ئەمڕۆ یەکشەممە 1ـی کانوونی یەکەمی 2024 پ.د.ئیدریس محەمەدتاھیر ھەرکی سەرۆکی زانکۆی پۆلیتەکنیکی ھەولێر پێشوازیی لە شاندێکی رێکخراوی ZFD ئەڵمانی کرد کە پێکھاتبوو لە رەیف جانک بەڕێوەبەری کاروباری وڵاتان لە رێکخراوی ZFD لە عێراق و ئیلینا ئیمیک بەڕێوەبەری پڕۆژەکان و کەریم سابت سەرۆکی پڕۆگرامەکان و سەیوان ئیبراھیم راوێژکاری ئەمنی لە رێکخراوی ناوبراو.
لە سەرەتای دیدارەکەدا کە پ.ی.د.بۆتان مەجید ئاسنگەر یاریدەدەری سەرۆکی زانکۆ بۆ کاروباری زانستی، پ.ی.د.یوسف مستەفا رەسوڵ یاریدەدەری سەرۆکی زانکۆ بۆ کاروباری قوتابیان، پ.ی.د.عەبدوڵڵا عومەر یاسین بەڕێوەبەری پەیوەندییە نێودەوڵەتییەکان، م.بەھزاد حلمی بەڕێوەبەری نووسینگەی سەرۆکی زانکۆ و سەرمەند حەمید بەڕێوەبەری کارگێری و خۆیەتی ئامادەی بوون، سەرۆکی زانکۆ بەخێرھاتنی شاندی میوانی کرد و کورتەیەکی لەبارەی زانکۆ و پێکھاتەکەی بۆ خستنەڕوو.
دواتر شاندی میوانی ئامانجی سەردانەکەیان باس کرد کە بریتی بوو لە دروستکردنی ھەماھەنگی لەنێوان رێکخراوی ZFD ئەڵمانی و زانکۆی پۆلیتەکنیکی ھەولێر بەمەبەستی کردنەوەی خولی تایبەت بە مامۆستایان، فەرمانبەران و قوتابیانی زانکۆی پۆلیتەکنیکی ھەولێر لەبواری ئاشتەوایی و بەرەنگاربوونەوەی جەنگ و کاریگەرییە نەرێنییەکانی.
لای خۆیەوە سەرۆکی زانکۆ خۆشحاڵی خۆی دەربڕی بە دەستنیشانی کردنی زانکۆی پۆلیتەکنیکی ھەولێر لەلایەن رێکخراوی ZFD ئەڵمانی بۆ ئەنجامدانی کاری ھاوبەش و پێکەوەیی و رایگەیاند، زانکۆمان بە خۆشحاڵییەوە پێشوازیی لەو ھەنگاوەی رێکخراوی ZFD دەکات و ئامانجی زانکۆمان ئەوەیە کە جگە لە بواری پەروەردە و فێرکردن، ھاوکات لە بواری جیاجیادا خزمەت بە کۆمەڵگا بکات.
لە کۆتاییدا ھەردوولا رێککەوتن لەسەر دەستپێکردنی ھەنگاوی کردەیی بۆ جێبەجێکردنی ئەم بەرنامەیە لە ئایندەیەکی نزیکدا.
