی فەخری کۆماری سۆسیالیستی دیموکراتی سریلانکا لەگەڵ راگری پەیمانگای تەکنیکی کارگێری هەولێر هۆڵەکانی خوێندن و تاقیگە و چێشتخانەکانی بەشی کارگێری دەزگاکانی گەشتیاریان بەسەرکردەوە.

بە ئامادەبوونی ئومێد خۆشناو پارێزگاری هەولێر و پ.د.ئیدریس محەمەد تاهیر هەرکی، سەرۆکی زانکۆی پۆلیتەکنیکی هەولێر، وۆرکشۆپێک لەبارەی کردارەکانی کەشوهەوا لەبەر رۆشنایی کۆنفرانسی گۆڕانکارییەکانی کەشوهەوا – COP29  بەڕێوەچوو.

لە سەرەتای وۆرکشۆپەکەدا، کە راوێژکارانی وەزیری خوێندنی باڵا و توێژینەوەی زانستی و بەڕێوەبەری گشتی ناوەندی هاوبەشی هەماهەنگی قەیرانەکان و یاریدەدەرانی سەرۆکی زانکۆ و ژمارەیەک لە ئەندامانی ئەنجوومەنی زانکۆ و رێکخراوەکانی بواری ژینگە و مامۆستایانی زانکۆ ئامادەی بوون، پ.د.ئیدریس محەمەدتاهیر هەرکی لە وتارێکدا دوای بەخێرهێنانی میوان، هاوکات باسی لە گۆڕانکارییەکانی کەشوهەوا کرد وەک بابەتێکی سەردەم و رووبەڕووبوونەوەی ئەو ئاڵنگارییانەی کە دەبنە هۆی پیسبوونی ژینگە بەپێویست زانی.

دواتر پ.د.سیروان بابان وەزیری پێشووی کشتوکاڵ و سەرچاوەکانی ئاو و سەرۆکی ئەنجوومەنی راوێژکارانی سەرۆکایەتی هەرێم و راوێژکاری زانستی سەرۆکی هەرێم لە بابەتێکدا باسی لە هۆکارەکانی پیسبوونی ژینگە و ئەو هەنگاو و رێککارانەی کە دەبنە هۆی کەمبوونەوەی زیان و مەترسییەکانی کرد.

پاشان د.شارا کەمال راوێژکاری سەرۆکی دیوانی ئەنجوومەنی وەزیران و سەرۆکی بەشی تەکنەلۆجیای پیتڕۆڵ لە کۆلێژی تەکنەلۆجی کە یەکێک بوو لە بەشداربووانی COP29 باسی لە کارەکانی کۆنفرانسەکە و ئەو بڕیار و راسپاردانەی لە میانیدا دران باس کرد.

دواتر لە پانێڵێکدا هەریەک لە م.هەڤاڵ ئەحمەد بەڕێوەبەری فەرمانگەی گۆڕانی کەشوهەوا لە دەستەی پاراستن و چاککردنی ژینگە و سەلمان کەریم سەرۆکی بەشی لێکۆڵینەوە و داڕشتن لە بەڕێوەبەرایەتی گشتی سەرچاوەکانی ئاو لە وەزارەتی کشتوکاڵ و سەرچاوەکانی ئاو و موهەنەد ئەیوب لێپرسراوی بەشی کەمکردنەوە و خۆگونجاندن لە فەرمانگەی گۆڕانی کەشوهەوا لە دەستەی پاراستن و چاککردنی ژینگە و عەلی سەعید بەڕێوەبەری زانیاری پەیوەندەییەکان لە ناوەندی هاوبەشی هەماهەنگی قەیرانەکان لە وەزارەتی ناوخۆ، بەجیا باسیان لە هەنگاوەکانی دامەزراوەکانیان بۆ کەمکردنەوەی کارییگەرییەکانی گۆڕانی کەشوهەوا کرد.

پاشان لەلایەن ئامادەبووانەوە بە چەند پرسیارێک بابەتەکان دەوڵەمەندترکران و لەلایەن پانێڵیستەکانەوە وەڵامدرانەوە.

لە کۆتاییدا لەلایەن پ.د.ئیدریس محەمەد تاهیر هەرکی رێزلێنانی زانکۆی پۆلیتەکنیکی هەولێر پێشکەش بە پانێڵیستەکان کرا.

پ.د.ئیدریس محەمەد تاهیر هەرکی، سەرۆکی زانکۆی پۆلیتەکنیکی هەولێر پێشوازی د.ئەحمەد جەلال کۆنسوڵی فەخری کۆماری سۆسیالیستی دیموکراتی سریلانکا لە هەولێر کرد.

لە سەرەتای دیدارەکەدا کە پ.د.ئازاد حسن قادر یاریدەدەری سەرۆکی زانکۆ بۆ کاروباری کارگێری و دارایی و پ.ی.د.بۆتان مەجید ئەحمەد یاریدەدەری سەرۆکی زانکۆ بۆ کاروباری زانستی و خوێندنی باڵا و پ.ی.د.سەرسام خەلیل شوانی راگری پەیمانگای تەکنیکی کارگێری هەولێر  و پ.ی.د.هەتاو کەریم بەڕێوەبەری سەنتەری پەرەپێدانی کار و پ.ی.د.عەبدوڵڵا عومەر یاسین، بەڕێوەبەری پەیوەندییە نێودەوڵەتییەکان و م.بەهزاد حلمی حسێن بەڕێوەبەری نووسینگەی سەرۆکی زانکۆ و سەرمەند حەمید نەسرەدین بەڕێوەبەری کارگێری و خۆیەتی ئامادەی بوون، پ.د.ئیدریس محەمەدتاهیر هەرکی بەناوی خۆی و زانکۆی پۆلیتەکنیکی هەولێرەوە بەخێرهاتنی کۆنسوڵی فەخری کۆماری سۆسیالیستی دیموکراتی سریلانکا لە هەولێر و یاوەرانی کرد کە پێکهاتبوو لە ئایسانگا کاروسینگا بەڕێوەبەری کارگێری کۆنسوڵخانە و هاگوب سیروب بەڕێوەبەری پەیوەندییەکان لە دەستەی گشتی گەشتوگوزاری هەرێمی کوردستان و کورتەیەکی لەبارەی زانکۆی پۆلیتەکنیکی هەولێر بۆ خستنەڕوو.

لای خۆیانەوە کۆنسوڵی فەخری کۆماری سۆسیالیستی دیموکراتی سریلانکا سوپاسی سەرۆکی زانکۆی پۆلیتەکنیکی هەولێریان کرد بۆ پێشوازیی و رەخساندنی ئەم دیدارە، هاوکات باسیان لە ئامانجی سەردانەکەیان کرد کە دروستکردنی هەماهەنگی بوو بە تایبەتی لە بواری کارگێری دەزگاکانی گەشتیاری و گەشتوگوزار لەگەڵ ئەو بەشانەی کە لە زانکۆماندا هەن.

لە بەشێکی دیکەی کۆبوونەوەکەدا باس لە کردنەوەی سەنتەرێکی تایبەت بە راهێنانی قوتابیانی بەشەکانی کەشتوگوزار کرا تاوەکو قوتابیان لەدوای دەرچوونیان لەم بەشانە بە هەماهەنگی لەگەڵ لایەنە پەیوەندارەکان لە حکوومەتی هەرێمی کوردستان ببنە خاوەنی کاری خۆیان، بۆ ئەمەش بڕیاردرا کە هەنگاوەکانی کردەیی بۆ کردنەوەی ئەم سەنتەرە بگیرێتەبەر.